साढे १२ सय कामदार सिसेल्स पठाइँदै, रोजगार गन्तव्य देश बन्ला ?

A+ A A-

नेपाल र सिसेल्सबीच सरकारीस्तरमा श्रम सम्र्झौता गरी कामदार आदान–प्रदान सहमति भएको छ । सिसेल्स भ्रमणका समयमा श्रम, रोजगार तथा सामाजिक सुरक्षामन्त्री कृष्णकुमार श्रेष्ठ, सिसेल्सका रोजगार तथा सामाजिक मामिलामन्त्री प्याट्रिका फ्यानकोट र आन्तरिक मामिलामन्त्री इरोल फोन्स्काबीच भएकाे वार्तामा श्रम सम्झौता गर्ने सहमति भएको हाे।

दुवै देशका मन्त्रीहरूबीच एक महिनाभित्र संयुक्त कार्यदलले गरेको अध्ययनअनुसार द्विपक्षीय श्रम सम्झौतामा हस्ताक्षर गर्ने सहमति भएको छ ।

नेपाली कामदारका लागि अर्काे सुरक्षित रोजगार गन्तव्य देशका रुपमा सिसेल्ससँग श्रम सम्झौता हुने लागेको श्रम मन्त्री श्रेष्ठले जानकारी दिएका छन् । वार्तामा श्रम मन्त्रीले श्रेष्ठले कामदारसँगै सिसेल्ससँग पर्यटन विकास, कृषि र अन्य क्षेत्रमा पनि नेपालसँग सहकार्य गर्ने विषयमा छलफल भएको बताए ।

अहिलेको प्रथामिकता श्रम सम्झौता रहेकाे र विस्तारै अन्य क्षेत्रमा पनि सिसेल्सले लगानी गर्ने इच्छा देखाएको उनको भनाइ छ ।

नेपाली प्रतिनिधिमण्डलसँग भएको छलफलमा मन्त्री फ्यानकोटले सिसेल्स सरकार द्विपक्षीय श्रम सम्झौता गरेरै नेपालीहरूलाई ल्याउन इच्छुक रहेको र नेपाली कामदारलाई अन्तर्राष्ट्रिय मापदण्डअनुसार सेवा–सुविधा दिने बताएका थिए ।

कृषि, प्रहरी, सुरक्षा गार्ड, निर्माण र पर्यटन क्षेत्रमा सिसेल्सले नेपाली कामदार लिन चाहेकाे भ्रमण टोलीका सदस्य श्रम मन्त्रालयका सचिव एकनारायण अर्यालले जानकारी दिए ।

श्रम सम्झौतामा समेटिने मुख्य विषय

भाषागत ज्ञान, न्यूनतम योग्यता, न्यूनतम पारिश्रमिकलगायत सेवा सुविधा, कामदार छनोट र स्वदेश फिर्तीलगायत विषयमा संयुक्त कार्यदलले तयारी गर्नेछ । कार्यदलमा नेपालको तर्फबाट मन्त्रालयका उपसचिव डा थानेश्वर भुसालले नेतृत्व गर्नेछन् ।

श्रम सम्झौतामा कामदारको सम्पूर्ण खर्च रोजगारदाता कम्पनीले व्यहोर्ने, रोजगार बीमा, स्वास्थ्य सुविधा, परिवारिक सुविधा र कामदारको तलब सुविधा बैकिङ च्यानलबाट दिने विषय समेटिने श्रम मन्त्रालयले जनाएको छ ।

सिसेल्स भ्रमणमा रहेका उपसचिव डा. भुसालले नेपाली कामदारलाई तालिम दिएर लैजाने गरी श्रम सम्झौता गर्ने तयारी रहेकाे जानकारी दिए ।

कामदार मात्र होइन उनीहरूलाई आवश्यक तालिम पनि रोजगारदाता देशले दिनेगरी तालिम केन्द्र खोल्नुपर्ने पक्षमा नेपाल रहेको उनले बताएका छन् ।

श्रम सम्झौतापछि पहिलो चरणमा एक हजार २ सय ५० जना कामदार पठाउने गरी छलफल भएको छ । सिसेल्सले कृषि, उद्योग, होटल, ड्राइभर र निर्माण क्षेत्रमा नेपाली कामदार लैजाने श्रम मन्त्रालयले जनाएको छ ।

सिसेल्स जाने कामदारको न्यूनतम तलब साढे एक लाखसम्म हुने र उनीहरूले सिसेल्सको श्रम कानुनअनुसार त्यहाँ आन्तरिक श्रमिकले पाएको जस्तै सेवा–सुविधा पाउनेछन् । सिसेल्समा वार्षिक ३ देखि ५ हजार कामदार पठाउने सकिने श्रम मन्त्रालयले जानकारी दिएको छ ।

सिसेल्सले पहिलो चरणमै प्रहरी र सुरक्षा गार्डमा कामदार लैजाने भएको श्रम मन्त्रालयका उपसचिव डा. भुुसालले बताए ।

‘सिसेल्समा अहिले सुरक्षा गार्डका रूपमा धेरै नेपाली कार्यरत छन् । यो क्षेत्रमा कामदारको कोटा बढाउन नेपालले पहल गर्नेछ । यसबाहेक होटल तथा पर्यटन क्षेत्रमा पनि केही श्रमिकहरू कार्यरत रहेको भ्रमणका क्रममा भेटियो’, उनले भने, ‘सिसेल्सले सुरक्षा गार्ड र सिेल्सको प्रहरी सेवा पनि नेपालीहरूलाई रोजगारीमा लैजाने भएको छ । नेपालले यो विषयमा गम्भिर भएर छलफल गर्नुपर्ने छ । सुरक्षा क्षेत्र नेपाली कामदार पठाउन छलफल गर्नुपर्छ ।’

नेपालसँग भएको भेटवार्तामा गणतन्त्र सिसेल्सको रोजगार तथा सामाजिक मामिला र आन्तरिक मामिला मन्त्रालयका उच्च अधिकारीका साथै प्रहरी र जेल सुरक्षा प्रमुखको सहभागी रहेको उपसचिव डा. भुुसालले जानकारी दिए ।

नेपाल र सिसेल्सबीच कुटनीतिक सम्बन्ध स्थापना भएको साढे तीन दशक भइसकेको छ । सिसेल्समा हाल पनि २ हजारभन्दा धेरै नेपाली कार्यरत छन् । उनीहरू व्यक्तिगत श्रम भिसामा जाने गरेको विभागले जनाएको छ ।

प्रकाशित मिति: आइतबार, चैत ६, २०७८ १४:२३