तीन महिनापछि बागमतीमा प्रदेशसभा बैठकः पहिलेका मुख्यमन्त्रीलाई अहिलेका मुख्यमन्त्रीको आरोपैआरोप

तीन महिनापछि बागमतीमा प्रदेशसभा बैठकः पहिलेका मुख्यमन्त्रीलाई अहिलेका मुख्यमन्त्रीको आरोपैआरोप

A+ A A-

बागमती प्रदेशको सत्तापक्ष र प्रमुख प्रतिपक्षी दल झण्डै तीन महिनापछि सदनमा आमनोसामने भएका छन् । यस क्रममा मुख्यमन्त्री राजेन्द्र पाण्डेले प्रतिपक्षी दल एमालेप्रति आक्रोशित भएर भाषण गरे। एमालेको अवरोधका कारण करिब तीन महिनापछि आइतबार बसेको बागमती प्रदेशसभा बैठकमा पाण्डेले एमालेमाथि आरोपैआराेप लगाए ।

सदनमा ३५ मिनेट बोलेका मुख्यमन्त्री पाण्डेले कानुन निर्माणमा एमालेले अवरोध गरेको भन्दै राेष प्रकट गरे ।

आइतबारको बैठक पनि एमालेले चल्न नदिने तयारी गरेकाे थियाे । तर, सरकारले चालू अधिवेशन अन्त्य गरेर अध्यादेशमार्फत काम गर्ने तयारी थालेको सुइँको पाएपछि एमालेले सदन चल्न दिएको थियो ।

सरकारले मन्त्रालय विभाजन गरेको, टुक्रे योजना ल्याएको, महत्त्वपूर्ण योजना कटौती गरेको भन्दै एमालेले आलोचना गर्दै आएकाे छ । संसद् बैठकको सुरुवातमै बोलेका मुख्यमन्त्री पाण्डे पूर्वमुख्यमन्त्री डोरमणि पौडेलमाथि खनिए । उनले पौडेलमाथि थुप्रै आरोप लगाए ।

मुख्यमन्त्री पाण्डेले हेटौंडास्थित मदन भण्डारी स्वस्थ्य विज्ञान प्रतिष्ठानको नाममा जग्गासमेत नभएको र हेटौंडा अस्पताल नै प्रतिष्ठानको मातहतमा बस्न अनिच्छुक रहेको अवस्थामा ल्याउन अघिल्लो सरकार दोषी भएको आरोप लगाए । आफू मुख्यमन्त्री भएपछि भने प्रतिष्ठानका लागि जग्गा पहिचान गरेर संघीय सरकारमा स्विकृतिका लागि सिफारिस गरेको उनकाे भनाइ छ ।

पाण्डेले पौडेल नेतृत्वको सरकारले १३ जना व्यक्तिको नाममा रहेको जग्गामा चिस्यान केन्द्र निर्माण गरेर सरकारी सम्पत्तिलाई व्यक्तिको हुने अवस्थामा पुर्‍याएको आरोप लगाए ।

आफू नेतृत्वको सरकारले एउटै भवनमा पाँचवटा मन्त्रालय राखेको विषयमा निकै टिप्पणी भएको भन्दै यसको कारक पौडेल नेतृत्वको सरकार भएको पाण्डेले बताए । साढे तीन वर्ष सरकार चलाएर पनि प्रादेशिक संरचना बनाउन नसकेको भन्दै तत्कालीन एमाले सरकारको उनले आलोचना गरे ।

‘अघिल्लो सरकारले स्थायी भवन निर्माण नगर्दा यस्तो अवस्था आएको हो । लामो समय सरकार चलाउनु भएका डोरमणि पौडेलले प्रादेशिक संरचना निर्माण नगरेकै कारण एउटै भवनमा धेरै मन्त्रालय राख्नु परेको हो’, उनले भने, ‘हाम्रो सरकारले संरचना बनाउन जग्गाको पहिचान गरेर संघीय सरकारलाई सिफारिसर गरिसक्यौँ । तर साढे ३ वर्ष सरकार चलाएका डोरमणि पौडेलले के गरे ?’

उनले पौडेल नेतृत्वको सरकारले इमानदारीपूर्वक काम नगरेको आरोप लगाए । ‘प्रदेश सरकारमा लामो समय नेतृत्व गरेकाहरूले इमानपूर्वक काम गरेको भए धेरै कुरा व्यवस्थित भइसक्ने थियो’, उनको भनाइ थियो । आफ्नो नेतृत्वमा करिब चार महिना सरकार चलाउँदा धेरै राम्रा कामको सुरुवात गरेको दाबी पनि उनले गरे ।

दुई वटा विधेयक पारित

बागमती प्रदेशसभा बैठकले दुई वटा विधेयक पारित गरेको छ । बैठकले प्रदेश पर्यटन विकासको सम्बन्धमा व्यवस्था गर्न बनेको विधेयक र उच्च शिक्षा सम्बन्धमा व्यवस्था गर्न बनेको विधेयक पारित गरेको हाे । बैठकमा ३ वटा विधेयकमाथि सैद्धान्तिक छलफल भएको छ । एउटा विधेयक संशोधनका लागि विषयगत समितिमा गएको छ । प्रदेशका आन्तरिक मामिला तथा कानुन मन्त्री कृष्णप्रसाद शर्मा खनालले पेस गरेको प्रदेश सञ्चार माध्यम व्यवस्थापन ऐन २०७५ संशोधन, प्रदेश अनुसन्धान ब्यूरो सेवाको गठन, स्थापना, काम कर्तव्य र अधिकारको सम्बन्धमा व्यवस्था गर्न बनेको विधेयक र प्रदेश विपद् व्यवस्थापन ऐनलाई संशोधन गर्न बनेको विधेयकमाथि सैद्धान्तिक छलफल भएको हो ।

प्रकाशित मिति: सोमबार, फागुन ३०, २०७८ ०९:२३