कृष्ण हमाल मृत्यु प्रकरण: सुर्खेतको सुब्बाकुना प्रहरीचौकी प्रमुखविरुद्ध किटानी जाहेरी

कृष्ण हमाल मृत्यु प्रकरण: सुर्खेतको सुब्बाकुना प्रहरीचौकी प्रमुखविरुद्ध किटानी जाहेरी

मृतक कृष्ण हमाल ।

A+ A A-

कालीकोटको तिलागुफा नगरपालिकाका ३४ वर्षीय कृष्ण हमाल शुक्रबार राति नेपालगञ्जबाट जुम्ला जाने मिनी ट्रकमा सवार थिए । ट्रकका चालक थिए, तिलकबहादुर शाही ।

पसलका लागि सामान दिएर जुम्ला हिँडेको ट्रक सुर्खेतस्थित सुब्बाकुना प्रहरी चेकपोष्ट पुगेपछि भने प्रहरीले चालकको सवारी चालक अनुमति पत्र (लाइसेन्स) माग्यो । चालक शाहीसँग लाइसेन्स थिएन ।

प्रहरीले लाइसेन्स नभएको भन्दै जरिवाना काट्नुपर्ने बतायो, जुन प्रहरीको स्वाभाविक प्रक्रिया हो । तर, जरिवाना काट्ने विषयमा चालक शाही र प्रहरीबीच केही भनाभन भयो । चालकसँगको विवादपछि हमाल पनि जंगिए । हमालले मादक पदार्थ सेवन गरेका थिए ।

प्रहरीसँग विवाद बढेपछि हमाललाई प्रहरीले चौकीभित्र लग्यो । चौकीभित्र लगेपछि भने प्रहरीले उनीमाथि निर्घात कुटपिट गरेको उनका आफन्त देवीकृष्ण पाण्डेको भनाइ छ । विवादपछि प्रहरीले ट्रकलाई त्यहाँबाट अघि बढ्न दिएन । ट्रक रोकेपछि चालक शाही र हमाललाई प्रहरीले छाड्यो ।

ट्रक चेकपोष्टमै छोडेर इन्ट्री गर्न रोकेको अर्को ट्रकमा चढेर उनीहरू सुर्खेत हिँडे । तर, ट्रक तीन सय मिटरजति अगाडि बढेपछि उनीहरू ओर्लिएर चौकी अगाडि रोकिएको आफ्नै ट्रकमा सुत्न फर्के । शुक्रबार राति उनीहरू ट्रकमै सुते । शनिबार बिहान ट्रक लिन सवारी लाइसेन्ससहितका अर्का चालक जाँदा उनीहरू ट्रकमै थिए ।

चालक अनुमति पत्र भएको ड्राइभरले ट्रक चलाउँदासम्म उनीहरू ठीकै थिए । तर, बीच बाटोमा पुगेपछि चालकहरूले चिया पिए । हमाल भने केही अप्ठ्यारो महसुस भएको भन्दै ट्रकबाट झरेनन् । असहज हुन थालेपछि चालक शाहीले लगत्तै हमाललाई सुर्खेत अस्पताल पुर्‍याए । तर, अस्पतालले हमाललाई मृत घोषणा गरिदियो ।

परिवारले हमालको प्रहरीको कुटपिटबाट ज्यान गएको आरोप लगाएको छ । उनको अण्डकोषभन्दा माथि ढाड र मुटुको छेउमा निलडाम छ । शाहीले समेत प्रहरीले आफू र हमाललाई चेकपोष्टमा कुटपिट गरेको बताएका छन् ।

तर, सुर्खेत प्रहरी प्रमुख एसपी पदम विष्टले भने ट्रक चालक शाही र हमालले दुवैले मादक पदार्थ सेवन गरेकाले चेकपोष्टमा रहेको प्रहरीसँग केही भनाभन भए पनि कुटपिट नगरेको बताए । हमालको पोष्टमार्टम रिपोर्ट आएपछि मृत्युको कारण खुल्ने उनले बताए ।

‘चालक र मृतक हमाल दुवैले मादक पदार्थ सेवन गरेका थिए । चालक अनुमति पत्र पनि थिएन । अनुमति पत्र नभएपछि चेकपोष्टमा ट्रक रोकेर उनीहरूलाई पठाएको देखिन्छ । हामी थप अनुसन्धान गर्दैछौँ, प्रहरीका तर्फबाट केही कमजोरी छ भने कारबाही हुन्छ,’ एसपी विष्टले भने ।

मृतकका आफन्तले भने चेक पोष्ट सुब्बाकुनाका प्रमुख प्रहरी सहायक निरीक्षक (असई) शेरसिंह धामीविरुद्ध ज्यान मुद्दामा किटानी जाहेरी लिएर जिल्ला प्रहरी कार्यालय पुगेका छन् । जाहेरी दर्ताको तयारी भएको एसपी विष्टले बताए । विवादमा तानिएपछि धामीलाई सुब्बाकुनाको इन्चार्जबाट हटाएर जिल्ला प्रहरी कार्यालयमा तानिएको छ ।

हमालको मृत्यु नभई प्रहरीको कुटपिटबाट हत्या भएको भन्दै स्थानीयले शनिबार प्रहरी चौकीमा ढुंगामुढा गर्नुका साथै सुर्खेतमा प्रदर्शन गरेका थिए । प्रदर्शनले उग्र रूप लिएपछि भने घटनाको छानबिन गर्न जिल्ला प्रशासन कार्यालय सुर्खेतले सहायक प्रमुख जिल्ला अधिकारी ईश्वरी प्रसाद पाण्डेको संयोजकत्वमा तीन सदस्यीय समिति गठन गरेको छ ।

शनिबार जिल्ला प्रशासन कार्यालयमा बसेको जिल्ला सुरक्षा समितिको बैठकले पाण्डेको संयोजकत्वमा तीन सदस्यीय छानबिन समिति गठन गरेको हो । समितिलाई तीन दिनभित्र सत्य तथ्य छानबिन गरी प्रतिवेदन पेस गर्न भनिएको छ ।

प्रकाशित मिति: आइतबार, फागुन २२, २०७८ १३:२७