स्थानीय चुनावमा १ लाख म्यादी प्रहरी, सवारीसाधन किन्ने कि भाडामा लिने, अझै अलमल

स्थानीय चुनावमा १ लाख म्यादी प्रहरी, सवारीसाधन किन्ने कि भाडामा लिने, अझै अलमल

A+ A A-

३० वैशाखमा हुने स्थानीय तहको चुनावको सुरक्षाका लागि प्रहरी प्रधान कार्यालयले म्यादी प्रहरी भर्नाको प्रक्रिया थालेको छ । अर्थ मन्त्रालयले १ लाख म्यादी प्रहरी भर्ना लिन स्वीकृति दिएपछि प्रहरी प्रधान कार्यालले भर्ना प्रक्रिया अघि बढाएको हो ।

गृह मन्त्रालयले १ लाख १८ हजार म्यादी प्रहरी आवश्यक पर्ने प्रस्ताव पठाए पनि अर्थले १ लाख म्यादीको दरबन्दी स्वीकृत गरेको हो । म्यादीको तलब सुविधाबाहेक पोसाक भत्ताका लागि ६ हजार रुपैयाँ छुट्याएको छ । म्यादी प्रहरीले प्रहरी जवानले पाउने सुविधाबराबर तलब पाउने प्रहरी प्रवक्ता एसएसपी विष्णु केसीले जानकारी दिए । तलबबाहेक उनीहरूले रासनभत्ता पाउनेछन् । प्रहरी जवानको तलब मासिक २२ हजार रुपैयाँ छ ।

म्यादी प्रहरीलाई ४० दिनको तलबभत्ता दिने गरी चैत दोस्रो साताबाट भर्ना प्रक्रिया थालिने एसएसपी केसीले बताए । म्यादी भर्नामा अवकाशप्राप्त सेना र प्रहरीलाई प्राथमिकतामा दिइनेछ । ०७४ सालमा तीन चरणमा स्थानीय तहको निर्वाचन भएको थियो । त्यतिबेला ७५ हजार म्यादी प्रहरी भर्ना गर्नुका साथै ५० दिनको तलब सुविधा दिइएको थियो । म्यादीबाहेक चारवटै सुरक्षा निकायले सुरक्षा रणनीतिको गृहकार्य सुरु गरिसकेको छ ।

सवारीसाधनको अझै लागेन टुंगो

सुरक्षाका लागि १ लाख म्यादी प्रहरी भर्नाका लागि बजेट उपलब्ध गराएको अर्थ मन्त्रालयले प्रहरीलाई आवश्यक पर्ने सवारीसाधनबारेमा भने अझै निर्णय दिएको छैन ।

प्रहरी प्रधान कार्यालयले चुनावका लागि देशभर करिब १५ सय गाडी आवश्यक हुने भन्दै प्रतिवेदन गृह मन्त्रालयलाई बुझाएको थियो । त्यसमध्ये प्रत्येक स्थानीय तहका लागि एउटा नयाँ गाडी खरिद गर्ने माग प्रधान कार्यालयको थियो ।

चुनावका लागि खरिद गर्न लागिएका नयाँ गाडी किन्न सार्वजनिक खरिद प्रक्रियाबाट झन्झटिलो र समय लाग्ने भएकाले सरकारको पहलमा (जीटुजी) मार्फत सवारीसाधन खरिद हुने प्रहरी प्रधान कार्यालयले जनाएको छ । तर, सवारीसाधन भने नयाँ खरिद गर्ने वा भाडामा लिने भन्ने अझै निर्णय भएको छैन ।

चुनावका लागि प्रहरी प्रधान कार्यालय र सशस्त्र प्रहरी बलले १७ अर्ब ६० करोड ५५ लाख बजेट आवश्यक रहेको बताएका छन् । १२ अर्ब १४ करोड ८८ लाख चालु र ५ अर्ब ४५ करोड ६७ लाख पुँजीगत खर्च आवश्यक रहेको उनीहरूको भनाइ छ ।