जेलभित्र गुन्डा नाइके बाहुनको दैनिकीः चर्पीमा पानी पुर्याउनेदेखि लुगा धुनेसम्मका सहयोगी

जेलभित्र गुन्डा नाइके बाहुनको दैनिकीः चर्पीमा पानी पुर्याउनेदेखि लुगा धुनेसम्मका सहयोगी

A+ A A-

‘गुन्डा नाइके’ भनेर कहलिएका रामेछापका रमेश बाहुन भनिने सुजन पौडेल पछिल्लो समय कारागारबाटै आपराधिक गतिविधिमा सक्रिय हुन थोलेका छन् । सुन्धारा कारागारमा राखिएका बाहुनले कारागारभित्रैबाट विभिन्न व्यापारीलाई धम्काउन लगाउनेदेखि कारागारभित्रकै व्यापारको टेन्डरसमेत हात पार्क थालेका हुन् ।

कारागारका नाइकेका अनुसार बाहुनले कारागारभित्रका चारवटा पसल हात पारेका छन् । त्यसमध्ये एउटा कपडा पसल र अन्य खाजा पसल रहेको ती नाइकेले बताए । कारागारभित्र रहे पनि आफू निकटका आउट डोर अथवा चौकीदार रहेका कैदी प्रयोग गरेर बाहिरका व्यापारीलाई समेत धम्काएर पैसा असुलीमा लागेको उनको भनाइ छ ।

अरुले थाहा पाउँछन् भन्ने डरले पसल सञ्चालनको जिम्मा भने बाहुनले अरुलाई नै दिएको उनको भनाइ छ । ती नाइकेका अनुसार रमेश बाहुनले बाहिरका व्यापारीलाई फोन गर्ने जिम्मा आफूसँगै नेपाली सेनामा कार्यरत हुँदाका साथी रेन्जर गणका भगौडा नेपाली सेनाका जवान नुवाकोटका बुद्द तामाङलाई दिएका थिए । उनी केन्द्रीय कारागार सुन्धाराका नाइके हुन् ।

कारागार प्रशासनले नाइकेलाई कारागारको बाहिर प्रशानसम्म खुला छाडेको हुन्छ । उनीहरुले चाहेको बेला जो सुकैलाई फोन गर्ने सुविधा उपलब्ध छ । त्यही मौका पारेर तामाङले रमेशको नाम लिएर व्यापारीलाई धम्काउँदै रकम असुली गरेको सूचना पाएपछि कारागार प्रशासनले फोन गर्दा गर्दै भेटेपछि उनलाई केही महिनाअघि ललितपुरको नख्खु कारागार सरुवा गरेको थियाे ।

बुद्ध तामाङलाई सरुवा गरिएकाे कारागार प्रमुख जेलर सहसचिव बेधनिधि अधिकारीले समेत पुष्टि गरे । तामाङ ज्यान मुद्दामा कैद भुक्तान गरेका कैदी हुुन् ।

विलासी दैनिकी

रमेश बाहुनको दैनिकी समेत अरु कैदीलाई अचम्मित पार्ने छ । उनले आफू चर्पी जाँदा पानी राखिदिनेदेखि नुहाइदिनसम्मका कर्मचारी राखेका छन् । सुत्ने कोठा सफा गर्ने र लुगा धुने बेग्ला बेग्लै कर्मचारी राखेको कारागारका नाइकेको भनाइ छ ।

बाहुनले आफ्नो काम गर्नेलाई तलब दिएरै राखेको ती नाइके बताउँछन् ।

‘कारागार आउने हरेक नयाँ कैदीले रमेशको नाम नसुनेको कुनै हुँदैन । उनले भनेको नमान्ने र कुरा काट्ने कोही हुँदैनन्,’ ती नाइकेले भने । बाहुनलाई केही वर्ष कारागारको गोल घरभित्र राखिएकाे थियाे । हाल उनी गोलघर बाहिर छन् ।

नेपाली सेनाको रेन्जर गणमा तालिम गरेर २०६१ सालमा भागेका बाहुन त्यसपछि आपराधिक क्रियाकलापमा संलग्न हुँदै आएका थिए । रेन्जर गणबाट भागेपछि सेनाबाटै भागेका भगौडालाई बटुलेर उनी आपराधिक गतिविधिमा संलग्न भएका थिए ।

ठेक्का पट्टा, रकम असुली जस्ता गतिविधि गर्दै आएका बाहुनले २०७० फागुनमा ललितपुरका मीनकृष्ण महर्जनमाथि गोली हानेपछि फरार भएका थिए । उनलाई काठमाडौं प्रहरीले २०७१ असारमा कलंकीबाट पक्राउ गरेको थियो । उनीमाथि अपहरण तथा शरीर बन्धक, हातहतियार खरखजना र लागूऔषध मुद्दा छ ।

प्रकाशित मिति: बुधबार, असार १८, २०७६ ०४:०२