अन्त नमिले पनि मकवानपुरमा चुनावी गठबन्धन गर्ने कांग्रेस, माओवादी र नेकपा एसबीच 'भद्र सहमति'

अन्त नमिले पनि मकवानपुरमा चुनावी गठबन्धन गर्ने कांग्रेस, माओवादी र नेकपा एसबीच 'भद्र सहमति'

A+ A A-

सत्ता गठबन्धनका मुख्य तीन दल नेपाली कांग्रेस, माओवादी केन्द्र र एकीकृत समाजवादीले आगामी चुनावमा मकवानपुरमा मिलेर जाने 'भद्र सहमति' गरेका छन् । राष्ट्रियस्तरमा गठबन्धन नबने पनि मकवानपुरमा भने तीन दल मिलेर जान सहमत भएका हुन् ।

माओवादी केन्द्रका अध्यक्ष पुष्कमल दहाल प्रचण्ड र एकीकृत समाजवादी अध्यक्ष माधवकुमार नेपालले स्थानीय तहको चुनावमा सत्ता गठबन्धन मिलेर जाने दाबी गर्दै आएका छन् । तर, नेपाली कांग्रेसका कतिपय नेताहरूले भने यससम्बन्धमा फरक अभिव्यक्ति दिँदै आएका छन् । कांग्रेसको संस्थापनइतरका नेताहरूले एक्लै चुनाव लड्ने बताइरहँदा गठबन्धनबीचमा राष्ट्रियस्तरमै चुनावी गठबन्धन बन्नेमा शंका कायमै छ ।

मंगलबार कांग्रेस सभापति तथा प्रधानमन्त्री शेरबहादुर देउवाले गठबन्धनका नेताहरूको चित्त नदुखाउन नेता-कार्यकर्तालाई निर्देशन दिएका थिए । चुनावी गठबन्धन नरुचाउने कांग्रेस नेताहरूले सार्वजनिक रूपमै कांग्रेस एक्लै चुनाव लड्ने र गठबन्धनका अन्य दलका नेताहरूलाई बिझाउने अभिव्यक्ति दिइरहँदा देउवाले उक्त निर्देशन दिएको बुझ्न गाह्रो छैन ।

देशव्यापी चुनावी गठबन्धन बनाउने/नबनाउनेमा आशंका रहेका बेला मकवानपुरमा भने तीन दलले चुनावी तालमेल गर्ने ‘भद्र सहमति’ गरिसकेको नेताहरूले बताएका छन् ।

वामपन्थी प्रभाव रहेको मकवानपुरमा एमालेको उपस्थिति दर्बिलो रहेको बताइन्छ । सोही कारण स्थानीय चुनावमा एमालेलाई रोक्ने उद्देश्यका साथ देशभर तालमेल नभए पनि मकवानपुरमा भने गठबन्धन एक भएर जाने सहमतिमा उनीहरू पुगेको बुझिएको छ ।

मकवानपुरमा २०६४ मा पहिलोपटक 'एमालेको गढ' भत्किएको थियो । २०६४ को संविधानसभाको चुनावमा पहिलो पटक मकवानपुरका चारवटै निर्वाचन क्षेत्रमा माओवादीले जितेको थियो । २०७० को निर्वाचनमा एमाले उम्मेदवारलाई हराउँदै कांग्रेसका इन्द्रबहादुर बानियाँ निर्वाचित भए । उनी मकवानपुरबाट चुनाव जित्ने पहिलो गैरकम्युनिस्ट नेता हुन् ।

२०७४ सालको प्रतिनिधिसभाको प्रत्यक्ष निर्वाचनमा पुनः एमालेका उम्मेदवारले चुनाव जिते । हाल एकीकृत समाजवादीका स्थायी कमिटी सदस्यसमेत रहेका स्वास्थ्य तथा जनसंख्यामन्त्री विरोध खतिवडाले एमालेबाट मकवानपुरको २ नम्बर क्षेत्रबाट र कृष्ण दहालले १ नम्बर क्षेत्रबाट चुनाव जितेका हुन् । खतिवडाले कांग्रेस सहमहामन्त्री महालक्ष्मी उपाध्याय डिना र दहालले राप्रपा नेपालका अध्यक्ष कमल थापालाई पराजित गरेका थिए ।

प्रदेशसभाको प्रत्यक्ष निर्वाचनमा चार सिटमध्ये एमालेका डोरमणि पौडेलले मात्रै चुनाव जिते । बाँकी ३ सिटमा माओवादीका प्रेमबहादुर पुलामी र कुमारी मोक्तान तथा कांग्रेसका इन्द्रबहादुर बानियाँ निर्वाचित भए ।

मकवानपुरका १० स्थानीय तहमध्ये ६ वटाका प्रमुख र आठ जना उपप्रमुख एमालेबाट विजयी भएका थिए । माओवादी र कांग्रेसले दुई/दुई स्थानीय तहको प्रमुख जितेका थिए भने दुई जना उपप्रमुख कांग्रेसबाट विजयी भएका थिए । एमालेबाट निर्वाचित दुई गाउँपालिका अध्यक्ष र दुई उपाध्यक्षले एकीकृत समाजवादी रोजिसकेका छन् ।

आगामी स्थानीय चुनावमा मकपानपुरमा पुरानै विरासत फर्काउने एमालेको दाउ छ । एमालेले पालिकाकेन्द्रित चुनावी अभियान अघि बढाइसकेको छ ।

यस्तो परिस्थितिमा एमालेलाई रोक्न कांग्रेस, माओवादी केन्द्र र एकीकृत समाजवादीले राष्ट्रिय गठबन्धनको मुख नहेर्ने नीति लिएका हुन् । माओवादी केन्द्रको बागमती प्रदेश उपाध्यक्ष प्रेमबहादुर पुलामी एक भएर जाने कुरामा दुई मत नभएकाे बताउँछन् ।

मकवानपुरमा तीन पार्टी मिलेर जाने विषयमा नेताहरुबीच पटक–पटक छलफल भएको छ । उनीहरूबीच एक भएर जाने ‘भद्र सहमति’ बनेको बताइएको छ । एकीकृत समाजवादी मकवानपुरका अध्यक्ष श्रीधर पाेख्रेल मकवानपुरमा तीन दल मिलेर चुनाव लड्ने बताउँछन् ।

स्वास्थ्यमन्त्री विरोध खतिवडा, कांग्रेसका इन्द्रबहादुर बानियाँ र माओवादी केन्द्रकी कुमारी मोक्तानबीच यसबारेमा दुई पटक छलफल भइसकेको छ । ‘खतिवडा, बानियाँ र कुमारीलगायतका नेताहरू दुई पटक बसिसक्नुभयो । देशभर कतै गठबन्धन नभए पनि मकवानपुरमा गठबन्धन हुन्छ,’ एकीकृत समाजवादीका एक नेताले भने ।

केही समयअघि एकीकृत समाजवादीका केन्द्रीय उपाध्यक्ष केदार न्यौपानेले मकवानपुरका नेताहरूलाई देशभर गठबन्धन नभए पनि मकवानपुरमा एक भएर जाने सहमति भएको जानकारी गराएका थिए । ‘तपाईंहरू अहिले हल्ला नगर्नुस् । देशभर गठबन्धन हुने निश्चित छ,' न्यौपानेलाई उद्धृत गर्दै एकीकृत समाजवादीनिकट स्रोतले भन्यो, 'हुन नसके पनि मकवानपुरमा एक भएर जाने सहमति भइसक्यो ।’

माओवादी केन्द्र मकवानपुरका सचिव भीम पाख्रिन पनि मकवानपुरमा चुनावी तालमेल गर्नुपर्नेमा तीन दल सहमत भएको बताउँछन् । गठबन्धन बनाउने विषयमा लगभग सहमति भइसकेको उनको भनाइ छ ।

कांग्रेस नेता बानियाँ मकवानपुर १ बाट प्रतिनिसभा चुनाव लड्ने योजनामा छन् । उनको बलियो प्रतिद्वन्द्वी कमल थापा हुने अनुमान गरिएको छ । राप्रपा नेपालका महामन्त्री राजाराम बर्तौंलाका अनुसार थापा पुनः १ नम्बर क्षेत्रबाटै प्रतिनिधिसभा चुनाव लड्ने निश्चित छ । एमालेको सहयोगमा चुनाव जित्ने दाउ थापाको छ । थापालाई एमालेले सघाए आफूलाई चुनाव जित्न गाह्रो हुने बुझाइका साथ बानियाँ कुनै पनि हालतमा मकवानपुरमा गठबन्धन बनाउनुपर्ने पक्षमा छन् ।

प्रकाशित मिति: बुधबार, फागुन २५, २०७८ १९:४८