शिशिरको बतासमा बाच्न सकोस् जीवन

A+ A A-

शिशिरको वायुसँगै डुल्न सकूँ म,
पूर्णिमाको जूनजस्तै बल्न सकूँ म,
समयको जिम्मेवारी बोक्न सक्ने बनू,
परिश्रमको वर्षातमा रूझ्न सकूँ म,
घामजस्तै प्रस्ट बनी प्रकाशजस्तै फुलिरहूँ

युद्धको क्रूरतालाई निभाइदेन बतास,
शान्तिको पुकारमा फैलिदेन बतास,
शिशिरको बतासमा जिउनुपर्छ जीवन,
युद्ध होइन मेलमिलाप रोज्नुपर्छ साथी,
झुटा होइन सत्यसँग उठ्नु पर्छ हामी,

लोलायका आँखामा युद्धको भारी होइन कि,
हृदयको समीपमा शान्त्वना पुकारी रहेछन्,
दुई थोपा आँसु नअट्ने यी नयनमा,
कलिला ती सपनाले कति दुःख भोगे होलान्,
माहुरीको पसिनामा कति मान्छे बाँचे होलान्,

मनभित्रका रहरहरू
कति भत्किए,
कति मरे,
कति अचेत अवस्था शिथिल घाइते छन्,
तैपनि मभित्रको दृढता अविस्मरणीय छ ।

संस्कारमा म एक अविच्छिन्न यात्री बनिरहू,
जहाँ बतासले मलाई तारन्तार सिक्न पठावस्,
त्यहीँबाट म उठ्न सकूँ,
जुन पाइलाले क्षीतिजको किनारलाई ढाडस दिन सकोस्,
र मातृभूमिले सधैँ कर्तव्यको भरिया भनेर हर्षबोध गरोस् ।

तुलनाले मान्छेलाई बन्न पनि प्रेरणा दिएको छ,
तुलनाले मान्छेलाई बिग्रन पनि उक्साएको छ,
अरुभन्दा बलियो ठानेमा अहङ्कारी बनाइदिन्छ ,
अरुभन्दा कमजाेर ठानेमा हिनताबोधले सताइरहन्छ,
जहाँ हामी आफू भएर बाच्न सक्ने सामर्थ्य राख्दैनौँ,

सुखदुःख एक्लै कसैको अफ्नो हुँदैन,
कतिले त भन्छन्- यो कर्मको प्राप्ति हो,
कतिले भन्छन्- यो भाग्यले उन्माएको,
म भन्छु- यो जिम्मेवारीमा खर्चेको पसिनाले हो,
जहाँ मैले मेरा कैयौँ रहरहरू मेटाएँ,
कैयौँ सपनाहरू पकाली दिएँ,

जीवन कहिले बतासमा उडेको छ,
कहिले वर्षातमा भिजेको छ,
कहिले बालापनमा छुट्यो त,
कहिले शून्यतामा विलिन भैरह्यो,
तैपनि शिशिरको हावाले मलाई भरोसा दिरह्यो,

मभित्रको विचारमा राख्न सकूँ देशलाई,
हृदयको मन्दिरमा पुज्न सकूँ बाआमालाई,
त्यै हृदयको समीपमा म यात्री बनिरहूँ,
हिमालको हिउँजस्तै सदाबहार टल्की रहूँ,
दैलोको दियोजस्तै बाहिर-भित्र बलिरहूँ,

यो यात्रा चारैतिर बताससरी फर्फराइरहोस्,
जहाँ विलिन आवाज र अनुभूतिहरूले सास फेर्न सकुन्,
मनका भाकाले एकाअर्कासँग मितेरी गासुन्,
आफूले आफैँलाई अपार प्रेम गरुन्,
र भनुन् यो बतास अनन्त शिशिरजस्तै फैलिरहोस्,

म हार्दा मेरो देशले जितोस,
म मर्दा मेरो देश बाँचोस्,
जहाँ देशको छाती सदा गर्वले भरिरहोस्,
र यो माटोमा सम्मान, एकता, शान्ति र मानवीय धर्मको फूल सधैँ फुलिरहोस् ।।

प्रकाशित मिति: शनिबार, फागुन २८, २०७८ ०६:२६