गृहमन्त्री खाँणको नगरपालिकामा कांग्रेसलाई एमालेको चुनौती, कसले मार्ला बाजी ?

गृहमन्त्री खाँणको नगरपालिकामा कांग्रेसलाई एमालेको चुनौती, कसले मार्ला बाजी ?

A+ A A-

स्थानीय तहको चुनाव नजिकिएसँगै रुपन्देहीको तिलोत्तमा नगरपालिकामा चुनावी रस्साकस्सी सुरु भएको छ । प्रमुख राजनीतिक दलहरूले चुनावी तयारी पनि सुरु गरेका छन् । बुटवल उपमहानगरपछि रुपन्देहीमा महत्वका साथ हेरिएको नगर हो, तिलोत्तमा ।

अघिल्लो स्थानीय चुनावमा एमालेले बाजी मारेको थियो । कांग्रेस नेता एवं गृहमन्त्री बालकृष्ण खाँण र एमाले नेता घनश्याम भुसालको निर्वाचन क्षेत्रको नगरपालिका भएकाले पनि विशेष चासोका साथ हेरिएको छ । अघिल्लो पटक गृहमन्त्री खाँणका भाइ रामकृष्ण खाँण एमालेका बासुदेव घिमिरेसँग पराजित भएका थिए । उपमेयरमा पनि एमालेकै जागेश्वरी चौधरी निर्वाचित भएकी थिइन् । रामकृष्ण खाँण अहिले कांग्रेस रुपन्देही सभापति छन् । जिल्ला सभापति भएकाले यो पटक उनी उम्मेदवार हुने सम्भावना कम छ ।

अघिल्लो चुनावमा कांग्रेसले जनमुक्ति पार्टीसँग गठबन्धन गरेको थियो । तर, एमालेका घिमिरेले झण्डै २ हजार ३ सय मतान्तरले कांग्रेसका खाँणलाई पराजित गरेका थिए । आसन्न चुनावमा पाँच दलीय गठबन्धन कायमै रहे एमालेका लागि अघिल्लो पटक जस्तो सहज भने हुनेछैन । तिलोत्तमामा एकीकृत समाजवादीको प्रभाव कम भए पनि निर्वाचनको मत परिणाममा भने प्रभाव पार्ने देखिएको छ ।

स्थानीय तहको चुनावमा गठबन्धन नभए तिलोत्तमामा कांग्रेस र एमालेबीच नै मुख्य प्रतिस्पर्धा हुने देखिएको छ । अघिल्लो चुनावमा तिलोत्तमाका १७ वडामध्ये १३ वडामा एमालेको जित हासिल गरेको थियो । अघिल्लो पटक चुनाव हारेको कांग्रेसले यो पटक नतिजा उल्टाउने दाउमा छ । त्यही अनुरुप कांग्रेसले चुनावी अभियान सुरु गरिसकेको छ भने एमालेले पनि आफ्नो वर्चश्व कायमै राख्ने रणनीति लिएको छ । तर, पार्टी विभाजन भएकाले एमालेलाई त्यति सहज भने देखिँदैन । एकीकृत समाजवादी निर्णायक बन्ने भएकाले एमालेलाई त्यसको असर पर्ने देखिन्छ ।

एमालेबाट को-को छन् आकांक्षी ?

एमालेबाट तिलोत्तमा नगरपालिकाको मेयरका लागि मोहन चापागाईं, यज्ञ गैरे र हालका मेयर बासुदेव घिमिरेले आकांक्षा देखाएका छन् । उनीहरूबाहेक नगर उपप्रमुख जागेश्वरी चौधरीले पनि दाबी गरिरहेकी छिन् । चौधरी जिल्ला उपाध्यक्ष, गैरे सचिव र चापागाईं निवर्तमान नगर कमिटी अध्यक्ष हुन् ।

चापागाईं तिलोत्तमाको नेतृत्व गर्न पार्टीले यो पटक आफूलाई अगाडि बढाउने दाबी गर्छन् । उनले तिलोत्तमाको विकासका लागि आफूसँग भिजन रहेको पनि दाबी गर्छन् ।

अर्का आकांक्षी यज्ञ गैरेले निरन्तर पार्टी काम र जनताका बीचमा पुगेर काम गरेकाले यस पटक आफूलाई अवसर दिनुपर्ने बताउँछन् । गैरले नेतृत्वले उपयुक्त निर्णय लिएर आफूलाई परीक्षण गर्ने अवसर दिने विश्वास व्यक्त गरे । गैरे अहिले एमाले जिल्ला सचिव छन् ।

पाँच दलीय गठबन्धन कायम रहे अहिलेकै मेयर घिमिरेलाई दोहोर्‍याउनु पर्ने तर्क पनि एमालेभित्र हुन थालेको छ । घिमिरेलाई नै टिकट दिँदा जित्न सजिलो हुने मत पार्टीभित्र बलियो हुँदै गएको छ । नगर प्रमुख घिमिरेले भने आफ्नो उम्मेदवारीबारे केही बोलेका छैनन् ।

कांग्रेसको उम्मेदवार पाठक कि न्यौपाने ?

गृहमन्त्री बालकृष्ण खाँणको चुनावी क्षेत्र भएकाले पनि तिलोत्तमा नगरपालिका उनको प्रतिष्ठासँग जोडिएको छ । टिकट वितरणमा पनि खाँणकै प्रभाव रहन्छ । खाँणले रुचाएका मान्छेले नै टिकट पाउने सम्भावना बढी छ । यसअघि खाँणले आफ्नै भाइ रामकृष्ण खाँणलाई टिकट दिएपछि कांग्रेसमा असन्तुष्टि बढेको थियो । रामकृष्णले टिकट पाएपछि कांग्रेसकै केही नेता उनको विरुद्धमा पनि लागेका थिए । मेयरमा पराजित भएपछि खाँणले पार्टीभित्रबाट अन्तरघात भएको र त्यसको सिकार आफू भएको बताएका थिए ।

यो पटक जिल्ला सभापति भएकाले रामकृष्णको चर्चा कम छ । तिलोत्तमा मेयरका लागि रोमणिप्रसाद पाठक र नारायण न्यौपानेले दाबी गरिरहेका छन् । सामाजिक क्षेत्रमा समेत सक्रिय पाठकलाई कार्यकर्तामाझ परिचित छन् । ‘हाम्रो संगठन तिलोत्तमामा राम्रै छ,’ मेयरका आकांक्षी पाठकले शिलापत्रसँग भने, ‘नगरमा १५ प्रतिशत भोटर स्वतन्त्र छन् । ती भोट मैले तान्न सक्छुजस्तो लाग्छ । १५ प्रतिशत भोट जसले तान्छ, उसैले जित्छ ।’ कांग्रेस महासमिति सदस्यसमेत रहेका पाठक पार्टी नेतृत्वले यो पटक सुझबुझ ढंगले निर्णय गर्नुपर्ने बताउँछन् ।

अर्का आकांक्षी न्यौपाने हाल वडा नम्बर ९ का वडाध्यक्ष हुन् । न्यौपाने पार्टीको नगर सभापतिमा हरिलाल पाण्डेसँग पराजित भए पनि जनतामाझ भने परिचित नै छन् ।

प्रकाशित मिति: शुक्रबार, चैत ४, २०७८ १२:०९