पूर्वहवल्दारको अपराध कर्म, जसलाई पक्राउ गर्न प्रहरीले इन्टरपोल गुहार्‍यो

A+ A A-

सुर्खेतका झकबहादुर सुनार उर्फ रूपेश सुर्खेती चार वर्षअघि अपराधी खोज्न फिल्डमा आफैँ खटिन्थे । त्यो बेला उनी नेपाल प्रहरीमा हवल्दार पदमा कार्यरत थिए ।

२०७४ मा प्रहरीको १६ वर्षे जागिर अवधि पूरा गरेर उनी घर फर्किए । १६ वर्ष प्रहरीको कडा अनुशासनमा बसेका सुनार अवकाशपछि भने सोही अनुशासनमा टिकीरहन सकेनन् ।

अवकाशपछि सुनार वैदेशिक रोजगार क्षेत्रमा काम गर्न थाले । प्रहरीस्रोतका अनुसार उनीमाथि विदेश जाने युवाहरूलाई जालमा पारेर ठगी गरेको आरोप छ ।

उनले नेपाली भूमिमा होइन विदेशमा बसेर वैदेशिक रोजगारीमा जाने नेपाली युवालाई ठगेको प्रहरीस्रोत बताउँछ । सुनारले भारतको नयाँ दिल्लीमा बसेर ठगी कार्य गर्न थालेको प्रहरीको भनाइ छ । उनले दिल्लीबाटै सामाजिक सञ्जाल फेसबुकमार्फत ‘नेपालीलाई इजरायल र कोरियामा आकर्षक तलब सुुविधा’ भन्दै विज्ञापन सार्वजनिक गरे ।

उनले आफू दिल्लीस्थित बारखम्बा मेट्रो स्टेसनको मुनड्रप्स ओभरसिज सर्भिज (एलएसपी) कम्पनीको निर्देशक रहेकोसमेत उल्लेख गरेका थिए । त्यही विज्ञापनको भरमा काभ्रे र सुर्खेतका चार जना युवाहरू सुनारको सम्पर्कमा पुगे । उनीहरूले आफूहरू कोरिया जान चाहेको बताएका थिए ।

सुनारले कोरिया जान दिल्ली आउनुपर्ने र प्रतिव्यक्ति ६ लाख ७५ हजार रुपैयाँ लाग्ने सर्त राखे । चारै जना सुनारको सर्त मानेर कोरिया जान पैसा बोकेर दिल्ली पुगे ।

सुनारले उनीहरूलाई एक महिना दिल्लीमै राखे । कोरियाको भिसा लागेको भन्दै एक महिनापछि १० मे २०१८ मा एयर इन्डियाको विमानमार्फत उनीहरूलाई दक्षिण कोरियाको सियोल पठाए ।

सुनारले दिल्ली एयरपोर्टमा समेत सेटिङ मिलाएर उनीहरूलाई उडाएका थिए । सियोल पुगेपछि भने चारै जनालाई नक्कली भिसा भन्दै कोरियाको अध्यागमनले थुनामा राख्यो । एक हप्ता थुनेर उनीहरूलाई दिल्ली फिर्ता पठायो ।

दिल्ली फिर्ता भएपछि उनीहरूले सुनारसँग पैसा फिर्ता मागे । तर, फिर्ता दिएनन् । सुनार सम्पर्कविहीन भए ।

पीडित चारै जनाले आफूहरू मानव तस्करीको जालोमा परेको भन्दै प्रहरीमा उजुरी दिए । सोही उजुरीका आधारमा प्रहरीले २०७५ सालदेखि नै आफ्नै पूर्वप्रहरी हवल्दार सुनारलाई खोजिरहेको छ । तर, पक्राउ गर्न भने सकेको छैन ।

सुनार नेपालमा नरहेको भन्दै प्रहरीले अन्तर्राष्ट्रिय सञ्जाल इन्टरपोललाई समेत गुहारेको छ । नेसनल सेन्ट्रल ब्युरो (एनसीबी) काठमाडौंको अनुरोधमा इन्टरपोलले सुनारविरुद्ध रेड नोटिस नै जारी गर्‍यो । तर, उनले इन्टरपोलका १ सय ९२ सदस्य राष्ट्रका प्रहरीलाई समेत छक्याएइरहेका छन् । इन्टरपोलले सुनारलाई १५ फेब्रुवरी २०२१ मा रेड नोटिस जारी गरेको छ ।

क्रोएसियाले नेपाल पठाउन मानेन

प्रहरी स्रोतका अनुसार सुनार अहिले युरोपेली मुलुक क्रोएसियामा बसेका छन् । उनलाई केही समयअघि क्रोएसियाको प्रहरीले नियन्त्रणमा समेत राखेको थियो । तर, उनलाई नेपाल पठाउन भने त्यहाँको प्रहरीले मानेन । प्रहरीस्रोतका अनुसार क्रोएसियामा पक्राउ परे पनि उनी नेपाल डिपोर्ट हुन नसक्नुको कारण सुपुर्दगी सन्धि हो ।

सुपुर्दगी सन्धि नभए अनौपचारिक रूपमा पठाइदिएबाहेक औपचारिक रूपमा एकअर्का देशका अपराधमा संलग्न व्यक्तिलाई जिम्मा दिन बाध्यकारी हुँदैन । जसका कारण फिर्ता दिए पनि अपराधी प्राप्त गर्ने देशका सुरक्षाकर्मीले त्यस्ता अपराधीलाई ‘सीमाक्षेत्रमा पक्राउ गरेको’ भन्दै आएका छन् ।

प्रहरी प्रवक्ता एसएसपी विष्णु केसीले पनि सुपुर्दगी सन्धिका कारण दोस्रो देशमा पक्राउ परेका अभियुक्तलाई नेपाल ल्याउन केही समस्या भएको स्वीकार गरे ।

प्रकाशित मिति: आइतबार, फागुन २९, २०७८ १८:२२