रोजगारदाता देशले हटाए पीसीआर रिपोर्ट र होटल क्वारेन्टाइन बस्नुपर्ने नियम, कुन्–कुन देशमा हट्यो ?

रोजगारदाता देशले हटाए पीसीआर रिपोर्ट र होटल क्वारेन्टाइन बस्नुपर्ने नियम, कुन्–कुन देशमा हट्यो ?

A+ A A-

कोरोना संक्रमण नियन्त्रण हुँदै गएपछि रोजगार गन्तव्य देशले कोरोना नियम पनि खुकुलो बनाउन थालेका छन् ।

मुख्य रोजगारदाता देशले गत सातादेखि विदेशी कामदारका हकमा पीसीआर रिपोर्ट देखाउनुपर्ने र संस्थागत तथा होटल क्वारेन्टाइन बस्नुपर्ने नियम खारेज गरेका छन् ।

पीसीआर रिपोर्ट देखाउनुपर्ने र संस्थागत तथा होटल क्वारेन्टाइन बस्नुपर्ने नियम हटेसँगै वैदेशिक रोजगारीमा जाने कामदारको खर्चमा केही राहत मिल्ने भएको छ । विदेशीने कामदारले पीसीआर र होटल क्वारेन्टाइनका लागि ३० हजारजति खर्च गर्दै आएका थिए ।

अब वैदेशिक रोजगारीमा जाने कामदारले सम्बन्धित रोजगारदाता देशले मान्यता दिएको खोप लगाएको प्रमाणस्वरुप क्यूआर कोड देखाए हुन्छ ।

अहिले वैदेशिक रोजगारीका लागि नेपालबाट दैनिक ४ सय जना कामदार विभिन्न देश जाने गरेको वैदेशिक रोजगार विभागको तथ्यांकमा उल्लेख छ ।

कतार

कतारको स्वास्थ्य मन्त्रालयले स्वास्थ्यका मापदण्डबारे केही परिमार्जन गरेको छ । परिमार्जित मापदण्डमा क्वारेन्नटाइन र पीसीआर परीक्षणको अनिवार्य नियम हटाएको छ ।

कतारले आगामी फेब्रुअरी २८ देखि लागू हुने गरी कतार यात्रा गर्ने यात्रुहरूका लागि स्वास्थ्यका मापदण्ड परिमार्जन गरेको छ । नयाँ मापदण्डअनुसार खोपको मात्रा पूरा लगाएका कतारका नागरिक र कतारमा बसोबास गर्नेहरूले यात्रा गर्नुअघि पीसीआर परीक्षण गर्नुपर्ने र त्यहाँ पुगेपछि क्वारेन्टाइन बस्नुपर्ने नियम हटेको छ ।

कतार सरकारको नयाँ नियम रातो र हरियो सूचीमा भएका दुवै देशबाट यात्रा गर्नेहरूका लागि लागू हुनेछ । नेपालसहित बङ्गलादेश, भारत, इजिप्ट, जर्जिया, जोर्डन, पाकिस्तान, फिलिपिन्स र श्रीलंकालाई कतारले अहिले रातो सूचीमा राखेको छ ।

कोरोनाको खोप लगाएकाहरूले पनि कतार पुगेको २४ घण्टाभित्र र्‍यापिड एन्टिजेन परीक्षण भने गर्नुपर्नेछ । खोप नलगाएकाहरूले भने कतार पुगेको पहिलो दिनमा पीसीआर परीक्षण र पाँचौँ दिनमा र्‍यापिड एन्टिजेन परीक्षण गर्नुपर्नेछ ।

साउदी

कोरोना संक्रमण कम हुँदै गएपछि साउदी अरबले कोरोना नियन्त्रणसम्बन्धी मापदण्ड खुकुलो बनाएको छ । शनिबारदेखि लागू हुनेगरी साउदी प्रवेश गर्नेहरूले पीसीआर रिपोर्ट देखाउनुपर्ने र संस्थागत तथा होटल क्वारेन्टाइन बस्नुपर्ने नियम खारेज गरिएको त्यहाँको गृह मन्त्रालयले जनाएको छ ।

साउदी प्रवेश गर्ने यात्रुले विमानस्थलमा नेगेटिभ पीसीआर रिपोर्ट देखाउनुनपर्ने त्यहाँको गृह मन्त्रालयको भनाइ रहेको गल्फ न्युजले जनाएको छ । यस्तै अब कुनै पनि प्रकारको क्वारेन्टाइन बस्नुपर्ने छैन । यात्रु विमानस्थलमा उत्रेर सिधै आफ्नो गन्तव्यमा जान सक्नेछन् ।

साथै मक्का र मदिनामा लागू गरिएको भौतिक दुरीको मापदण्ड पनि हटाइएको छ । तर, मास्क लगाउन भने यी ठाउँमा अनिवार्य नै छ । यस्तै साउदीले अफगानिस्तान लगायत १५ वटा अफ्रिकी देशमाथि लगाएको सिधा उडानमाथिको प्रतिबन्ध पनि हटाएको गल्फ न्युजले जनाएको छ ।

यूएई

यूएईको राष्ट्रिय आपतकालीन संकट व्यवस्थापन समितिलाई उदृत गर्दै खलिज टाइमले कोरोना पोजेटिभ भएकासँग कन्ट्याक्ट ट्रेसिङमा रहेकालाई अनिवार्य क्वारेन्टाइनको नियम पनि हटाइने उल्लेख गरेको छ ।

कोरोना संक्रमितहरूलाई आइसोलेसनमा बस्नुपर्ने नियम यथावत राख्दै यूएईले आफ्नो देश प्रवेश गर्ने यात्रुले पूर्णमात्रा खोप लगाएको प्रमाण देखाउन नसक्ने भए ४८ घण्टाभित्रको पीसीआर नेगेटिभ रिपोर्ट देखाउनुपर्ने व्यवस्था गरेको छ । साथै रोजगारीका लागि यूएई प्रवेश गर्ने विदेशी श्रमिकका हकमा अनिवार्य गरिएकाे पीसीआर रिपोर्ट र होटल क्वारेन्टाइन पनि हटाएको छ ।

कोरोना भाइरस संक्रमणको प्रभाव कम भएपछि यूएईले स्वास्थ्य सुरक्षाका मापदण्डलाई खुकुलो बनाएको छ । मार्च १ देखि लागू हुनेगरी यूएईले घरबाहिर वा सार्वजनिकस्थलमा अनिवार्य मास्क लगाउनुपर्ने नियम हटाएको छ । घरभित्र अर्थात हलमा हुने भेलामा भने मास्क अनिवार्य गरिएको छ ।

मलेसिया

मलसियाले कोरोनाको दुवै मात्रा खोप लगाएका यात्रुका लागि अनिवार्य पीसीआर परीक्षण र क्वारेन्टाइनकाे नियम हटाएको छ । मलेसिया जाने विदेशी कामदारले आफ्नो देशले मान्यता दिएको दुवै डोज खोप लगाएको भए पीसीआर परीक्षण र होटल क्वारेन्टाइन बस्नुनपर्ने मलेसियाली स्वास्थ्य मन्त्रालयले जनाएको छ ।

मलेसियाले फाइजर, स्पुतनिक लाइट, स्पुतनिक भी, जोन्सन एण्ड जोन्सन, कोभिसिल्ड र एस्ट्राजेनेका लगायतका खोपलाई मान्यता दिएको छ । खोपको एउटा मात्र डोज लगाएका विदेशी कामदारले मलेसिया पुगेको एक साता दोस्रो डोज लगाउनुपर्ने जनाइएको छ ।

मलेसियाले खोप नलगाएका यात्रुलाई पनि प्रवेशको अनुमति दिने निर्णय गरेको छ । तर, साथमा कोरोनाको पीसीआर परीक्षण नेगेटिभ भएको ७२ घण्टाभित्रको पीसीआर रिपोर्ट हुनुपर्छ भने सात दिन क्वारेन्टाइनमा बस्नुपर्छ ।

कुवेत

कुवेतले कोरोनाको दुवै मात्रा खोप लगाएका यात्रुका लागि अनिवार्य पीसीआर परीक्षण र क्वारेन्टाइनको नियम हटाएको छ । फेब्रुअरी २० देखि लागू हुनेगरी कुवेतले कोरोनाविरुद्धको खोपको पूरा मात्रा लगाएका यात्रुले प्रस्थान पूर्व र कुवेत पुगिसकेपछि गर्नुपर्ने अनिवार्य पीसीआर परीक्षण र क्वारेन्टाइनको नियम हटाएको त्यहाँको स्वास्थ्य मन्त्रालय जनाएकाे स्थानीय सञ्चारमाध्यम कुवेत टाइम्सले उल्लेख गरेकाे छ ।

यस्तै, कुवेतले खोप नलगाएका यात्रुलाई पनि कुवेत प्रवेशको अनुमति दिने निर्णय गरेको छ । तर, साथमा कोरोनाको पीसीआर परीक्षण नेगेटिभ भएको ७२ घण्टा भित्रको रिपोर्ट हुनुपर्छ भने सात दिन क्वारेन्टाइनमा बस्नुपर्छ ।

कोरोनाको खोपको एक मात्रा लगाएका यात्रुको भने पीसीआर रिपोर्ट साथमा नभए पनि हुन्छ तर सात दिन क्वारेन्टाइन बस्नुपर्छ । क्वारेन्टाइनमा बस्दा पीसीआर परीक्षण गर्नुपर्छ ।

ओमान

ओमान रोजगारीका लागि प्रवेश गर्ने विदेशी कामदारले कोरोनाको पीसीआर परीक्षण गर्नुनपर्ने भएको छ । विदेशी कामदारका हकमा ओमिक्रोन भाइरस फैलिएसँगै ओमान जाने कामदारले अनिवार्य होटल क्वारेन्टाइन बस्नुपर्ने नियम थियो । यो नियम पनि गत शुक्रबारबाट हटाइएकाे छ ।

ओमान सरकारले मान्यता दिएका खोप लगाएको क्यूआर कोडसहितको प्रमाणपत्र भएका यात्रुले हवाई मार्गबाट ओमान प्रवेश गर्नुपूर्व पीसीआर परीक्षण गर्नुनपर्ने ओमानस्थित नेपाली दूतावासले जनाएको छ ।

ओमानले आठवटा खोपलाई मान्यता दिएको छ । फाइजर, स्पुतनिक लाइट, स्पुतनिक भी, जोन्सन एण्ड जोन्सन, कोभिसिल्ड र एस्ट्राजेनेकालगायतका खोपलाई ओमानले मान्यता दिएको छ । जोन्सन एण्ड जोन्सन खोपका हकमा एक मात्रा र अन्य खोपका हकमा दुवै मात्रा लगाएको हुनुपर्छ ।

यसैगरी, ओमान सरकारको यसअघिको निर्णयअनुसार ओमानबाट यात्रा गर्ने क्रममा आवश्यक पर्ने यात्रा प्रमाणपत्र बनाउनुनपर्ने भएको छ । पीसीआर रिपोर्टलाई त्यहाँको स्वास्थ्य मन्त्रालयबाट प्रमाणीकरण पनि गर्नुपर्ने छैन । तर, नेपाल आउँदा ७२ घण्टा भित्रको पीसीआर रिपोर्ट र सीसीएमसीको फाराम भने भर्नुपर्छ ।

बहराइन

बहराइन सरकारले पनि विदेशी कामदारका हकमा लागू गरेको अनिवार्य पीसीआर परीक्षण र होटल क्वारेन्टाइन बस्नुपर्ने नियम हटाएको छ । बहराइन सरकारले आठवटा खोपलाई मान्यता दिएको छ ।

फाइजर, स्पुतनिक लाइट, स्पुतनिक भी, जोन्सन एण्ड जोन्सन, कोभिसिल्ड र एस्ट्राजेनेकालगायतका खोप लगाएका विदेशी कामदारले क्यूआर कोड देखाएपछि पीसीआर परीक्षण र होटल क्वारेन्टाइन बस्नुनपर्ने त्यहाँको अध्यागमनले जनाएको छ ।

बहराइनले खोप नलगाएका यात्रुलाई पनि बहराइन प्रवेशको अनुमति दिने निर्णय गरेको छ । तर, साथमा कोरोनाको पीसीआर परीक्षण नेगेटिभ भएको ७२ घण्टाभित्रको रिपोर्ट हुनुपर्छ भने सात दिन क्वारेन्टाइनमा बस्नुपर्छ ।

कोरोनाको खोपको एक मात्रा लगाएका यात्रुको भने पीसीआर रिपोर्ट साथमा नभए पनि हुन्छ । तर, सात दिन क्वारेन्टाइन बस्नुपर्छ । क्वारेन्टाइनमा बस्दा पीसीआर परीक्षण गर्नुपर्छ ।

दक्षिण कोरिया र इजरायलमा भने कोरोनाको महामारी उस्तै रहेको कारण कोभिड खोप, कोरोनाको पीसीआर रिपोर्ट र होटल क्वारेन्टाइनलाई अनिवार्य गरेका छन् । यी देश जाने नेपाली कामदारहरूले विदेशिनुअघि पीसीआर परीक्षण, ७ दिन होटल क्वारेन्टाइन र कोभिड खोप लगाएको हुनुपर्नेछ ।

प्रकाशित मिति: बुधबार, फागुन २५, २०७८ १४:३३