भिजिट भिसामा यूएई पुगेर उतै लुकेका नेपाली पक्राउ पर्न थाले

A+ A A-

रोजगारीको प्रलोभनमा भिजिट भिसामा यूएई पुगेका नेपाली भिसाअवधि सकिए पनि स्वदेश नफर्किएपछि पक्राउ पर्न थालेका छन् ।

हाल, यूएईमा भिजिट भिसामा पुगेका ५० हजारभन्दा धेरै नेपाली काम खोज्दै बसेको यूएईस्थित नेपाली दूतावासले जनाएको छ । भिसाको म्याद सकिए पनि स्वदेश नफर्किएका नेपालीहरूलाई यूएई प्रहरीले पक्राउ गर्न थालेको सूचना आएको दूतावासले जनाएको छ ।

दूतावासका अनुसार ३० जनाभन्दा बढी नेपालीलाई यूएईको अध्यागमन प्रहरीले पक्राउ गरेको छ । कामको खोजीमा यहाँका शहरमा घुम्ने र अलपत्र पर्न थालेपछि उनीहरूलाई प्रहरीले समाउन थालेको दूतावासले जनाएको छ ।

भिजिट भिसामा आएका नेपालीहरू काम नपाएपछि अलपत्र परेकाे र उनीहरूको अवस्था नाजुक बन्दै गएको दूतावासका कर्मचारीहरूले जानकारी दिएका छन् ।

रोजगारीको प्रलोभनमा भिजिट भिसामा आएका पुरुषभन्दा महिलाहरूलाई धेरै जोखिम हुने गरेको र उनीहरू जोखिम मोलेर काम खोज्नुपर्ने बाध्यतामा रहेको दूतावासकी श्रम सहचारी निर्मला थापाले जानकारी दिइन् । दूतावासले भिसाको म्याद सकिएका नेपालीलाई स्वदेश फर्किन आग्रह गदै आएको उनले बताइन् ।

यूएईको अध्यागमन कानुनमा भिजिट भिसामा गएकाहरू ९० दिनमा स्वदेश नफर्किए प्रति–दिन १ सय २० दिराम जरिवाना तिर्नुपर्ने व्यवस्था छ । भिजिट भिसामा गएका कतिपय नेपालीहरूको भिसाको म्याद सकिएको र उनीहरू जरिवाना नतिरी स्वदेश फर्किन नपाउने अवस्थामा रहेको दूतावासले जनाएको छ ।

दूतावासका अनुसार गत मंसिरयता ४० हजारभन्दा धेरै महिला भिजिट भिसामा यूएई आएका छन् । उनीहरूमध्ये धेरै रोजगारी नपाएपछि नेपालीहरूको सहयोगमा बसेका छन् । दूतावासका अनुसार यूएई भिजिट भिसामा आएका करिब ५० हजार महिला–पुरुष अहिले पनि रोजगारीको खोजीमा छन् ।

दुई महिनाअघि नै भिजिट भिसामा युएई पुगेका करिब ३० हजार नेपालीहरू अलपत्र अवस्थामा बसेको सूचना आएको दूतावासका एक कर्मचारीले जानकारी दिए । दूतावासले भिजिट भिसामा आई अलपत्र परेका नेपालीहरूकाे उद्धार गर्ने आर्थिक स्रोत नभएको बताउँदै आएको छ ।

सन् २०२१ मा रोजगारीको प्रलोभनमा परी भिजिट भिसामा एजेन्ट, म्यानपावर कम्पनी र ट्राभल एजेन्सीमार्फत ७० हजार नेपाली यूएई गएको अध्यागमन विभागको तथ्यांक छ । तीन वर्षको अवधिमा करिब एक लाख ६० हजार नेपालीहरू भिजिट भिसामा यूएई पुगेका छन् ।

प्रकाशित मिति: बुधबार, चैत ९, २०७८ १४:११