चितवनमा शिक्षकद्वारा विद्यार्थीमाथि यौन दुर्व्यवहार

A+ A A-

आइतबार जिल्ला प्रहरी कार्यालय चितवनमा स्कुल ड्रेसमै केही विद्यार्थीहरू देखिए । माडी नगरपालिका–१ स्थित सोमेश्वर माध्यमिक विद्यालयका ९–१२ पढ्ने छात्रछात्रा न्याय खोज्दै जिल्ला प्रहरी कार्यालय चितवन आइपुगेका हुन् । विद्यालयका लेखा विषयका शिक्षक सुरज लामिछानेले छात्रालाई यौन दुर्व्यवहार गरेको आरोपमा जाहेरी दर्ता गर्न उनीहरू प्रहरी कार्यालय आएका हुन् ।

फागुन २९ मा शिक्षक लामिछानेले विद्यार्थीले झोला नल्याएको भन्दै एक छात्रालाई अश्लील गाली गर्दै ‘तेरा बुबाआमाको झोला किन्ने हैसियत छैन ? नभए मसँग सुत्न पठाइदे’ भनेको विद्यार्थीको आरोप छ ।

विद्यार्थीहरूका अनुसार शिक्षक लामिछानेले पटकपटक द्विअर्थी शब्द बोल्दै यौनहिंसा गर्दै आएका थिए । विद्यार्थीहरूले यस घटनाको प्रतिकार गरे । अघिल्लो आइतबार विद्यार्थीले आरोपित शिक्षकलाई कालोमोसो दले । विद्यालयमा तालाबन्दी गरे ।

शिक्षक लामिछानेले छात्रालाई यौन दुर्व्यवहार गरेको घटना बाहिरिएसँगै सर्वदलीय बैठक बसेर घटना सामसुम पार्न खोजिएपछि आइतबार अभिभावक र विद्यार्थी जिल्ला प्रहरी कार्यालयमा जाहेरी दर्ता गर्न आइपुगेका हुन् ।

कक्षा ९ मा पढ्ने पीडित छात्रा शिक्षक लामिछानेले पटकपटक यौनहिंसा गरेको बताउँछिन् । यसपटक भने ‘अति’ नै भएकाले आफूहरू प्रतिकारमा उत्रेको उनको भनाइ छ । घटना बाहिर आएपछि दुर्व्यवहार गर्ने शिक्षकलाई कारबाहीको पहल गर्नुको साटो घटना सामसुम पार्न खोजेपछि कालोमोसो दलेको उनले सुनाइन् ।

‘हामीलाई त्यो सरले पहिले गरिब भनेर हेला गर्थे । हामी चुपचाप नै बस्थ्यौँ । पछि यही सोझोपनको फाइदा उठाउँदै अश्लील कुरा सुनाइरहन्थे । डेबिट क्रेडिटको उदाहरण दिँदा पनि ब्रा, पेन्टीको दिने गर्नुहुन्थ्यो । हामीलाई धाप मारेजस्तो गरेर ब्रातिर हात घुसार्ने, सुम्सुम्याउन खोज्ने जस्ता व्यवहार गरिरहनुहुन्थ्यो’ पीडित विद्यार्थीले सुनाइन् ।

दुर्व्यवहारको सिलसिला पटकपटक दोहोरिएपछि तीन महिना अगाडि नै उनीहरूले ती शिक्षकविरुद्ध सूचनापाटीमा गुनासो लेखेर हालेका थिए । तर, सुनुवाइ भएन । ‘त्यो सूचनापाटीको चाबी नै खोलिएन । हामीसँग छैन भन्नुहुन्थ्यो । सुनुवाइ भएको भए आज यस्तो हुने थिएन होला’ उनले भनिन् ।

शिक्षक लामिछानेले केटीहरूलाई देखाएर द्विअर्थी शब्द बोर्डमा लेख्ने बोल्ने गरेको सोही विद्यालयकै कक्षा नौ मै पढ्ने अर्की विद्यार्थीले पनि सुनाइन् ।

विद्यालयको १२ कक्षामा अध्ययनरत छात्र ले पटकपटक केटी साथीहरूलाई शिक्षक लामिछानेले दुर्व्यवहार गरेको आफूले देखेको बताए । ‘९ कक्षादेखि नै केटी साथीहरूले सरले दुर्व्यवहार गर्नुहुन्छ भनी सुनाउँथे । हामीले पनि सरले केटीहरूलाई छुन जाने गरेको देखेका हौँ । हामीले बोल्न खोज्दा चुप लगाउनुहुन्थ्यो । सरले अश्लिल शब्दहरू कक्षामा पढ्ने बेला केटीहरूलाई ताकेर बोल्नुहुन्थ्यो, जुन शब्द हामीलाई सुन्दा पनि कस्तोकस्तो हुन्थ्यो’ उनले भने ।

सोमेश्वर माध्यमिक विद्यालयका प्रधानध्यापक प्रेम विश्वकर्माले घटनाबारे पहिल्यै जानकारी नआएको बताए । ‘यस्तो जघन्य अपराधबारे थाहा भएको भए पहिल्यै केही कदम चालिन्थ्यो होला’, उनले भने ।

आइतबार जिल्ला प्रहरी कार्यालय चितवनमा बालिकाकी आमा र केही विद्यार्थीसमेतले मुलुकी अपराध संहिता २०७४ अन्तर्गत बाल यौन दुर्व्यवहारको आरोपमा जिल्ला प्रहरी कार्यालय चितवनमा जाहेरी दर्ता गरेका छन् ।

जाहेरी दिन आएकी पीडित विद्यार्थीकी आमाले घटनाको बारेमा विद्यालयमा खैलाबैला भएपछि मात्रै थाहा पाएको बताइन् । ‘घरमा आएर छोरीले केही सुनाइन । रोइरही, खाना पनि खाइन । यस्तो भएको रहेछ, थाहा नै भएन । मलाई त आइतबार मात्रै थाहा भयो’, उनले भनिन्, ‘छोरीले तपाईंले साथ दिए पनि, नदिए पनि म लड्छु भनी । अनि म पनि आएकी हुँ ।’

उनले घटना मिलाउन दबाब आएकोले कानुनी लडाईंका लागि भरतपुर आएको बताइन् । उनीसँगै आएकी पीडित विद्यार्थीकी ठूलीआमा पनि न्यायका लागि पछाडि नहट्ने बताउँछिन् । ‘हामीले सोधखोज गरेनौँ । स्कुलमै यस्तो व्यवहार होला भनेर सोच्दा पनि सोचिएन’, उनले भनिन्, ‘घटना बाहिर आएपछि मिलाउन भित्रभित्रै चलखेल हुन लाग्यो । न्याय होला भन्दा अन्याय भयो हामीलाई । त्यसैले हामी आज यहाँ (जिप्रका भरतपुर) आयौँ ।’

छोरीहरूको न्यायको आवाजमा साथ दिन आफू सदैव तयार रहेको उनले सुनाइन् । ‘मैले छोरीहरूलाई चुप बस्न हुन्न भनेकी छु’ उनले भनिन् ।

प्रकाशित मिति: आइतबार, चैत ६, २०७८ २१:४५