'काल' बने टिपरहरू, देशभर नै आतंक

A+ A A-

गोकर्णेश्वर नगरपालिका-१, सुन्दरीजलका रोहन घिसिङका दुई छोरी थिए । वडाध्यक्ष राम मानन्धरका अनुसार सामान्य मजदुरी गर्ने रोहनको सपना थियो– छोरीहरूलाई सकेसम्म आमा–बुबाको जस्तो मजदुरी गरेर खानु नपरोस्, पढेलेखेर राम्रै जागिर गरून् र बुढेसकालमा हामीलाई पनि हेरून् भन्ने । तर, विडम्बना, आफ्ना दुवै छोरीलाई कालजस्ता टिपरले किचेर उनको सपना चकनाचुर पारिदियो ।

त्यसैले उनले मजदुरी गरेर भए पनि दुवै छोरीलाई नजिकैकाे सरकारी स्कुल छाडेर गोकर्णेश्वरस्थित वर्ल्ड युथ इन्टरनेसनल बोर्डिङ स्कुलमा भर्ना गरे । घिसिङका आठ वर्षीया छोरी सृष्टि कक्षा २ र चार वर्षीया श्रेया नर्सरीमा पढ्थिन् ।

दुवै छोरीलाई बिहान खाना खाएर स्कुल छोड्न उनी आफ्नै मोटरसाइकलमा राखेर ८ बजे नै घरबाट निस्केका थिए । तर, बिडम्बना स्कुलनजिकैको मेलम्ची चोकमा उनले चलाएको मोटरसाइकललाई बा ४ ख ६९६५ नम्बरको टिपरले ठक्कर दियो ।

आश्चर्यको कुरा उनी टिपरको पछि थिए । तर, अगाडिबाट आएको अर्को टिपरलाई साइड दिन खोज्दा ब्याक गरेको टिपरले उनको मोटरसाइकलाई किच्दा दुवै छोरीको घटनास्थलमै मृत्यु भयो । दुर्घटनामा रोहन गम्भीर घाइते भएका छन् । चालक अझै फरार रहेको प्रहरीको भनाइ छ ।

उनको नेपाल मेडिकल कलेज अत्तरखेलमा उपचार भइरहेको छ । घटनाको विरोधमा स्थानीयवासीले प्रदर्शन गरिरहेका छन् । स्थिति तनावग्रस्त छ । ठूलो संख्यामा प्रहरी परिचालन गरिएको छ । चालक फरार छन् ।

देशभर नै आतंक

टिपरको ठक्करले ज्यान गुमाउने सृष्टि र श्रेया मात्रै होइनन् । मंगलबार मात्रै बाँकेको राँझा चोकमा पनि टिपरको ठक्करबाट बिहान ८ बजे नेपालगन्ज उपमहानगरपालिका– २० मा भे १ क ६५७ नम्बरको टिपरले ठक्कर दिँदा ७० वर्षीया बिरबली भण्डारीको मृत्यु भएको थियो ।

२ पुसमा सिरहाको लहान–ठाडी सडकखण्डअन्तर्गत लहान नगरपालिका– ३ स्थित सडकमा पनि टिपरले मोटरसाइकललाई ठक्कर दिँदा एकै परिवारका तीन जनाको मृत्यु भएको थियो ।

स१क २६१ नम्बरको टिपरले प्रदेश २–०१–००२ प २६८२ नम्बरको मोटरसाइकललाई ठक्कर दिँदा मोटरसाइकलमा सवार सप्तरीको बलान विहुल गाउँपालिका– २, दिघियाका एकै परिवारका ६० वर्षीय मोतीलाल यादव, उनका भतिजा ३० वर्षीय रामकुमार यादव र ८ वर्षीय नाति अभिषेक यादव थिए ।

त्यसअघि १३ माघ २०७६ मा गोरखामा दूध बिक्रीका लागि बजार हिँडिरहेकी गोरखा नगरपालिका– १०, अमलापानीकी ५२ वर्षीया मनमाया तामाङकाे पनि टिपरकै ठक्करले ज्यान गुमेकाे थियाे ।

जसको विरोधमा स्थानीयले २६ वटा टिपर र एस्क्याभेटरमा तोडफोड र आगजनी गरेका थिए । मनमायालाई ग१ख ८०२७ नम्बरको टिपरले ठक्कर दिएकाे थियाे । त्यही वर्षकै १५ माघमा सुर्खेतमा पनि टिपरको ठक्करबाट कालीकोट महावै गाउँपालिका–३, सिमखेतका केशर सिंहको ज्यान गयो ।

उनी सवार भे१प २१७८ नम्बरको मोटरसाइकललाई पछाडिबाट तीव्र गतिमा आएको भे१ख २२४२ नम्बरको टिपरले ठक्कर दिँदा उनको मृत्यु भएकाे थियाे । सिंहको मृत्युपछि आक्रोशित स्थानीयले टिपर आतंकको विरोध गर्दै सडक अवरुद्ध पारेका थिए । अवरुद्ध सडक खुलाउन सुर्खेत प्रहरीले गोली चलाउनुपरेको थियो ।

प्रहरीको गोली लागेर एक दर्जनभन्दा बढी मानिस घाइते भएका थिए । गत वर्ष कञ्चनपुरको महेन्द्रनगरमा पनि टिपरकै ठक्करबाट भीमदत्त नगरपालिका–१५, गोबरैयाकी २० वर्षीया रमिता भट्टको मृत्यु भएकाे थियाे ।

महेन्द्रनगर जनज्योति बहुमुखी क्याम्पसमा स्नातक तह तेस्रो वर्षमा अध्ययनरत भट्ट साइकलमा सवार थिइन् । एकै दिशातिर जाँदै गरेको तीव्र गतिको से १ क ८८७ नम्बरको टिपरले पछाडिबाट ठक्कर दिँदा उनको घटनास्थलमै मृत्यु भएको थियो ।

स्थानीयले टिपर आतंक बढेको भन्दै टिप्परमाथि ढुङ्गामुढा गरेर सडक अवरुद्धसमेत पारेका थिए । महेन्द्रनगरमा पनि सडक खुलाउन प्रहरीले अश्रुग्यास प्रहार गर्नुपरेको थियो ।

टिपरको बनावट नै ज्यानमारा

उपत्यकामा समेत टिपरका कारण दुर्घटना बढेको भन्दै सरकारले एक वर्षअघिदेखि चक्रपथभित्र टिपर चलाउनै रोक लगाएको छ । ट्राफिक महाशाखा र जिल्ला प्रशासन कार्यालयले चक्रपथभित्र बिहान ७ देखि बेलुका ८ बजेसम्म टिपर चलाउन रोक लगाएको हो ।

त्यसयता उपत्यकामा दिउँसोको समयमा टिपर दुर्घटना घटेको महानगरीय ट्राफिक प्रहरीले जनाएको छ । उपत्यकामा चल्ने टिपरमाथि निगरानी बढाएका कारण रिङरोडमा टिपर दुर्घटना घटेको ट्राफिक प्रहरीको दाबी छ । ट्राफिक प्रहरीमा लामो समय काम गरेका पूर्वप्रहरी निरीक्षक सीताराम हाछेथूले टिपरको बनावट नै ज्यानमारा रहेको बताउँदै आएका छन् ।

‘टिपरको बनावट नै ज्यानमारा छ', हाछेथूले भने, ‘अन्य ठूला सवारीसाधनले मान्छेलाई ठक्कर दिँदा उछिट्टिएर जान्छन् तर, टिपरले चक्कामा बेरेर मार्छ ।’ टिपरको अगाडिको भाग र चक्का नै ठूलो बनावटकाे भएका कारण टिपरसँगको दुर्घटना हुँदा अधिकांशको ज्यान जाने गरेको ट्राफिक प्रहरीको भनाइ छ ।

सडक दुर्घटना बढेपछि प्रहरी प्रधान कार्यालयले देशभर नै सवारीचालकका लागि जनचेतनामूलक अभियान चलाएको छ । सडक दुर्घटनाकाे मुख्य कारण चालकको लापर्वाही रहेको भन्दै पछिल्लो सयम प्रहरीले देशभर ट्राफिक जनचेतना अभियान चलाइरहेकाे छ ।

यी पनि पढ्नुस् :

राेकिएन टिपर आतंक : दुवै छाेरी गुमाएका रोहन अस्पतालमा छटपटाउँदै

सुन्दरीजलमा टिपरले ठक्कर दिँदा विद्यालय जाँदै गरेका दिदीबहिनीकाे मृत्यु, बुबा घाइते

टिपरकाे ठक्करले दिदीबहिनीकाे मृत्युपछि सुन्दरीजल तनावग्रस्त, प्रहरीले हान्याे अश्रुग्यास

प्रकाशित मिति: बुधबार, चैत १६, २०७८ १५:४३