युक्रेन छाडेका नेपाली स्वदेश फर्किन मानेनन्

A+ A A-

रुस–युक्रेन द्वन्द्वका कारण ५ सय ८१ जना नेपालीहरू पोल्यान्ड, स्लोभाकिया, हंगेरी, रोमानिया र माल्दावा लगायतको देशमा शरण लिन पुगेका थिए । उनीहरूमध्ये १० जना भारत सरकारको सहयोगमा स्वदेश फर्किएका छन् । तर, अन्य ५ सय ७१ नेपालीहरू अहिले पनि पोल्यान्ड, स्लोभाकिया, हंगेरी, रोमानिया, पोचुर्गल, जर्मनी र माल्दावालायतका देशमै बसेका छन् ।

युक्रेन छाडेर ४ सय ६६ जना पोल्यान्ड, ७८ जना स्लोभाकिया, २७ जना रोमानिया र ९ जना हंगेरी पुगेको जर्मनीस्थित नेपाली दूतावासले जनाएको छ । ४० परिवारका सयभन्दा धेरै नेपालीहरूले भने युक्रेन छाडेका छैनन् । उनीहरू रोजगारदाता र त्यहाँका नागरिकको सहयोगमा सुरक्षित नै बसेको दूतावासले जनाएको छ ।

तेस्रो देश छिर्दै

युक्रेन–रुस द्वन्द्वबाट विस्थापित भएका नेपालीहरू सुरक्षित बसोबास र भविष्यका लागि तेस्रो मुलुकतिर समेत जान थालेका छन् । युक्रेनबाट बाहिरिएका ५ सय ७१ जना नेपाली नागरिकले स्वदेश फर्किने इच्छा नदेखाएको र उनीहरू आफैँ युरोपका विभिन्न देश जान थालेको सूचना पाएको जर्मनीस्थित नेपाली दूतावासका राजदूत रामकाजी खड्काले जानकारी दिए । ‘युक्रेन छाडेका नेपालीहरूले स्वदेश फर्किन इच्छा देखाएनन् । उनीहरू युरोपका अन्य देश गएका छन्’, उनले भने ।

ऋण छ कहाँ नेपाल फर्किनु ?

नुवाकोटका समिर कान्छा घिमिरे अध्ययनका लागि ५ महिनाअघि युक्रेन पुगेका थिए । उनले युक्रेन जान ७ लाख रुपैयाँ खर्चिएको र काम सुरु गरेको तेस्रो महिनामै रुसले युक्रेनमाथि आक्रमण गरेपछि बाध्यताले भाग्नु परेको बताए । तर, नेपाल फर्किए उल्टै ऋण थपिने भएकाेले पोल्यान्डमै बस्ने निर्णय गरेकाे उनले बताए ।

‘अहिले म पोल्यान्डमा छु । मलाई नेपाल फर्किनुभन्दा पोल्यान्ड बस्नु उचित लाग्याे', उनले भने ‘नेपाल फर्किए ऋण तिर्ने सक्ने अवस्था छैन ।' युक्रेन छाडेकी भोजपुरकी संगिता राई पनि रोमानिया पुगेकी छन् । उनी १ वर्षअघि पर्यटन भिसामा युक्रेन पुगेर काम गरिरहेकी थिइन् । नेपालबाट युक्रेन आउन ९ लाख रुपैयाँ खर्च भएका कारण तत्काल स्वदेश नफर्किएको उनी बताउँछिन् ।

नेपाल फर्किए पनि फेरि विदेशै जानुपर्ने भएकाले जोखिम मोलेर यतै बसेको राईले बताइन् । ‘नेपालबाट आउँदा लागेको ऋण कोरोनाका कारण लकडाउन हुँदा काम नचलेपछि तिर्न सकिएको थिएन । द्वन्द्व सरु भएपछि भाग्नु पर्‍यो’, उनले भनिन्, ‘नेपाल जाँदा फर्किन समस्या हुन्छ । त्यही भएर केही समय रोमानिया बसेर पैसा कमाएर फर्किने हो ।'

घिमिरे र राई जस्तै ५ सय ७१ जना नेपाली स्वदेश नफर्केर युरोपका अन्य देशमा रोजगारीका लागि छिरेका छन् । रुस–युक्रेन द्वन्द्वका कारण प्रभावित विदेशी नागरिकहरूलाई युरोपका कतिपय देशले केही महिनाका लागि अध्ययन र रोजगारीका लागि बसोबासको अवसर दिने घोषणा गरेका छन् ।

प्रकाशित मिति: मंगलबार, चैत ८, २०७८ ०७:४२