धनगढीकाे मेयरमा कांग्रेस र एमालेका आकांक्षी को-को ?

A+ A A-

सुदूरपश्चिमको एक मात्र उपमहानगरपालिका धनगढीको मेयरको टिकटका लागि कांग्रेस र एमालेका नेताहरूले लबिङ सुरु गरेका छन् । कांग्रेसमा मेयरको टिकटका लागि तीन जनाबीच मुख्य प्रतिस्पर्धा देखिएको छ ।

एमालेमा दुई जनाले खुलेरै टिकट माग गरेका छन् भने अन्य दुई जना आफ्नो पक्षमा माहाेल बनाउने आन्तरिक प्रयास गरिरहेका छन् । सरकारले आगामी ३० वैशाखका लागि स्थानीय तह निर्वाचनको मिति घोषणा गरेको छ ।

माओवादीलगायतका पार्टीले सुदूरपश्चिममा खासै तयारी गरेका छैनन् । उपमहानगरमा गोपाल हमालले स्वतन्त्र उम्मेदवारी घोषणा गरेर प्रचारप्रसार सुरु गरेपछि अरु आकांक्षीहरू पनि मैदानमा उत्रिन हतार गरिरहेका छन् । तर, उनीहरूको पार्टीले टिकटको टुंगाे लगाउन भने अझै एक महिनाभन्दा बढी कुर्नुपर्ने देखिन्छ ।

हमालको उम्मेदवारी घोषणासँगै सुदूरपश्चिमको राजधानी शहर धनगढीमा चुनावी माहाेल तातेको छ । प्रदेशका सबै ८८वटा स्थानीय तहमा निर्वाचन आयोगले निर्वाचन केन्द्रित कार्यक्रम अगाडि बढाएपछि प्रतिस्पर्धाका लागि नेताहरू आन्तरिक लबिङमा जुट्न थालेका छन् ।

उपमहानगरपालिकाको नेतृत्वका लागि कांग्रेसबाट संस्थापन पक्षका तीन जनाको नाम चर्चामा छ । वर्तमान मेयर नृपबहादुर वड, उपमेयर सुशीला मिश्र भट्ट र नेता कृष्णबहादुर महरा कांग्रेसमा आकांक्षी देखिएका छन् ।

२०७४ को निर्वाचनमा वड स्वतन्त्र उम्मेदवार गोपाल हमाललाई २ हजार ७ सय मतले पराजित गर्दै विजयी भएका थिए । उनले अझै एक कार्यकाल दोहोर्‍याउन पाउनुपर्ने भन्दै सार्वजनिक रूपमै लबिङ सुरु गरेका छन् ।

यता व्यवसायी तथा कांग्रेस नेता महराले पनि मेयरमा आकांक्षा व्यक्त गरिसकेका छन् । २०७४ को निर्वाचनमा पनि उनले टिकट पाउने निकै चर्चा थियो । कांग्रेसका तत्कालीन नेता पुष्करनाथ ओझालगायतले मेयरमा महरालाई लडाउन केन्द्रमा लबिङ गरेका थिए । अघिल्लोपटक आकांक्षा राख्दा पनि मेयरको टिकट नपाएका कारण यसपटक महराले पाउने सम्भावना बलियो रहेको कांग्रेस कैलालीभित्र चर्चा छ ।

धनगढीकी उपमेयर भट्टले उपमेयरमा नदोहाेरिने बताइसकेकी छिन् । उनले मेयर वा प्रदेशसभाको टिकटका लागि लविङ सुरु गरेकी छिन् । कांग्रेसले नगरपालिका र उपमहानगरपालिकामा उम्मेदवारको टुंगो लगाउने जिम्मा सुदूरपश्चिम प्रदेश समितिलाई दिएको छ । तर, प्रदेश समितिले केन्द्रको निर्देशनअनुसार नै उम्मेदवार तय गर्नेमा कांग्रेसका नेता–कार्यकर्ता स्पष्ट छन् ।

नेकपा एमालेमा उपमहानगरको मेयरको टिकटका लागि दुई जनाबीच प्रतिस्पर्धा देखिए पनि भित्रभित्रै अरुले पनि गृहकार्य गरिरहेका छन् । २०७४ सालमा मेयरको चुनाव लडेर तेस्रो स्थानमा चित्त बुझाउन बाध्य हाल जिल्ला कमिटीका उपाध्यक्ष दुर्गा जोशी र हालै सम्पन्न जिल्ला अधिवेशनबाट जिल्ला अध्यक्षमा चुनाव हारेका रणबहादुर चन्दले धनगढीको मेयरमा दाबी प्रस्तुत गरेका छन् ।

तर, दुवै जनालाई टिकट पाउन भने सजिलो छैन । केही दिनअघि मात्रै निर्वाचन प्रक्रियामार्फत सम्पन्न भएको जिल्ला नेतृत्वको छनोटका बेला देखिएको आन्तरिक तुषले यी दुवै नेताका लागि उपमहानगरको कुर्सीमा दाबी गर्ने आधार कमजोर बनाएको छ ।

आन्तरिक निर्वाचनमा छताछुल्ल भएको तिक्तताको असर टिकट वितरणमा देखिने प्रस्ट छ । टिकटका सशक्त दाबेदार जोशी र चन्दलाई प्रतिस्पर्धी देखाएर सहमतिको वातावरण निर्माणको रणनीति अपनाई तेस्रो व्यक्तिले टिकट पाउने सम्भावना एमालेमा बढी छ । यस्तो अवस्थामा धनगढीका पूर्वमेयर खेमराज पाण्डे वा धर्मराज पाठकले टिकट पाउन सक्ने सम्भावना बढी रहेकाे एमालेजन बताउँछन् ।

प्रकाशित मिति: बिहीबार, फागुन २६, २०७८ ०६:५५