निर्मला कुर्मी बेपत्ता प्रकरण: सीआईबीले थाल्यो अनुसन्धान, नामसारी भएको जग्गाको फाइल पल्टाउँदै

निर्मला कुर्मी बेपत्ता प्रकरण: सीआईबीले थाल्यो अनुसन्धान, नामसारी भएको जग्गाको फाइल पल्टाउँदै

फाइल तस्वीर ।

A+ A A-

बाँकेकी निर्मला कुर्मी बेपत्ता प्रकरणबारे प्रहरीको केन्द्रीय अनुसन्धान ब्युरो (सीआईबी) को टोलीले स्थलगत अनुसन्धान थालेको छ ।

उनलाई शंकास्पद तरिकाले बेपत्ता पारिएको भन्दै गत वर्ष प्रहरीमा उजुरी परेको थियो । सोही घटनाको अनुसन्धानमा सीआईबीको टोली लागेको हो । सीआईबीले कुर्मीको अनुसन्धान गर्न प्रहरी उपरीक्षक (एसपी) कमल थापाको नेतृत्वमा एक टोली गठन गरेर अनुसन्धान थालेको सीआईबी प्रमुख प्रहरी नायब महानिरीक्षक (डीआईजी) धीरजप्रताप सिंहले जानकारी दिए ।

एसपी थापा नेतृत्वको टोलीका अनुसन्धान अधिकारी डीएसपीसहितको टोली केही दिनअघि नै स्थलगत अनुसन्धानका लागि नेपालगञ्ज पुगेर फर्किएको डीआईजी सिंहले बताए । ‘हामीले निर्मला कुर्मी बेपत्ता घटनाको अनुसन्धान थालिसकेका छौँ । यसअघि नै उजुरी परेका र मुद्दा चलाइएका शंकास्पद व्यक्तिको बयान लिने काम पनि गरिरहेका छौँ,’ डीआईजी सिंहले भने, ‘अर्को महत्त्वपूर्ण कुरा निर्मला कुर्मीको नाममा रहेको जग्गा कसरी नामसारी भएको छ, त्यो पाटोबाट पनि हेर्दैछौँ ।’

निर्मलाको नाममा रहेको जग्गा र नामसारी भएको कागजात सीआईबीले नियन्त्रणमा लिएर त्यसको अनुसन्धान थालेको छ । कुर्मीलाई उनकै छिमेकी कांग्रेसका पूर्वसांसद बादशाह कुर्मीले सम्पत्ति हडपेर बेपत्ता पारेको आरोप लागेको छ । उनीमाथि अनुसन्धानको माग गर्दै नेपालगञ्जबाट २० दिन पैदल हिँडेर गत कात्तिकमा रुबी खानलगायत महिला अधिकारकर्मी र पीडित परिवारका आफन्त काठमाडौं पुगेका थिए ।

सीआईबीले अनुसन्धान गर्ने सहमतिपछि अधिकारकर्मी काठमाडौंबाट फर्किएका थिए । कुर्मीको करिब पाँच बिघा जग्गा अरुकै नाममा नामसारी भएको देखिएको छ । अधिकारकर्मीले बादशाह कुर्मीसहित कृष्णमुरारी सिंह, कुवरबबन सिंह, उर्मिला कनोजिया, अम्मरलाल कुर्मी, धिरेन्द्र सिंह, रमेश थापा र पार्वती विष्टलाई तत्काल पक्राउ गरी गहिरो अनुसन्धान गर्नुपर्ने माग राख्दै आएका छन् ।

यस्तो छ घटना

नेपालगञ्ज नगरपालिकासँग जोडिएको साविक परस्पुर गाविसकी हुन्, निर्मला कुर्मी । निर्मलाका पति महालु कुर्मी २०६२ सालमा बिते । दुई छोरासहित निर्मला परस्पुरमै बस्दै आएकी थिइन् । चार वर्षपछि २०६६ सालमा रहस्यमय ढंगले १५ दिनको अन्तरमा उनका १४ वर्षका छोरा राम सागर र १८ वर्षका सुरेशको पनि मृत्यु भयो ।

पहिले कुनै समस्या नभएका उनीहरू एकाएक बिरामी परेर बितेपछि निर्मला एक्लै भइन् । त्यही बेलादेखि निर्मलाको सम्पत्ति हडप्न षड्यन्त्र भएको दाबी स्थानीयकाे छ । पीडितको आरोपलाई बल पुग्ने गरेर श्रीमान् र दुवै छोरा गुमाएपछि उनीहरूको नाममा रहेको ५ बिघा जग्गाको लालपुर्जा, नागरिकता र नाता कायमसम्बन्धी कागजपत्र कांग्रेसका पूर्वसांसद बादशाह कुर्मीले नै नियन्त्रणमा राखेका थिए ।

विवाद र प्रशासनसम्म उजुरी परेपछि बादशाहले कागजपत्र फिर्ता गरेका थिए । त्यतिबेला समेत अधिकारकर्मी रुबी खानलगायत अधिकारकर्मीले सो घटनाको विरोध गर्दै प्रदर्शन गरेका थिए । खान पनि परस्पुरकै हुन् । त्यसको तीन वर्षपछि २०६९ सालमा निर्मलाको जग्गा नामसारी भएको देखिन्छ । जग्गा नामसारी भएको ६ वर्षपछि २५ माघ ०७५ देखि निर्मला कुर्मी एकाएक सम्पर्कबिहीन भइन् । उनले भारतमा बिहे गरेको चर्चा चल्याे । तर, त्यसको २ वर्षपछि भारतमै मृत्यु भएको खबर गाउँमा फैलियो ।

उक्त हल्लापछि भने निर्मलाको अपहरण तथा शरीर बन्धक बनाएर हत्या गरेको आरोपमा महिला अधिकार मञ्चले गत वर्ष मंसिर १६ मा पूर्वसांसद कुर्मीसहित आठ जनाविरुद्ध जिल्ला प्रहरी कार्यालयमा जाहेरी दर्ता गराएको थियो । सोही जाहेरीमा अनुसन्धान नभएको भन्दै अधिकारकर्मी र स्थानीय महिलाले आन्दोलन थालेको थियो । पक्राउ गरेर अनुसन्धान गर्नुको सट्टा प्रहरीले उनलाई उन्मुक्ति दिएकाले आन्दोलन गर्नु परेको अधिकारकर्मी रुबी खानले बताउँदै आएका छन् । मुख्य आराेपित कांग्रेस नेता बादशाह कुर्मी बाँके पार्टी सभापति उठेका छन् ।

प्रकाशित मिति: बिहीबार, फागुन १९, २०७८ १७:३४