गुल्मीमा एमालेविरुद्ध तीन दल एकठाउँ, १२ पालिकामा कुन पार्टीबाट को-को छन् आकांक्षी ?

गुल्मीमा एमालेविरुद्ध तीन दल एकठाउँ, १२ पालिकामा कुन पार्टीबाट को-को छन् आकांक्षी ?

A+ A A-

स्थानीय तहको चुनावलाई मध्यनजर गरेर गुल्मीमा सत्ता गठबन्धका नेताहरूले पटक-पटक छलफल गरिरहेका छन् । २०७४ सालको चुनावका आधारमा गुल्मीमा अन्य पार्टीको तुलनामा एमालेको मत निकै धेरै छ । १२ वटा स्थानीय तहमध्ये सातवटा स्थानीय तहमा प्रमुख र १० वटा स्थानीय तहमा उपप्रमुख एमालेले जितेको थियाे । प्रमुखमा नजितेका पाँचवटा स्थानीय तहमा एमालेका उम्मेदवारले दोस्रो मत ल्याएका थिए ।

६३ प्रतिशत वडाअध्यक्ष एमालेकै छन् । ९३ वडामध्ये ५९ वटामा उसले जितेको छ । हरेक निर्वाचनमा जनमत फरक त पर्छ नै । परम्परागत भोटमा पनि एमाले विभाजन भएको अवस्थामा केही भोट भने काटिने सहजै अनुमान गर्न सकिन्छ ।एमालेकी तत्कालीन नेतृ रामकुमारी झाँक्री अहिले एकीकृत समाजवादीमा छन् भने स्थानीयस्तरमा प्रभाव पार्ने नेताहरूले पनि एमाले छोडेका कारण परम्परागत भोटमा असर पर्ने आकलन सबै पार्टीका स्थानीय नेताहरूले गरेको पाइन्छ ।

२०७४ को मतपरिणाम
पार्टी	विजेता अध्यक्ष/प्रमुख	दोस्रो हुने अध्यक्ष/प्रमुख	उपाध्यक्ष/उपप्रमुख	वडाअध्यक्ष
कांग्रेस	४	६	२	२९
नेकपा एमाले	७	५	१०	५९
माओवादी	१	१		४
अन्य (जनमोर्चा)				१

तर, जिल्लाको राजनीतिमा प्रभुत्व जमाउने प्रदीप ज्ञवाली र गोकर्ण विष्ट एक ठाउँमा रहेका छन् । सुरुमा गोकर्ण विष्टले माधव नेपाललाई साथ दिँदा विष्टसँगै देखिएका अधिकांश नेताहरू अन्तिममा उनी एमालेमै बसेपछि उनीहरू पनि एमालेमै छन् । भलै एमालेमा फर्किएका नेताको रूपमा व्यवहार हुने गरेकोमा उनीहरूको चिन्ता रहेको छ ।

यस्तो अवस्थामा गुल्मीमा अहिले सत्तामा रहेका दलहरू गठबन्धन गर्ने प्रयासमा लागेका छन् । मुख्यत: कांग्रेस र एमालेबीचको प्रतिस्पर्धामा समाजवादी र माओवादीसँग गरिने गठबन्धनले नतिजा उल्ट्याउन सहयोग पुग्ने नेताहरूले बताएका छन् ।

माओवादीका नेता बुद्धि जीसीले सत्ता गठबन्धन एक ठाउँमा उभिने गरी निरन्तर बैठकहरू गरिएको र छलफल सकारात्मक रहेको बताए । 'हामीले पार्टीको तर्फबाट गठबन्धन गर्ने निर्णय ३ चैतमा नै गरेका छौँ, यसलाई समयमै टुंग्याउनका लागि कार्यदल पनि बनाइएको छ', जिसीले शिलापत्रसँग भने, 'छलफल निकै सकारात्मक छ, हामी गठबन्धन नै गरेर अघि बढ्न सहमत पनि छौँ, परिआए सिङ्गल लड्न पनि तयार नै हो ।'

नेपाली कांग्रेसका जिल्ला सचिव भगत खड्काले पनि अहिले निरन्तर छलफल गरिरहेको र गठबन्धन गरेर जानुपर्छ भन्नेमा धारणा मिलेको बताएका छन् । 'हाम्रो काम निर्वाचनमा अधिकतम नतिजा निकाल्ने हो । कसरी अधिकतम नतिजा निकाल्न सकिन्छ, नेता कार्यकर्ताको भावनाअनुसार नै काम हुन्छ', खड्काले भने ।

कांग्रेस, समाजवादी र माओवादी एक ठाउमा उभिँदा एमाले भने राप्रपा र जनमोर्चाको साथ लिने प्रयासमा रहेको छ । यी दललाई केही वडाध्यक्ष दिएर पनि एमालेले मत तान्न सक्ने देखिन्छ ।

१२ स्थानीय तहमा को-को छन् आकांक्षी ?

गठबन्धन गर्दा अहिलेसम्म कुन स्थानीय तहमा कुन पार्टीलाई दिने भन्ने विषयमा सहमति भएको छैन । सम्बन्धित स्थानीय तहहरूमा आफूले टिकट पाउनका लागि स्थानीय नेताहरू लागिपरेका छन् । विशेष गरी एमाले र कांग्रेसमा आकांक्षीहरूको संख्या धेरै रहेको छ ।

समाजवादी र माओवादीभित्र जिल्लाका प्रभावशाली नेता भएका क्षेत्रमा उनीहरूकाे दाबी छ । माओवादीको मुख्यत: चन्द्रकोट, मदाने, मालिका र धुर्कोट पालिकाको अध्यक्षमा दाबी रहेको छ भने समाजवादीको धर्कोट, मुसिकोट तथा छत्रकोटमा आकांक्षा देखिएको छ ।

यहाँ प्रमुख तथा अध्यक्षमा आकांक्षी देखिएका पात्रहरूको चर्चा गरेका गरिएकाे छ ।

रेसुङ्गा नगरपालिका

जिल्ला सदरमुकाम रहेको रेसुङ्गा नगरपालिकामा कांग्रेसका तर्फबाट पार्टी सभापति खिलध्वज पन्थीको बलियाे दाबी देखिएको छ । त्यस्तै, महाधिवेशन प्रतिनिधि तथा उद्योग वाणिज्य संघ गुल्मीका पूर्वअध्यक्ष श्रीप्रसाद बलामीको पनि दाबी छ । त्यस्तै, रेसुङ्गा नगरपालिकाबाट नै महाधिवेशन प्रतिनिधि राजेन्द्र श्रेष्ठले आकांक्षा राखेका छन् ।

रेसुङ्गामा अघिल्लो पटक अनपेक्षित नतिजा आएको कांग्रेसको बुझाइ रहेको छ । अघिल्लो निर्वाचनमा १४ वटा वडामध्ये आठवटा वडा जितेर पनि प्रमुख, उपप्रमुख दुवै गमाएको थियो भने प्रमुखमा मतान्तर १८६ मतको मात्रै रहेको थियो ।खिलध्वजले गुल्मी क्षेत्र नम्बर २ बाट संघीय प्रतिनिधिसभाका उम्मेदवारको रूपमा हेरिए पनि अहिले रेसुङ्गा नगरपालिकाकाे मेयरमा आकांक्षा राखेको जिल्लाका नेताहरूले बताएका छन् ।

एमालेले भने कांग्रेससँग प्रतिस्पर्धा गर्न अहिलेकै मेयर डिल्लीराम भुसाल उपयुक्त हुने आकलन गरेको छ । अघिल्लो निर्वाचनका क्रममा कांग्रेसका हेभिवेट मानिएका भुवनप्रसाद श्रेष्ठलाई हराएको र स्थानीय तहमा अन्य नेताको तुलनामा लोकप्रिय भएको स्थानीय नेताहरूको दाबी रहेको छ । तर, एमालेबाट गणेश श्रीपालीले पनि आकांक्षा राखेका छन् । उनी पार्टीकाे जिल्ला सचिवसमेत हुन् ।

मुसिकोट नगरपालिका

जिल्लाको अर्को नगरपालिका मुसिकोटमा एमालेका तर्फबाट सोमनाथ सापकोटा र प्रकाश काफ्लेले दाबी गरेका छन् । पुराना नेता सापकोटा अहिलेका नगरप्रमुख हुन् भने पार्टीका पूर्वसचिव पनि हुन् । काफ्ले मुसिकोट नगरपालिका पार्टी अध्यक्ष हुन् । एक कार्यकाल सापकोटाले चलाइसकेका कारण आफूले अवसर पाउनुपर्ने माग काफ्लेले गरेका छन् । एमालेको तर्फबाट नगर अध्यक्ष तथा वडाध्यक्ष जीवन खरेलको पनि दाबी छ ।

कांग्रेसका तर्फबाट हरिनारायण सापकोटा र विष्णु सापकोटाको मुख्य दाबी रहेको छ । हरिनारायण पार्टीका पूर्वसचिव हुन् भने विष्णु पार्टी लुम्बिनी प्रदेश सदस्य, महासमिति सदस्य, महिला संघकी पूर्वअध्यक्ष तथा निर्वतमान जिल्ला सचिव हुन् । इच्छा देखाएको खण्डमा डा. दामोदर भुसालले टिकट पाउन सक्ने स्थानीय नेताहरूले बताएका छन् । उनी पार्टीको पूर्वसचिवसमेत हुन् भने महाधिवेशन प्रतिनिधि हुन् ।

यो नगरपालिकामा एकीकृत समाजवादीले पनि नगर प्रमुखमा उठाउने तयारी गरेको छ । यो पार्टीका तर्फबाट श्रीराम महत बलिया दाबेदार मानिएका छन् । मुसिकोटमा २०७४ को निर्वाचनमा वडा १ बाहेकका सबै वडामा र प्रमुख/उपप्रमुख एमालेले जितेको थियो ।

चन्द्रकोट गाउँपालिका

२०७४ को निर्वाचनमा ४ वडाध्यक्षसहित उपाध्यक्षमा जितेको एमालेले डा. सागर न्यौपानलेलाई अघि सार्ने देखिएको छ । न्यौपाने जीवराज आश्रितका छोरा हुन् । चेतन सापकोटाकाे पनि दाबी रहेको छ । अघिल्लो निर्वाचनमा अध्यक्षसहित २ वटा वडामा जितेको कांग्रेसबाट पालिका अध्यक्षको उम्मेदवारको रूपमा दोर्ण खत्रीको चर्चा रहेको छ । उनी पार्टीका महासमिति सदस्य हुन् भने अहिलेका पालिका प्रमुख पनि हुन् ।

यस गाउँपालिकामा माओवादीका पार्टी प्रदेश सदस्यसमेत रहेका युवराज पाण्डेको दाबी छ । अघिल्लो निर्वाचनमा माओवादीले पनि दुईवटा वडा जितेको थियो ।

छत्रकोट गाउँपालिका

एमाले : पिताम्वर अर्याल र नर्मदा भण्डारीको दाबी प्रमुख रहेको छ । अर्याल जिल्ला कमिटी सदस्य हुन् भने भण्डारी हालकी पालिका उपाध्यक्ष हुन् ।

कांग्रेस : अनन्त पौडेल र मोति भण्डारीको प्रमुख दाबी रहेको छ । पौडेल पार्टी जिल्ला उपसभापति र महाधिवेशन प्रतिनिधि हुन् भने भण्डारी नेविसंघका पूर्वकेन्द्रीय सदस्य र पार्टीका महाधिवेशन प्रतिनिधि हुन् ।

एकीकृत समाजवादी : हिमाल थापा

मदाने गाउँपालिका

अघिल्लो निर्वाचनमा अध्यक्ष/उपाध्यक्षसहित पालिकाको एउटाबाहेक सबै वडामा विजयी भएकोमा यसपटक एमालेका तर्फबाट प्रेम केसीको दाबी देखिएको छ । उनी पार्टीको पालिका अध्यक्ष पनि हुन् । एमालेको तर्फबाट दलबहादुर केसीको पनि दाबी रहेको छ भने सुशील भट्टराईले पनि टिकट पाउन सक्ने बताएका छन् । पार्टी सचिव गोकर्ण विष्टसँग निकट मानिने भट्टराई सक्रिय रूपमा राजनीतिमा नलाग्ने संकेत गरेको कारण अन्यको दाबी देखिएको छ।

कांग्रेसको तर्फबाट भने महेन्द्र कुवँर, सुशीला भुसाल र काशीबहादुर बोहोराको दाबी छ । कुँवर पार्टी पालिका सभापति हुन् भने अघिल्लो निर्वाचनमा पनि उम्मेदवार रहेका थिए । भुसाल महाधिवेशन प्रतिनिधि हुन् भने अघिल्लो निर्वाचनमा उपाध्यक्षमा उम्मेदवारी दिएकी थिइन् । त्यस्तै बोहोरा पार्टीको तर्फबाट निर्वाचित एक मात्रै वडाअध्यक्ष हुन् ।

यस पालिकामा माओवादीका तर्फबाट बेगम चन्द र बुद्धि जीसीको दाबी छ । चन्द पार्टीका प्रदेश सदस्य हुन् भने जीसी जिल्ला संयोजक ।

धुर्कोट गाउँपालिका

कांग्रेससँगको गठबन्धन गरेर अघिल्लो निर्वाचनमा माओवादीको तर्फबाट जितेको जिल्लाको एउटा मात्रै पालिका हो धुर्कोट । यस पालिकामा माओवादीले फेरि पनि हालका पालिका अध्यक्ष भूपाल पोख्रेललाई अघि सार्ने तयारी गरेको छ । एकीकृत समाजवादीले नरेश भण्डारीलाई अघि सार्ने देखिएको छ ।

अघिल्लो निर्वाचनमा माओवादीलाई छोडेको कारण पनि यसपटक गठबन्धन गर्दा पनि पालिका अध्यक्ष कांग्रेसको भागमा रहनुपर्ने माग कांग्रेस नेताको छ । कांग्रेसको तर्फबाट हालका पालिका उपाध्यक्ष शिव केसी र कांग्रेस महाधिवेशन प्रतिनिधि तथा नेविसंघ पूर्वउपाध्यक्ष महेन्द्र भण्डारीको दाबी छ ।

एमालेको तर्फबाट कृष्ण घिमिरे र नारायण पोखरेलको दाबी छ ।

गुल्मीदरबार गाउँपालिका

२०७४ को निर्वाचनमा कांग्रेसले जितेको यो पालिकामा यसपटक हरिप्रसाद अर्याल र प्रेम पुनले दाबी गरेका छन् । एमालेको तर्फबाट पार्टीका जिल्ला कमिटी सदस्य कृष्ण भुसालको प्रमुख दाबी छ भने पुराना नेता विष्णु गौतम र युवानेता रवीन्द्रजंग रायमाझीको पनि दाबी छ ।

इस्मा गाउँपालिका

एमाले सचिव गोकर्ण विष्टको गृहपालिका इस्मामा एमालेको तर्फबाट युवा नेता जिल्ला कमिटी सदस्य हीरा एसी, पार्टीका पुराना नेता नारायण पैयानीको दाबी रहेको बताइएको छ ।

त्यस्तै, कांग्रेसले युवा नेता भगतसिंह खड्कालाई अघि बढाउदा सहज हुने आकलन गरेको छ । उनी पार्टीका जिल्ला सचिवसमेत हुन् । यो पालिकामा कांग्रेसको तर्फबाट आकांक्षी बढी देखिएका छन् । लालबहादुर कुँवर, शेरबहादुर कुवर र चन्द्रबहादुर महतको पनि दाबी छ ।

कालिगण्डकी गाउँपालिका

कांग्रेस : बेदबहादुर थापा, जगदिश भट्टराईको प्रमुख दाबी देखिएको छ । थापा हालमा पालिका अध्यक्ष तथा महाधिवेशन प्रतिनिधि हुन् भने भट्टराई जिल्ला पार्टी सचिव हुन् ।

एमाले : रामजी ढकाल र पुराना नेता टीकाराम सापकोटाको दाबी रहेको छ ।

मालिका गाउँपालिका

एमाले : ओमबहादुर कार्की र रितबहादुर थापाको चर्चा छ । युवानेता कार्की पार्टीको पालिका अध्यक्ष हुन् भने थापा २०७४ निर्वाचनमा पालिका अध्यक्षमा निर्वाचित भएका थिए ।

कांग्रेस : पार्टीको पालिका सभापति र उपसभापति क्रमश: उपेन्द्र अर्याल र दीपक भण्डारीको दाबी देखिएको छ । यो पालिकामा माओवादीको तर्फबाट देवीराम अर्यालको नाम चर्चामा छ ।

रुरुक्षेत्र गाउँपालिका

एउटाबाहेक सबै वडाअध्यक्षसहित पालिका अध्यक्ष र उपाध्यक्ष जितेको रुरुक्षेत्र गाउँपालिका अध्यक्षको उम्मेदवार बन्न एमालेको तर्फबाट हिमाल श्रेष्ठ, नीलकण्ठ गौतमको आकांक्षा देखिएको छ । श्रेष्ठ जिल्ला कमिटी सदस्य हुन् भने गौतम युवानेता हुन् ।

यस क्षेत्रमा माओवादीको तर्फबाट यदु ज्ञवालीको नाम चर्चामा छ ।

सत्यावती गाउँपालिका

सत्यवती गाउँपालिका एमालेको तर्फबाट पुराना नेता टीकाराण पाण्डे र व्यवसायी श्रीप्रसाद पाण्डेका साथै युवराज न्यौपानेको नाम चर्चामा छ । कांग्रेसको तर्फबाट भने पारिश्व ढकालको नाम चर्चामा छ । उनी कांग्रेस प्रदेश निर्वाचन क्षेत्रमा क्षेत्रीय सभापति पनि हुन् ।

प्रकाशित मिति: बिहीबार, चैत १०, २०७८ ०६:२०