बुटवलमा ५ करोड ३२ लाखको लगानीमा १४ बिघामा खुलामञ्च बन्दै

A+ A A-

बुटवलमा यस क्षेत्रकै पहिलो र आधुनिक सुविधासहितको व्यवस्थित खुलामञ्च निर्माणको काम सुरु भएको छ । बुटवल उपमहानगरपालिकाले वडा नं. ११ देविनगरमा रहेको करीब १४ बिघा जग्गालाई संरक्षण गर्दै खुलामञ्च बनाउन लागेको हो ।

एक समारोहबीच उपमहानगर प्रमुख शिवराज सुवेदीले खुलामञ्चको शिलान्यास गरे । उनले सार्वजनिक जग्गाको संरक्षण गर्दै त्यसको बहुउपयोग गर्ने गरी गुरुयोजना बनाएर दिगो विकासका काम अगाडि बढाइएको बताए । उपमहानगरले यसबीचमा करीब २ सय बिघा जग्गा संरक्षण गर्दै सार्वजनिक हितमा ल्याएको छ ।

उपमहानगरले खुलामञ्च निर्माणलाई बहुवर्षे योजनाका रूपमा अगाडि बढाएको छ । बुटवलको दीर्घकालीन गुरुयोजनामा परिकल्पना गरिएअनुरुपको यो एउटा खुलामञ्च हो । सुरुमै जग्गा संरक्षण, तारबार र व्यवस्थित बाउण्ड्री निर्माणको काम अगाडि बढाइने र बाँकी कामलाई चरणबद्ध रुपमा अगाडि बढाइने सुवेदीले जानकारी दिए ।

खुलामञ्चमा सार्वजनिक कार्यक्रम गर्न, सभा समारोह गर्न, सम्मेलन गर्न मात्र नभई विभिन्न आपतकालीन अवस्थाको उद्धारस्थलका रूपमा समेत उपयोग गर्न सकिने गरी गुरुयोजनामा समेटिएको उपमहानगरका अनुगमन समितिका संयोजक समेत रहेकी उपप्रमुख गुमादेवी आचार्यले बताइन् ।

खुलामञ्च निर्माणका लागि शिवशक्ति कन्स्ट्रक्सन कम्पनी प्रालिले ५ करोड ३२ लाख लाख ३९ हजार ५ सय १३ रुपैयाँ बराबरमा ठेक्का सम्झौता गरेको उपमहानगरका सहरी विकास तथा योजना महाशाखा प्रमुख वरिष्ठ इन्जीनियर सुमन श्रेष्ठले जानकारी दिए । उपमहानगरले भने खुलामञ्च निर्माणका लागि ५ करोड ५१ लाख ८८ हजार रुपैयाँ लागत अनुमान गरेको थियो । गत फागुन २६ गते कार्यादेश पाएको निर्माण कम्पनीलाई आगामी २०८० को जेठ १५ सम्ममा काम सक्ने सम्झौता भएको छ ।

उपमहानगरका वरिष्ठ इन्जिनियर तथा सहरी विकास योजना महाशाखा प्रमुख सुमन श्रेष्ठ र अर्का वरिष्ठ इन्जिनियर गौतम रौनियार, इन्जीनीयर रुक्मागत बस्याल तथा डीपीआर बनाउने काममा खटिएकी आर्किटेक इन्जिनियर प्रभा पाण्डेसहितको प्राविधिकहरूको टोलीले खुलामञ्चको गुरुयोजनामा सुझाव संकलन गरेको थियो ।

यस्तो बन्ने छ बुटवल खुलामञ्च

करिब १४ बिघा क्षेत्रफलमा खुलामञ्च बन्ने र त्यहाँ १ लाख जना एकै पटक जम्मा हुन मिल्ने गरी खुला मैदान बनाइने छ । मैदानलाई विशेष तारजाली र हरियालीले सजाइने छ । मैदान प्रवेश र निकासका अलग अलग द्वार र आपतकालीन द्वार बन्नेछन् ।

तारजाली पनि पर्यावरणमैत्री र विशेष हुनेछ । खुलामञ्चसम्म पुग्न धेरैतिरबाट पहुँच मार्ग बन्नेछन् । बुटवल चक्रपथले समेत खुलामञ्चलाई जोड्नेछ ।

एकैपटक करिब ८ सय जनाले प्रयोग गर्न मिल्ने गरी सार्वजनिक शौचालय बनाइने छ । ८ लाख ९३ हजार ९ सय ७७ वर्गमिटर क्षेत्रफलमा खुलामञ्च र बाँकी क्षेत्रमा विशेष मञ्च, मञ्चसँगै पछाडि भागामा आठ वटा अलग-अलग प्रयोजनका कोठा, तीन तहका पार्किङ, प्राथमिक उपचार कक्ष बन्नेछन् ।

खुलामञ्चको दक्षिणमा तिनाउ कोरिडोर रहने छ । करिडोर र खुलामञ्चको बीचको भागमा हरियालीसहितको गार्डेन, फुटपाथ रहने छ । खानेपानीका फिल्टरयुक्त ट्यांकीसमेत विभिन्न ठाउँमा राखिनेछ । बुटवलका लागि भविष्यमा बहुउपयोग गर्न मिल्ने र शौन्दर्यता झल्काउने विशेष क्षेत्रका रूपमा खुलामञ्च निर्माण हुने इन्जिनियरहरूको बताएका छन् ।

१ लाखभन्दा धेरै जना अट्न सक्नेगरी खुला क्षेत्रको चौर रहने छ भने त्यतिको संख्यामा आउने मानिसहरूले प्रयोग गर्ने सवारी साधनलाई समेत तीन तहमा पार्किङ र आवागमनका विशेष रुट बनाइने भएको छ ।

भीआईपीले प्रयोग गर्ने सवारीसहित १६० वटा चार पाङ्ग्रे र करिब ६ सय जति दुई पाङ्ग्रे साना सवारीलाई पार्किङ गर्न मिल्नेछ । सार्वजनिक बस तथा सवारीहरूलाई पनि खुलामञ्चको दुबैतिरबाट आवागमन मिल्ने गरी रुटको व्यवस्था मिलाइने भएको छ ।

प्रकाशित मिति: मंगलबार, चैत ८, २०७८ २०:५९