कर छलीको आरोपमा बोटलर्स नेपालविरुद्ध मुद्दा दायर, बिगो र जरिवानासहित ७ अर्ब ४३ करोड माग

कर छलीको आरोपमा बोटलर्स नेपालविरुद्ध मुद्दा दायर, बिगो र जरिवानासहित ७ अर्ब ४३ करोड माग

A+ A A-

राजस्व अनुसन्धान विभागले कर छलीको अभियोगमा बोटलर्स नेपालविरुद्ध मुद्दा दायर गरेको छ ।

शुक्रबार विभागले बिगो र जरिवानासहित ७ अर्ब ४३ करोड रुपैयाँ माग गर्दै उच्च अदालत पाटनमा मुद्दा दर्ता गरेको महानिर्देशक प्रकाश पौडेलले जानकारी दिए ।

शेयर स्वामित्व खरिद बिक्रीमा पुँजीगत लाभकर छली भएको भनेर गरिएको अनुसन्धानमा सुरुवातमा बोटलर्स नेपालले गल्ती अस्वीकार गर्दै आएको थियो । पछिल्लो पटक सरकारले तोकेअनुसार कर तिर्न तयार भएको भन्दै बोटलर्स नेपालले मुद्दा अघि नबढाउन राजस्व अनुसन्धान विभागलाई पत्र काटेको थियो ।

पत्रका विषयमा विभागले ठूला करदाता कार्यालयलाई जानकारी समेत गराएको थियो । सरकारी वकिलको कार्यालयको राय लिएर शुक्रबार बोटलर्स नेपालविरुद्ध मुद्दा दयार गरिएको पौडेलले बताए । ३ अर्ब ७१ करोड रुपैयाँ बिगो र त्यसको शत प्रतिशत जरिवानाको मागसहित बोटलर्स नेपालको अध्यक्ष साखुला वास्मा, आठ जना निर्देशक र आठ जना व्यवस्थापक गरी १७ जना विरुद्ध मुद्दा दायर गरिएको छ ।

को-को छन् प्रतिवादी ?

विभागले बोटलर्स नेपाल, साविकको कोका कोला साब्को एशियाको तर्फबाट प्रतिनिधित्व गर्ने ८ निर्देशक र ८ व्यवस्थापक गरी १७ जनालाई प्रतिवादी बनाएको छ । विभागले अध्यक्ष सुक्ला वास्मा र निर्देशकहरू मेल्भिन तान चुन पिन, मोहमद अमिन, गौरभ खोस्ला, सुदिप बाजोराई, देवभारत मुखर्जी, सुमन्त दत्त र संकेतलाई प्रतिवादी बनाएको छ ।

त्यस्तै व्यवस्थापकतर्फ प्रदीप पाण्डे, पुनित चन्द्रपाल, राजिब टण्डन, भरतबाबु दाहाल, सुमित गोल्यान, अशोककुमार मण्डल, त्रिलोचन उप्रेति र सञ्जिवकुमार मिश्रलाई पनि विभागले प्रतिवादी बनाएको छ ।

के हो कसुर ?

नेपालस्थित बोटलर्स नेपाल लिमिटेडमा अधिकांश शेयर स्वामित्व रहेको दुवईस्थित कम्पनी कोकाकोला साब्को एसियाको शत प्रतिशत शेयर सन् २०१४ अक्टोबर २४ मा कोकाकोला साब्कोले आयरल्याण्डस्थित युरोपियन रिफ्रेसमेन्टलाई बिक्री गरेर शेयर स्वामित्व परिवर्तन गरिएको थियो ।

दुई कम्पनीबीच शेयर कारोबार हुँदा बोटलर्स नेपाल लिमिटेडको प्रतिकित्ता शेयरको स्वतन्त्र बजार मूल्य तीन हजार ८ सय ८३ रुपैयाँ हुने र सोमा कोकाकोला साब्कोको प्रतिकित्ता शेयर खरिद मूल्य ५ सय ३६ लाई लागतका रूपमा घटाउँदा हुन आउने रकम ३ हजार ४ सय २७ प्रतिकित्ता पुँजीगत लाभकर छलेको राजस्व अनुसन्धानको दाबी छ ।

राजस्वको अनुसन्धानमा कोकाकोला साब्को एसियाको बोटलर्स नेपालमा रहेको शेयर संख्या १४ लाख ८४ हजार ३०१ को बिक्रीबापत ४ अर्ब ९६ करोड ७९ लाख ५५ हजार रुपैयाँ पुँजीगत लाभ कायम हुने उल्लेख गरिएको छ । त्यस्तै आयकर २५ प्रतिशतका दरले १ अर्ब २४ करोड १९ लाख ८६ हजार रुपैयाँ, आयकर ऐनको दफा ७ (१) अनुसार अतरिरिक्त शुल्क ०.१ प्रतिशतका दरले हुन आउने ३ करोड ४१ लाख, ब्याज १५ प्रतिशतका दरले ९ करोड ७८ लाख रुपैयाँ गरी बिगो ३ अर्ब ७१ करोड ८१ लाख तोकिएको छ ।

बोटलर्सको निहित शेयर स्वामित्वमा परिवर्तन भएको सम्बन्धमा उक्त कम्पनीले ठूला करदाता कार्यालयलगायत सम्बन्धित निकायमा कुनै जानकारी नदिएको भन्दै थप जरिवाना पनि लगाइएको छ । आयकर ऐनको दफा ५७ अनुसार आर्थिक वर्ष २०७१/७२ को छुट्टाछुट्टै आय विवरण पेस नगरेका कारण राजस्व छली भएको उल्लेख आरोपपत्रमा लगाइएको छ । साथै निहित शेयर स्वामित्वमा परिवर्तन भएकाले सिर्जना हुने आयकर ऐन २०५८ बमोजिमको कर दायित्व पूरा नगरी राजस्व चुहावट गर्ने उद्देश्यले राजस्व चुहावट गरेकाले सजाय पुष्टि भएको दाबी गरिएको छ ।

प्रकाशित मिति: शुक्रबार, फागुन २७, २०७८ १५:४३