श्रममन्त्रीको विदेश भ्रमण : श्रम सम्झौतासँगै अलपत्र कामदारकाे उद्धारका एजेन्डा

श्रममन्त्रीको विदेश भ्रमण : श्रम सम्झौतासँगै अलपत्र कामदारकाे उद्धारका एजेन्डा

A+ A A-

श्रम, रोजगार तथा सामाजिक सुरक्षामन्त्री कृष्णकुमार श्रेष्ठ नेतृत्वको टाेली अहिले यूएई भ्रमणमा छ । मन्त्री श्रेष्ठ आज नेपाल र यूएईबीच हुने संयुक्त समिति बैठकमा सहभागी हुँदैछन् । उक्त बैठकमा यूएईका मानव संशाधनमन्त्री डा.अब्दुलरहमान अल अवार र श्रममन्त्री श्रेष्ठले सम्बोधन गर्ने यूएईस्थित नेपाली दूतावासले जनाएको छ ।

यूएईका मानव संशाधनमन्त्री अब्दुलरहमानसँग श्रममन्त्री श्रेष्ठले भिजिट भिसामा त्यहाँ पुगेका नेपालीहरूका विषयमा छलफल गर्ने र समस्यामा परेका नेपालीहरूलाई उद्धारका लागि आग्रह गर्ने दूतावासले जनाएको छ ।

यूएईमा नेपाली कामदारहरूको सेवा सुविधा, यूएईले विदेशी कामदारका हकमा गरेको श्रम कानुन सुधार कार्यान्वयन, यहाँ कार्यरत नेपाली कामदारहरूले भोगिरहेको समस्या र उनीहरूको रोजगार सुरक्षाबारे छलफल हुने कार्यक्रम रहेको भ्रमण टोलीका सदस्य श्रम मन्त्रालयका उप–सचिव डा. थानेश्वर भुसालले जानकारी दिए ।

बैठकमा सन् २०१९ मा भएको श्रमसम्झौता कार्यान्वयनमा देखा परेका समस्या समाधान, कामदारको शून्य लागतको विषय र नेपालमा यूएईले विभिन्न क्षेत्रमा लगानी गर्ने विषयमा पनि छलफल गरिने उनले बताए ।

गत महिना भिजिट भिसामा यूएई पुगेका करिब ३० हजार नेपाली अलपत्र अवस्थामा रहेकाे श्रम मन्त्रालयले जनाएको थियाे । रोजगारीको प्रलोभनमा परेर भिजिट भिसामा एजेन्ट, म्यानपावर कम्पनी र ट्राभल एजेन्सीमार्फत ७० हजार नेपाली गत वर्ष यूएई पुगेको अध्यागमन विभागको तथ्यांक छ ।

केन्द्रीय अनुसन्धान ब्युराेका प्रहरी नायब उपरीक्षक रोशन खड्कासमेत श्रममन्त्री श्रेष्ठसँग यूएई भ्रमणमा छन् । भिजिट भिसामा लैजाने व्यक्ति तथा संस्थाहरूलाई कानुनी दायरामा ल्याउन केन्द्रीय अनुसन्धान ब्युराेका प्रहरी नायब उपरीक्षकलाई पनि भ्रमण टोलीमा लगिएको श्रममन्त्री श्रेष्ठले बताए । खड्काले भिजिट भिसामा कामदार ओसार्ने र अलपत्र पार्ने संस्था र व्यक्तिलाई कसरी कानुनी कारबाहीकाे दायरामा ल्याउने भन्नेबारे यूएई प्रहरीसँग दुईदिने छलफल गर्नेछन् ।

सिसेल्स र कतार

मन्त्री श्रेष्ठ नेतृत्वको टोली बिहीबार साँझ अफ्रिकी मुलुक गणतन्त्र सिसेल्स जानेछ । वैदेशिक रोजगारीका लागि नेपाली श्रमिकहरू लैजान गणतन्त्र सिसेल्सबाट प्राप्त द्विपक्षीय श्रम सम्झौताको प्रस्ताव, श्रम सम्झौताका लागि मिति तय र सिसेल्समा कस्ता क्षेत्रमा रोजगारी सिर्जना गर्ने भन्ने विषयमा त्यहाँका उच्च अधिकारीहरूसँग छलफल हुने श्रम मन्त्रालयका सचिव एकनारायण अर्यालले जानकारी दिए ।

सिसेल्समा वार्षिक १० हजार कामदार पठाउन सकिने गरेर छलफल हुने उनको भनाइ छ । श्रममन्त्रीसहितको भ्रमण टोली आइतबार कतार जाने र सोमबार कतारसँगको श्रम सम्झौता नवीकरणबारे उच्चस्तरीय छलफल हुने जनाइएकाे छ । गत डिसेम्बरमा नेपालमा भएको नेपाल-कतार संयुक्त समितिको चौथो बैठकले सन् २००५ मा भएको श्रम सम्झौता पुनरावलोकन गर्नेलगायतका निर्णय गरेकाे थियाे । मन्त्रीश्रेष्ठ नेतृत्वको टोली ८ चैतमा स्वदेश फर्कने श्रम मन्त्रालयले जनाएको छ ।

प्रकाशित मिति: मंगलबार, चैत १, २०७८ १३:४४