पटक–पटक कारबाही भोगेका एसपी यादवलाई शक्तिकेन्द्रको आशीर्वाद

A+ A A-

प्रहरी प्रधानकार्यालयले सोमबार राति ६ जना प्रहरी उपरीक्षक (एसपी) को काज र ३६ जना प्रहरी नायव उपरीक्षक (डीएसपी) को सरुवा गर्‍यो ।

तर, एसपीको काजले भने प्रहरी संगठनमा असन्तुष्ट चुलिएको छ । एसपीले नेतृत्व गर्ने सिन्धुपाल्चोक, मोरङ र पश्चिम नवलपरासी जिल्लाका एसपी फेरिएका छन् ।

आश्चार्यको कुरा त के छ भने संगठनभित्र बदनामी कमाएका एसपी रामेश्वर यादवलाई प्रहरी प्रधान कार्यालयले आकर्षक मानिएको सिन्धुपाल्चोक जिल्लाको जिम्मेवारी दिएको छ ।

सिन्धुपाल्चोका एसपी राजन अधिकारीलाई अख्तियार दुरुपयोग अनुसन्धान आयोग काज सरूवा गरेर उनको ठाउँमा बागमती प्रहरी प्रदेश कार्यालयमा कार्यरत एसपी यादवलाई पठाइएको हो ।

यादव राष्ट्रिय अनुसन्धान विभाग गुप्तचरबाट विना प्रतिस्पर्धा २५ पुस २०५८ को मन्त्रिपरिषद् निर्णयका आधारमा प्रहरीमा छिरेका अधिकारी हुन् ।

त्यो बेला गुप्तचर विभागबाट ३० जना निरीक्षकसहित ४६ जना गुप्तचरबाट नेपाल प्रहरीमा प्रवेश गरेका थिए । यादवको बदनामी श्रृंखला प्रहरी निरीक्षकदेखि नै छ । यो बीचमा उनलाई प्रहरी प्रधान कार्यालयले पटक–पटक निलम्बन नै गरेको छ ।

पछिल्लो समय कर्णाली ट्राफिक प्रहरी प्रमुख हुँदा आफू मातहतका प्रहरी कार्यालयबाट अवैध रकम असुलेको आरोप पुष्टि भएपछि १७ मंसिर २०७७ मा यादवलाई ६ महिनाका लागि हालका आईजीपी शैलेश थापा क्षेत्रीले नै निलम्बन गरेका थिए ।

यादवको विवादित श्रृंखला यतिमै सिमित छैन । २०७० मा जिल्ला प्रहरी कार्यालय रुपन्देहीमा डीएसपी हुँदा पनि लागूऔषध मुद्दामा पक्राउ परेर थुनामा रहेका अभियुक्तसँग पैसा असुलेको खुलेपछि उनी निलम्बन परेका थिए ।

महानगरीय प्रहरी वृत्त ललितपुर सातदोबाटो प्रमुख हुदाँ र सिन्धुली प्रहरी प्रमुख हुँदा पनि उनी विवादरहित हुन सकेनन् । उनीमाथि सिन्धुलीमा गाँजा तस्करबाट समेत रकम असुली गरेको आरोप लागेको थियो ।

यसरी बदनाम एसपीलाई आईजीपी क्षेत्रीले फेरि सिन्धुपाल्चोक पठाएका छन् । आफैले कारबाही गरेका एसपीलाई आकर्षक जिल्ला पठाएको प्रति अन्य प्रहरी अधिकारी नै चकित परेका छन् ।

तर, आईजीपी क्षेत्रीले सत्तासिन पार्टी नेपाली कांग्रेसका नेताहरूको दबाव झेल्न नसकेर यादवलाई पठाएको प्रहरी अधिकारीहरू बताउँछन् ।

‘आईजीपी सावले यादव रोक्नुपर्छ भन्ने कुरा पहिला देखि नै गर्दै आएका हुन् । तीन महिना अघिदेखि नै उनको सरुवाका लागि दवाब आएको थियो । आईजीपीकै कारण रोकिएको हो । तर, अन्तिममा रोक्न सक्नु भएन,’ आईजीपी सचिवालयका एक अधिकारीले भने ।

अवकाशको उत्तरार्धमा पुग्दा पनि आईजीपी क्षेत्रीले संगठनमा व्यवसायिक अधिकृतका लागि कुनै अडान लिन नसक्दा प्रहरीमा राजनीतिक हस्तक्षेप हाबी भएको हो ।

कांग्रेस नेता एवम् गृहमन्त्री बालकृष्ण खाँण र अर्का नेता मोहन बस्नेत लगायतको दबाबमा यादव सिन्धुपाल्चोक सरुवा भएको प्रहरी अधिकारीको भनाइ छ ।

उनीबाहेक पश्चिम नवलपरासीको जिम्मेवारी पाएका एसपी ऋषिराम कँडेल र मोरङको जिम्मा पाएका शान्तिराज कोइराला पनि संगठनभित्र तुलनात्मक रूपमा कमजोर क्षमता भएका प्रहरी अधिकारी हुन् ।

प्रहरी अधिकारीहरू प्रहरीभित्र चरम राजनीति हस्तक्षेप हुनुको पछाडि आईजीपीकै निरीहता रहेको बताउँछन् ।

प्रकाशित मिति: मंगलबार, चैत १५, २०७८ १८:४८