काठमाडाैंका पछिल्ला तीन सामूहिक आत्महत्या, आर्थिक संकट मुख्य कारण

A+ A A-

काठमाडौंको नागार्जुन नगरपालिका–६ डाँडापौवामा एकै परिवारका पाँच जना अचेत अवस्था फेला परे । जसमध्ये एक जनाको मृत्यु भइसकेको छ । सोमबार राति साढे ९ बजेतिर डाँडापौवास्थित एउटा घरको दोस्रो तलामा फ्ल्याट भाडामा लिइ बसेका ६२ वर्षीया इन्दिरामाया प्रधानको परिवारका पाँच जान अचेत अवस्थामा फेला परेकाे हुन् ।

अचेत भेटिएकाहरूमध्ये ३३ वर्षीय सुर्वणमान प्रधानको मृत्यु भएको काठमाडौं प्रहरी परिसरका एसपी दिनेश मैनालीले जानकारी दिए । इन्दिरामायासहित ३८ वर्षीय भीममान, ३५ वर्षीया मन्दिरा र ११ वर्षीया सुप्रियाको मनमोहन मेमोरियल अस्पताल स्वयम्भूमा उपचार भइरहेको छ । उनीहरूको अहिलेसम्म होस खुलेको छैन ।

प्रहरीका अनुसार उनीहरूले विषादी सेवन गरेर आत्महत्याको प्रयास गरेको खुलेको छ । प्रहरीले घटनास्थलबाट ‘सुसाइड नोट’ पनि फेला पारेको छ । नोटमा उल्लेख भए अनुसार चरम आर्थिक संकटका कारण प्रधान परिवारले सामूहिक आत्महत्याको बाटो रोजेको देखिएको काठमाडौं प्रहरी प्रमुख एसएसपी सुदीप गिरीले बताए ।

प्रहरीका अनुसार ३८ वर्षीय भीममान ट्याक्सी चालक हुन् भने उनकी श्रीमती मन्दिरा सहकारीमा काम गर्थिन् । सुसाइड नोटमा उनीहरूले आफूहरू मानसिक बिरामी भएको पनि उल्लेख गरेका छन् । प्रहरीका अनुसार सुसाइड नोट ६ पृष्ठ लामो छ । प्रहरीले आत्महत्याको बाटो रोज्नुको मूल कारणबारे अनुसन्धान जारी रहेको जनाएको छ ।

अचेत अवस्थामा रहेकाहरू बोल्ने अवस्थामा पुगे घटनाको तथ्य खुल्ने प्रहरीको भनाइ छ । उपत्यकामा आर्थिक समस्याका कारण सामूहिक आत्महत्याको बाटो रोज्ने प्रधान परिवार पहिलाे हैन । अघिल्लाे वर्ष पनि राजधानीमा यही प्रकृतिका अन्य दुईवटा घटना घटेका छन् । सामूहिक आत्महत्या प्रकरणमा सबैको ज्यान गएका कारण त्यसभित्रको खास कारण भने पत्ता लगाउन कठिन हुने प्रहरीको भनाइ छ ।

समाजको आपराधिक मनोवृत्तिको कारण मानिसहरू सामूहिक हत्यादेखि आत्महत्याको बाटोमा पुगेको प्रहरीको भनाइ छ । ६ माघ २०७७ मा ललितपुरको महालक्ष्मी नगरपालिका– ७, चाँगाथलीमा त्यस्तै प्रकारको घटना घटेको थियो ।

सप्तरी राजविराजका ३२ वर्षीय सागर पोखरेल र उनकी २० वर्षीया पत्नी निर्मला पोखरेल मृत फेला परेका थिए । उनीहरू दुवैले सल्फास नामक विषादी सेवन गरेर आत्महत्या गरेको खुलेको थियो । उनीहरू पनि आर्थिक कारणले नै सामूहिक आत्महत्याको बाटोमा पुगेको प्रहरीले जनाएको थियो ।

०७७ को भदौमा भक्तपुरको मध्यपुरथिमिमा पनि एकै परिवारका तीन जना मृत फेला परेका थिए । ३६ वर्षीय सुदीप अधिकारी, ३४ वर्षीया श्रीमती सम्झना र १६ वर्षीय छोरा सुशान्तको शव भेटिएको थियो ।

सम्झना र सुशान्तको विभत्स हत्या गरिएको थियो । सुदीप मृत फेला परेका थिए । घटनाको अनुसन्धान गर्दै जाँदा प्रहरीले आर्थिक कारणले सुदीपले श्रीमती र छोराको हत्यापछि आफूले विष सेवन गरेर आत्महत्या गरेको निष्कर्ष निकालेको थियो ।

मनाेविद् भन्छन्- आर्थिकसँगै आवेग पनि मुख्य कारण

माथिका फरक-फरक घटना केलाउँदा सामूहिक आत्महत्याका पछाडि आर्थिक कारण देखिन्छ । तर कारण जेसुकै भए पनि आवेगलाई नियन्त्रण गर्न नसक्दा मानिसहरू हत्यादेखि आत्महत्यासम्म पुग्ने गरेकाे मनोविद् पदमराज जोशीको बुझाइ छ ।

‘सामूहिक हत्या वा आत्महत्याको मूख्य कारण आवेग नै हो । त्यसमा मानिसकाे आर्थिक अवस्था र मनोदशाले ठूलो भूमिका खेल्ने गर्छ', जोशी थप्छन्, ‘ मानिसमा हिनताबोध हुन थालेपछि उनीहरू आत्महत्याको बाटो लिन पुग्छन् ।’ आर्थिक किचलो, अनैतिक सम्बन्ध र ठूलो महत्त्वाकांक्षा नै आवेगकाे कारण हुने गरेको उनी बताउँछन् ।

अपराधमा संलग्न व्यक्तिले आत्महत्या गर्दा अनुसन्धान गर्न र चित्तबुझ्दो निष्कर्ष निकाल्न प्रहरीलाई चुनौती थपिने गर्छ । घटना कसरी भयो ? किन भयोजस्ता प्रश्नको जवाफ खोज्न गाह्रो हुने पूर्वप्रहरी नायव महानिरीक्षक (डीआईजी) पूणचन्द्र जोशी बताउँछन् । ‘आत्महत्या मानिसको जटिल आपराधिक मनोदशा हो । प्रहरीले यस्तो अपराधको कारण खोजी गरेपछि यसको निराकरणका लागि सम्बन्धित पक्षले चासो दिनैपर्छ', जोशीले भने ।

सम्बन्धित समाचार

प्रकाशित मिति: मंगलबार, फागुन २४, २०७८ १३:३१