भारतीय प्रहरीले चासाे नदिँदा दास हत्याकाण्डका अभियुक्त पक्राउ गर्न मुस्किल, फेसबुकबाट धम्की

भारतीय प्रहरीले चासाे नदिँदा दास हत्याकाण्डका अभियुक्त पक्राउ गर्न मुस्किल, फेसबुकबाट धम्की

A+ A A-

कैलालीका अरुण दासको विभत्स हत्या भएको चार महिना बित्दा पनि हत्यारा पक्राउ पर्न सकेका छैनन् । जानकी गाउँपालिका–९ का २५ वर्षीय दासको ३ पुसमा सोही गाउँपालिकाको अमरावती सामुदायिक वनमा रुखमा बाँधेर टाउको छिनालेको अवस्थामा शव फेला परेको थियो ।

जिल्ला प्रहरी कार्यालय कैलालीले दास हत्याका आरोपीहरू चार–पाँच जना भएको र सबैको पहिचान भइसकेको बताए पनि पक्राउ गर्न भने सकेको छैन । हत्यामा संलग्नहरू भारत भागेका कारण पक्राउ गर्न नसकेको प्रहरीले बताएको छ । दासको हत्या उनकै साथीहरूले गरेको खुलेको प्रहरीले जनाएकाे छ ।

हत्यामा संलग्नहरू लागुऔषध प्रयोगकर्ता भएको प्रहरीको भनाइ छ । हत्यापछि दुई युवकबीच भएको मोबाइल फोन रेकर्डसमेत सामाजिक सञ्जालमार्फत सार्वजनिक भएको थियो । जसमा मनोज नाम गरेका एक युवाले भनेका थिए, ‘घाँटी अलग छ । शरीर अलग छ । एक–दुई दिनमा तपाईं थाहा पाउनुहुन्छ ।’ उनले आफू नेपालगञ्जको रुपैडिया नाकाहुँदै भारत भागिसकेको पनि बताएका थिए ।

जिल्ला प्रहरी कार्यालय कैलालीका प्रहरी प्रमुख प्रहरी उपरीक्षक (एसपी) विश्व अधिकारीले हत्या आरोपका सबै अभियुक्त भारतमा लुकेका कारण पक्राउ गर्न कठिन भएको बताए । अभियुक्त खोज्न नेपाल प्रहरीले भारतीय प्रहरीसँग समन्वय गरिरहेको उनले बताए ।

‘दास हत्यामा संलग्न सबै भारतमा लुकेका छन् । हामीले उनीहरूको खोजी जारी राखेका छौँ । प्राविधिक रूपमा उनीहरूको लोकेनश खोज्न कठिन भएको छ', एसपी अधिकारीले भने ।

अनुसन्धानमा खटिएका अर्का प्रहरी अधिकारी भने भारतीय प्रहरीको सहयोग नपाउँदा पक्राउ गर्न कठिन भएको बताउँछन् । ‘हाम्रो लेवलबाट हामीले भारतीय प्रहरीसँग सहयोग मागे पनि त्यसलाई गम्भीर रूपमा लिएको देखिँदैन', ती अधिकारी भन्छन्, ‘यस्तो गम्भीर केसमा प्रहरी प्रधान कार्यालयले पनि भारतीय प्रहरीसँग आफ्नो तरिकाले कुरा गरेको भए पक्राउ गर्न सजिलाे हुन्थ्याे ।’

सुपुर्दगी सन्धि नहुँदा एक देशका प्रहरीले अर्को देशका नागरिकलाई औपचारिक रूपमा पक्राउ गरेर बुझाउन मिल्दैन । तर, अनौपचारिक रूपमा एकअर्का देशका अपराधमा संलग्न व्यक्तिलाई पक्राउ गरेर सीमा क्षेत्रसम्म पुर्‍याउने काम भने दुवै देशका प्रहरीबाट हुँदै आएको छ ।

कैलाली प्रहरीले एक जना प्रहरी नायब निरीक्षक (सई) को कमाण्डमा प्रहरी टोली दिल्लीहुँदै मुम्बई समेत पठाइसकेको छ । हत्या आराेपीहरू भारतमा रहेकाे र उनीहरूले छद्म नामबाट फेसबुक अकाउन्ट खोलेर घटनाबारे विभिन्न कुराहरू गरिरहेकाे एसपी अधिकारीले बताए ।

एके नामको उक्त छद्म फेसबुक अकाउन्टबाट हत्यालगत्तै अडियो सार्वजनिक गर्नेलाई समेत मार्ने धम्की दिएको प्रहरीको भनाइ छ । उक्त भिडियो पनि प्रहरीले प्रमाणको रूपमा रोखेको छ । उक्त भिडियोमा हत्या आराेपी चारै जना सँगै देखिएको प्रहरीले जनाएकाे छ ।

‘भिडियोमा उनीहरूले अश्लील गाली गर्दै ज्यान मार्नेसम्मको धम्की दिएका छन्', एसपी अधिकारी भन्छन्, ‘आफूहरू क्रिमिलन भएको बताएका छन् । हामीले फेसबुक कुन ठाउँबाट चलेको थियो । त्यसको लोकेशन हेर्दैछौँ ।’

प्रकाशित मिति: मंगलबार, चैत ८, २०७८ १२:४७