बन्यो लुम्बिनी राजधानीको गुरुयोजना, राप्ती नदी किनारमा आधुनिक शहरको परिकल्पना

बन्यो लुम्बिनी राजधानीको गुरुयोजना, राप्ती नदी किनारमा आधुनिक शहरको परिकल्पना

A+ A A-

लुम्बिनी प्रदेशको स्थायी राजधानी दाङको राप्ती नदी किनारामा आधुनिक शहरको परिकल्पनासहित गुरुयोजना बनाइएको छ । प्रदेश पूर्वाधार विकास प्राधिकरणले एक वर्ष लगाएर गुरुयोजना निर्माण गरेको हो । गुरुयोजना मुख्यमन्त्री कुलप्रसाद केसीलाई आइतबार बुझाइएको छ ।

राप्ती नदी किनारामा बलियो तटबन्धन गर्दै नदीको सभ्यतामा आधारित शहरसहितको राजधानी निर्माण गर्ने गुरुयोजनामा उल्लेख छ । शहरभित्र बुद्ध आकृतिको रूपमा मन्त्रालय स्थापना गर्ने गुरुयोजनामा उल्लेख गरिएको प्रदेश पूर्वाधार विकास प्राधिकरण , लुम्बिनी प्रदेशका प्रमुख कार्यकारी अधिकृत इन्जिनियर अनन्तराज घिमिरेले बताए ।

राप्ती गाउँपालिका, गढुवा गाउँपालिका सितगंगालगायतको भूगोलमा राजधानीको प्रशासनिक केन्द्र, शैक्षिक क्षेत्र, स्वास्थ्य क्षेत्र, औद्योगिक क्षेत्र, खेदकुद क्षेत्र यातायातको सेवा क्षेत्र, व्यापारिक क्षेत्र, उत्पादन क्षेत्र र आवास, धार्मिक क्षेत्र, बाल उद्यान क्षेत्र बनाउने गुरुयोजनामा उल्लेख गरिएको छ ।

प्रदेशको राजधानी भर्जिन ल्याण्डमा भएकोले भवन निर्माणको क्षेत्र, पार्किङ क्षेत्र, होटेल क्षेत्रसमेत पनि गुरुयोजनामा समेटिएको छ । साथै गुरु योजनामा यातायात क्षेत्रको सञ्चालमा ५० मिटरको सडक र ३० मिटरको सडक बनाएर फराकिलो बनाउने उल्लेख गरिएको छ ।

गुरुयोजनाअनुसार संरचना बनाउन करिब १५ वर्ष लाग्ने अनुमान छ । मन्त्रालयका प्रशासनिक भवन निर्माणका लागि ३ अर्ब र गुरुयोजना पूरा गर्नका लागि करिब ७० अर्ब बजेट चाहिने अनुमान गरिएको प्रदेश पूर्वाधार विकास प्राधिकरणका प्रमुख कार्यकारी अधिकृत घिमिरेले बताए ।

गुरुयोजनाअनुसार राजधानी विकास गर्नका लागि प्रदेश सरकारले जग्गा एकीकरण गर्ने कार्यविधि समेत बनाएकोे गुरुयोजना निर्माण समितिका संयोजक एवं लुम्बिनी प्रदेशका मुख्यन्यायाधिवक्ता श्रीकृष्ण सुवेदीले जानकारी दिए ।

गतमंसिर १६ को मन्त्रिपरिषद्को बैठकले मुख्य न्यायाधिवक्ताको संयोजकत्वमा ५ सदस्यीय कार्यदल गठन गरेको थियो । उक्त कार्यदलले जग्गा एकीकरणका लागि कार्यविधि बनाएर मुख्यमन्त्री कार्यालयलाई बुझाएको छ ।

मन्त्रिपरिषदले गुरुयोजना पारित भएपछि कार्यान्वयनमा जानेछ । गुरुयोजनाअनुसार नै देउखुरीमा सांस्कृतिक, आधुनिक शहरको निर्माण सुरु हुने लुम्बिनी प्रदेशका मुख्यमन्त्री कुल प्रसाद केसीले बताए ।

२०७७ असोज २० को प्रदेशसभा बैठकले दाङको देउखुरीलाई लुम्बिनी प्रदेशको स्थायी राजधानी तोकेको थियो । स्थायी राजधानीमा प्रशासन सञ्चालनको लागि आवश्यक भवन नभएपछि अहिले अस्थायी राजधानी बुटवलबाट नै प्रदेश सरकारको प्रशासनिक काम सञ्चालन हुँदै आएको छ ।

प्रकाशित मिति: आइतबार, चैत १३, २०७८ १८:१९