निकुञ्जक्षेत्रकाे जमिन कब्जा गरेकाे भन्दै चेपाङका घरमा आगजनी

A+ A A-

चितवन राष्ट्रिय निकुञ्ज प्रशासनले माडी- ९, कुसुमखोलामा नयाँ घर बनाएर बसोबास गरेका चेपाङका घरमा आगजनी गरेको छ । निकुञ्जको कोर इलाका अतिक्रमण गरेको भन्दै आइतबार आगजनी गरिएको हो ।

घरगोठमा आगजनीपछि आइतबार साँझ कुसुमखोला पुगेका माडी नगरपालिकाका मेयर ठाकुरप्रसाद ढकालले चेपाङहरूका १५ घर जलाइएको बताए । '२०४८ सालदेखि बसोबास गर्दै आएका काजीमान प्रजासहितका १५ जनाकाे घर जलाइएको उनले बताए ।

गतवर्ष निकुञ्जले घर जलाएपछि स्थानान्तरण गरिएका केही चेपाङ पुनः फर्केर कुसुमखोलामै नयाँ घर बनाएर बस्न थालेका थिए । निकुञ्जको कोर इलाकामा बस्ने सम्भावना नभएको भन्दै स्थानान्तरणका लागि कुराकानी हुँदै गर्दा समन्वय नै नगरी निकुञ्जले घर भत्काउनु गलत काम भएको मेयर ढकालले बताए ।

'२५ वटाभन्दा बढी झुप्राहरू नयाँ बनेका रहेछन्, जसमा १० वटा घरमा मान्छे बस्न सुरुवात गर्नुभएको रहेछ । वनभित्र बस्नुहुँदैन भनेर कुराकानी भएकै अवस्थामा सार्ने प्रयत्न गर्दागर्दै एकाएक समन्वय नगरी आगजनी गर्नु निकुञ्जको गल्ती हो', उनले भने ।

निकुञ्जका बगई सेक्टरका सहायक संरक्षण अधिकृत प्रमोद यादवको टोलीले आइतबार घरगोठ जलाएको स्रोतले जनाएको छ । चितवन राष्ट्रिय निकुञ्जका सहायक संरक्षण अधिकृत गणेशप्रसाद तिवारीले कति घर जलाइएको भन्ने बारेमा हेडक्वार्टरमा आधिकारिक सूचना नआइसकेको बताए ।

माडी नगरपालिकाको समन्वयमा स्थानान्तरण गरिसकेपछि पनि पुन: निकुञ्जको कोर इलाका कब्जा गरेको भन्दै घर भत्काइएको सूचना अधिकारी तिवारीले बताए । 'बारम्बार हटाउँदा पनि फेरि घर बनाउने बस्ने गरेपछि कारबाही गरिएको हुन सक्छ । अमानवीय तरिकाले हटाइएको होइन', तिवारीले भने ।

कागजात र पहिल्यैदेखि बस्दै आएका पुराना घर भने नजलाइएको उनले दाबी गरे । गत वर्ष ३ साउनमा निकुञ्जले २ घरगोठ आगजनी र ८ घरगोठ हात्ती लगाएर भत्काएको थियो । उक्त घटनापछि विस्थापित भएका ८२ परिवारलाई तिनकोठे टिनको छानोसहित भवन बनाएर राइडाँडामा राखिएको छ । त्यस्तै, परौवी खोलामा ४२ परिवार र बगईमा २५ घर स्थानान्तरण गरिएको छ ।

तस्वीरहरू : गाेविन्द न्याैपाने

प्रकाशित मिति: सोमबार, चैत १४, २०७८ १०:०६