सरकारलाई आयल निगमकाे चिठीः तत्काल जाेरबिजाेर लगाउन, आइतबार सार्वजनिक बिदा दिन माग

सरकारलाई आयल निगमकाे चिठीः तत्काल जाेरबिजाेर लगाउन, आइतबार सार्वजनिक बिदा दिन माग

A+ A A-

पेट्रोलियम पदार्थमा लगातार अधिक घाटा बेहोरेपछि नेपाल आयल निगम हात उठाउने अवस्थामा पुगेको छ । स्वचालित मूल्य प्रणालीअनुसार मूल्य समायोजन गर्ने सुविधा नपाउँदा मासिक ९ अर्बभन्दा बढी घाटा बेहोर्नुपर्ने भएपछि निगमले कडा विकल्प अघि सारेर उद्योग वाणिज्य तथा आपूर्ति मन्त्रालयमा पत्र पठाएको छ ।

कार्यकारी निर्देशक उमेशप्रसाद थानीको हस्ताक्षरमा तालुक मन्त्रालय उद्योग वाणिज्य तथा आपूर्ति मन्त्रालयमा पठाइएको पत्रमा चारवटा विकल्प अघि सार्दै अन्यथा पेट्रोलियम पदार्थको खरिद-बिक्रीमा सकस पुग्ने संकेत गरिएको छ ।

मन्त्रालयमा पठाइएको पत्रमा तत्कालका लागि सरकारी कर्मचारीलाई शनिबार र आइतबार बिदा दिएर पेट्रोलको खपत घटाउने विकल्प सारिएको छ ।

त्यस्तै, कोरोनाको समयमा जस्तै निजी सवारीसाधनका लागि बारअनुसार जोरबिजोर प्रणाली लागू गर्नुपर्ने र सरकारी सवारीसाधन पूर्ण क्षमतामा अर्थात् सरकारी गाडीमा सिट खाली नराख्ने अभियान सुरु गर्न सुझाव दिइएको छ ।

पेट्रोल खरिदका लागि पैसाको समेत अभाव रहेकाले अर्थ मन्त्रालयको सहयोगमा सरकारी बैंक र नागरिक लगानी कोष, सञ्चय कोषलगायतका निकायबाट प्रत्यक्ष रकमको व्यवस्था गर्नुपर्ने पनि पत्रमा उल्लेख छ । लगातार घाटामा गएकाले एकै पटक ब्रेक इभनमा 'न घाटा, न नाफा'मा जानेगरी मूल्य समायोजन गरिनुपर्ने उल्लेख छ ।

एकै पटक उपभोक्तालाई आहत हुन सक्ने भन्दै सरकारले पेट्रोलमा प्रतिलिटर १५ र ग्यासमा २ सय रुपैयाँ कर घटाउने र अपुग घाटामा मात्रै मूल्य समायोजन गर्ने गरी अघि बढ्न सक्ने सुझाव पनि दिइएको छ । यसरी राजस्व पनि भनिए जति घटाउन नसकिएको र मूल्य समायोजनले पनि सबै घाटा पूर्ति गर्न नसके पेट्रोलियम पदार्थको खपत घटाउनैपर्ने सुझाव निगमको छ ।

नेपाल आयल निगमका नायब कार्यकारी निर्देशक सुशील भट्टराईले विभिन्न विकल्पहरूमाथि छलफल भइरहेको बताए । उनले अन्तर्राष्ट्रिय बजारमा मूल्यवृद्धिका कारण आयल निगम समस्यामा रहेको अवस्थामा व्यापारी तथा बिक्रेताहरूले भाडा तथा कमिसन समायोजनको माग राखेर थप समस्या सिर्जना गरेकाे बताए ।

यसअघि संसदको उद्योग तथा वाणिज्य उपभोक्ता हित तथा श्रम समितिले पनि पेट्रोलियम पदार्थको आपूर्ति घटाउन जोरबिजोरको व्यवस्था गर्न निर्देशन दिएको थियो । यद्पि निगमले भने यस्ताे निर्देशनकाे पत्र प्राप्त नभएकाे जनाएकाे छ ।

चालु आर्थिक वर्षको आठ महिनामा गत वर्षको तुलनामा १ खर्बभन्दा बढीको इन्धन आयात भएको छ । तर, परिमाणको हिसाबले भने गत वर्षको भन्दा न्यून छ । रुस र युक्रेनबीचकाे युद्धले विश्वबजारमा पेट्रोलियम पदार्थको मूल्य आकाशिएको छ । अहिले अन्तर्राष्ट्रिय बजारमा कच्चा तेलको मूल्य प्रतिब्यारेल १२० डलरसम्म पुगेको छ ।

प्रकाशित मिति: मंगलबार, चैत १५, २०७८ १०:३३