भरतपुर महानगरमा रेणु दाहाल र देवी ज्ञवाली फेरि आमनेसामने हुने संकेत

A+ A A-

चितवनको भरतपुर महानगरपालिकाको मेयरका लागि माओवादी केन्द्रकी रेणु दाहाल र एमालेका देवी ज्ञवाली फेरि आमनेसामने हुने संकेत देखिएको छ । २०७४ को स्थानीय चुनावमा कांग्रेस र माओवादी केन्द्रको गठबन्धनबाट दाहाल र एमालेका ज्ञवालीवीच कडा प्रतिस्पर्धा भएको थियो ।

एमाले पङ्क्तिले भने दाहाल पक्षले धाँधली गरेर चुनाव जितेको आरोप लगाउँदै आएको छ । १५ जेठ ०७४ मा भरतपुर महानगरपालिका वडा नम्बर १९ को मतगणना भइरहँदा मध्यरातमा मतगणनास्थलमै दाहाल पक्षले ९१ वटा मतपत्र च्यातेका थिए । उक्त घटनापछि पुनः मतदान गरेर दाहालले २ सय ३ मत बढी ल्याएर ज्ञवालीलाई पराजित गरेकी थिइन् ।

आफूलाई धाँधली गरेर हराएको बताउने एमालेका केन्द्रीय सदस्यसमेत रहेका ज्ञवालीले पुनः मेयर उठ्ने इच्छा व्यक्त गरेका छन् । अघिल्लो पटक धोखाधडी गरेर हराइएको बदला लिन पनि यसपटक एमालेले ज्ञवालीलाई भरतपुरको मेयरमा उठाउने सम्भावना बलियो छ । ज्ञवालीले मेयर पदमा उठ्ने आकांक्षा व्यक्त गरे पनि एमालेले भरतपुरमा कसलाई मेयरको उम्मेदवार बनाउने भन्ने निर्णय गरिसकेको छैन ।

एमालेभित्र उपमहानगर र महानगरका उम्मेदवार तोक्ने जिम्मा केन्द्रीय कमिटीलाई दिइएको छ । शिलापत्रसँगको कुराकानीमा ज्ञवालीले आफू मेयरको आकांक्षी भएको अप्रत्यक्ष रूपमा बताए ।

०७४ मा आफूमाथि भएको घातका कारण भरतपुरमा आफ्नो पक्षमा सहानुभूतिसहितकाे जनमत भएको ज्ञवालीको दाबी छ । ‘अघिल्लो पटक भएको घटनाका कारण जनताले मलाई घाइते हो, पीडित हो भन्ने बुझेका छन्,’ ज्ञवालीले भने, ‘मेरो पीडा र घाउमा मल्हम लगाउनुपर्छ भन्ने मनसाय छ जनताको ।’

०७४ मा आफूमाथि घात र अन्याय भएको बताउँदै ज्ञवालीले भने, ‘त्यतिखेर ममाथि मात्र होइन, सम्पूर्ण लोकतन्त्र र यसको स्वच्छ पद्धतिमाथि नै घात भएको थियो । हामीमाथि अन्याय भएको थियो, यसपटक त्यसो नहोला ।’

पार्टीले भरतपुरका जनताको जनभावना र मतको कदर गर्ने बताउँदै ज्ञवालीले भने, ‘पार्टी भनेको पनि जनताकै संगठन हो । जनभावनाको प्रतिनिधित्व गर्ने संस्था पार्टी नै हो । त्यसैले यसपटक पनि पार्टीले जनभावनाको कदर गर्नेछ भन्ने विश्वास छ ।’

सत्तारुढ गठबन्धन माओवादी केन्द्रकी हालकी मेयर रेणु दाहाल भरतपुरको मेयरमा बलियो दाबेदार हुन् । सत्तारुढ गठबन्धनभित्र महानगर र उपमहानरमा केन्द्रीय तहबाट गठबन्धन गर्ने र नगरपालिका तथा गाउँपालिका स्थानीय परिस्थितिअनुसार तालमेल गर्नेबारे अनौपचारिक छलफल भइरहेका छ ।

महानगरहरूमा तालमेल हुने अवस्थामा तुलनात्मक रूपमा वीरगञ्ज महानगरमा जसपाको दाबी रहने र भरतपुर महानगरमा माओवादी केन्द्रको दाबी रहने देखिन्छ ।

सहमति कायम रहेमा माओवादी केन्द्रबाट भरतपुरमा रेणु दाहाल नै मेयरको पदमा फेरि उठ्ने बलियो सम्भावना रहेको माओवादी नेताहरूको भनाइ छ । यद्यपि, माओवादी र कांग्रेसबीच मेयर पदमा तालमेलबारे टुंगो भने लागेको छैन र माओवादीले पनि कसलाई मेयरको उम्मेदवार बनाउने भन्ने छलफल चलाइसकेको छैन ।

माओवादी अध्यक्ष पुष्पकमल दाहाल ‘प्रचण्ड’को चुनावी क्षेत्रको केही हिस्सासमेत पर्ने भरतपुरमा माओवादी–कांग्रेस गठबन्धन बनेमा दाहाल नै मेयरको उम्मेदवार बन्ने आंकलन गरिएको छ । आफ्नो चुनावी क्षेत्रमा प्रचण्डले फरक पार्टीको मान्छेलाई मेयर बनाउन नचाहने भएकाले माओवादीको दाबी हुने पनि चितवनमा चर्चा भइरहेको छ ।

दाहाल भरतपुर मेयरको प्रबल दाबेदार भए पनि माओवादी केन्द्रले भरतपुरमा कसलाई उम्मेदवार बनाउने भनेर टुगों लगाइसकेको छैन ।

दाहालका प्रेस सल्लाहकार शुरेशचन्द्र अधिकारीका अनुसार दाहालले अहिले नै आफूलाई मेयरको दाबेदार भनेकी छैनन् । ‘उहाँले अहिले नै आफूले मेयरमा दाबी गर्ने भन्नुभएको छैन,’ अधिकारीले भने, ‘पार्टीमा छलफल भएपछि आधिकारिक उम्मेदवार तय हुन्छ ।’

प्रकाशित मिति: बुधबार, चैत २, २०७८ २०:३४