स्थानीय तहबाट कोरियाले सिधै मौसमी कामदार लैजाने, कमाइ साढे २ लाख

A+ A A-

दक्षिण कोरियाको स्थानीय निकायले नेपालका स्थानीय तहबाट सिधै कृषि तथा मत्स्यपालनक्षेत्रमा कामदार लैजाने भएको छ । कोरियामा कामदारको अभाव भएसँगै नेपालबाट ४ हजार मौसमी कामदार लिने कोरियाली कानुन तथा न्याय मन्त्रालयले गत जनवरीमै स्वीकृति दिएको थियो ।

कोरियाले २०२२ को जनवरीदेखि लागू हुनेगरी नयाँ नियम बनाएर नेपालबाट मौसमी कामदार लैजाने भएको हो ।

नेपाल कल्चर सेन्टर कोरियाका निर्देशक ह्वाङ्क्युले कोरियास्थित कानुन तथा न्याय मन्त्रालयले सन् २०२१ डिसेम्बर १४ मा प्रकाशित गरेको सूचनाअनुसार कोरियामा कृषि तथा माछापालनक्षेत्रमा नेपालबाट मौसमी कामदार लैजाने तयारी भएको जनाए । मौसमी कामदार आपूर्ति गर्ने देशमा सेन्टरले छलफल गर्दै आएको छ ।

कोरियाको न्याय मन्त्रालयले मौसमी कामदार लैजानेबारे नेपालसहित चार देशका प्रतिनिधिसँग छलफल गरी कानुन नै परिवर्तन गरेको श्रम, रोजगार तथा सामाजिक सुरक्षा मन्त्रालयलाई जानकारीसमेत गराएको थियो ।

पहिलो चरणमा कृषि र माछापालनमा मौसमी कामदार लैजाने साथ दोस्रो चरणमा निर्माणक्षेत्रमा मौसमी कामदार लिने विषयमा पनि गत महिना छलफल भएकाे थियो ।

नेपाल कल्चर सेन्टर कोरियाको पहलमा नेपाललाई मौसमी कामदारका लागि लगभग ४ हजार जना लैजानेबारे कोरियाका ३० भन्दा बढी स्थानीय निकायबाट अनुरोध आएकोे जनाइएको छ ।

नेपाल कल्चर सेन्टर कोरियाका प्रतिनिधिले नेपालबाट मौसमी कामदार लैजानेबारे श्रम, रोजगार तथा सामाजिक सुरक्षामन्त्री कृष्णकुमार श्रेष्ठलगायत सम्बन्धित व्यक्तिसँग भेटघाटसमेत गरिसकेका छन् ।

कोरियामा मौसमी कामदार पठाउने विषयमा श्रम मन्त्रालयले समेत प्रक्रिया अगाडि बढाएको छ । कानुनी प्रक्रिया पूरा भएपछि नेपाल र कोरियाका स्थानीय सरकारबीच एमओयू गरी श्रमिक पठाउने श्रम, रोजगार तथा सामाजिक सुरक्षामन्त्री कृष्णकुमार श्रेष्ठले जानकारी दिए ।

नेपाल सरकारका स्थानीय तथा कोरिया सरकारका स्थानीय निकायबीच समझदारी भएपछि मात्र कामदार पठाइने श्रममन्त्री श्रेष्ठले बताए । ‘कोरियामा मौसमी कामदार पठाउन समय लाग्छ । आधिकारिक निर्णय गर्न बाँकी छ । हालसम्म नेपालका कुनै पनि नगरपालिकाले आधिकारिक सम्झौता गरेका छैनन्’, उनले भने, ‘सरकारले सबै प्रक्रिया पूरा गरेर मात्र कामदार पठाउँछ । हचुवाका भरमा कामदार पठाउनेभन्दा पनि मौसमी श्रमिक पठाउन नीति बनाउनुपर्नेछ ।’

रोजगारीको अवसर भए पनि श्रमिकको सुरक्षालाई मध्यनजर गरेर मात्र मौसमी कामदार पठाइने उनको भनाइ छ ।

मौसमी कामदार पठाउने प्रक्रिया ?

कोरिया मौसमी रोजगारीमा जाने कामदारले नौ महिनासम्म काम गर्न पाउँछन् । उनीहरूको ६ र ९ महिनाको करारअवधि हुन्छ । मासिक कमाइ भने न्यूनतम साढे २ लाखमाथि हुने श्रम मन्त्रालयले जनाएको छ ।

मौसमी कामदारले करारअवधिको रोजगार बीमा, स्वास्थ्य सुविधा र ईपीएसमार्फत जाने कामदारले जस्तै पाउने गरी कोरियाको सम्बन्धित निकायसँग छलफल भएको श्रम मन्त्रालयले जनाएको छ ।

श्रम मन्त्रालयका अनुसार कोरिया जाने मौसमी कामदारले आधारभूत कोरियाली भाषाको ज्ञान भने हासिल गरेको हुनुपर्छ । मौसमी कामदारको खर्च भने रोजगारदाताले ब्यहोर्नुपर्ने प्रस्ताव गरेको श्रम मन्त्रालयले जनाएको छ ।

कोरियाले सन् २०२२ मा नेपालसहित थाइल्यान्ड, कम्बोडिया, भियतनामबाट मौसमी कामदार लैजाने भएको छ । कोरियामा घट्दो जनसंख्या, बुढ्यौलीपन, युवाहरूको कृषिप्रतिको घट्दो आकर्षणका कारण कृषिक्षेत्रमा कामदारको चरम अभाव हुन थालेको छ । जसका कारण कोरियाले मौमसी कामदार लिन थालेको छ ।

प्रकाशित मिति: आइतबार, चैत १३, २०७८ १७:३२