उत्तर कोरियाको मिसाइल प्रक्षेपणपछि जापान र दक्षिण कोरियाका विदेशमन्त्रीबीच फोन वार्ता

उत्तर कोरियाको मिसाइल प्रक्षेपणपछि जापान र दक्षिण कोरियाका विदेशमन्त्रीबीच फोन वार्ता

A+ A A-

जापानी विदेशमन्त्री योशिमासा हयाशी र उनका दक्षिण कोरियाली समकक्षी चुङ इउई-योङबीच टेलिफोन वार्ता भएको छ । वार्तामा उत्तर कोरियाको अन्तरमहादेशीय क्षेप्यास्त्र प्रक्षेपणबारे छलफल गरेको जापानी विदेश मन्त्रालयले जनाएको छ ।

'परराष्ट्र मन्त्रीहरूले उत्तर कोरियाद्वारा अन्तरमहादेशीय क्षेप्यास्त्र प्रक्षेपणको निन्दा गर्नुभएको छ । विशेष गरी पछिल्लो प्रक्षेपणबारे समान धारणा बनाउँदै उहाँहरूले उत्तर कोरियाको क्षेप्यास्त्र र आणविक कार्यक्रमको तीव्रता विश्व समुदायको लागि एक स्पष्ट र गम्भीर चुनौती भएको बताउनुभएको छ,' विज्ञप्तिमा भनिएको छ ।

द्विपक्षीय र त्रिपक्षीय सहयोगको पुन: पुष्टि गर्दै संयुक्त राज्य अमेरिका, संयुक्त राष्ट्रसंघ सुरक्षा परिषद्को प्रस्तावअनुसार उत्तर कोरियाको सम्पूर्ण आणविक निःशस्त्रीकरणका लागि संयुक्त राष्ट्रसंघ सुरक्षा परिषद् समक्ष आग्रह गरिएको विज्ञप्तिमा जनाइएको छ ।

उत्तर कोरियाले बिहीबार बिहान ह्वासोङ– १७ इन्टरकन्टिनेन्टल ब्यालेस्टिक मिसाइल (ICBM) परीक्षण गरेको पुष्टि गरेको छ । लामो दूरीको ब्यालेस्टिक मिसाइल जापानको सागरतर्फ प्रक्षेपण गरिएको थियो ।

क्षेप्यास्त्र करिब ६७० माइल उडेको र त्यसको अधिकतम उचाई ३,८५० माइल भन्दा बढी रहेको दक्षिण कोरियाली सेनाले पुष्टि गरेको छ ।

यो वर्ष उत्तर कोरियाले गरेको ११औँ मिसाइल प्रक्षेपण हो । फेब्रुअरी २७ र मार्च ५ मा उत्तर कोरियाले टोही उपग्रह परियोजनाको भागको रूपमा ब्यालेस्टिक मिसाइल परीक्षण गरेको हो ।

सियोल र वाशिंगटनले प्योङयाङले स्याटेलाइट प्रणाली विकास गर्ने बहानामा नयाँ ह्वासोङ-१७ अन्तरमहादेशीय ब्यालिस्टिक मिसाइल परीक्षण गरेको आरोप लगाएका छन् ।

प्रकाशित मिति: शुक्रबार, चैत ११, २०७८ १६:२९