इजरायल जाने एक हजार कामदारकाे श्रम सम्झौता, महिना दिनभित्र पठाइने

A+ A A-

इजरायलका रोजगारदाता कम्पनीसँग एक हजार नेपाली कामदार रोजगारीमा पठाउन दोहोरो श्रम सम्झौता गरिएको वैदेशिक रोजगार विभागले जनाएको छ ।

दुई महिनाअघि विभागले स्वास्थ्य परीक्षण पूरा गरेका एक हजार १ सय ७५ युवाको रोजगार सम्झौताका लागि नामावली इजरायल पठाएको थियो ।

गोला प्रथाबाट अन्तिम छनोटमा परेका एक हजार १ सय ७५ मध्ये रोजगार सम्झौताका लागि यही सातासम्म एक हजार ८ जनाको नामावली प्राप्त भइसकेको विभागका निर्देशक श्रीचन्द्र साहले जानकारी दिए ।

इजरायलको जनसंख्या तथा अध्यागमन कार्यालय र नेपालस्थित इजरायली दूतावासले रोजगारीका लागि छनोट भएका श्रमिकको भिसा प्रक्रियामा काम गरिरहेको विभागले जनाएको छ । इजरायलको दीर्घकालीन स्याहार केन्द्रमा पठाइनेमध्ये अधिकांश सहायक श्रमिकको करार सम्झौता (एसईसी) प्राप्त हुने क्रममा रहेको विभागले जनाएको छ ।

दोहोरो रोजगारी सम्झौता भएका कामदारको भिसा प्रक्रियाको काम सुरु भएसँगै हाल अभिमुखीकरण तालिम दिने काम भइरहेको विभागका निर्देशक साहलले बताए ।

‘नेपालस्थित इजरायली दूतावासले रोजगार सम्झौता भएका थप युवाको भिसा लगाउने काम जति चाँडो गर्छ, त्यति नै छिटो कामदार पठाउने तयारी भइरहेको छ’, उनले भने, ‘यहि साता एक हजार आठ युवााकाे इजरायलको रोजगारदातासँग दोहोरो रोजगार सम्झौताको नामावली आइसकेको छ । अब सोहीअनुसार कामदार पठाउने तयारी भइरहेको छ ।’

इजरायलका लागि रोजगार सम्झौता गरेका श्रमिकलाई महिना दिनभित्र पठाउने तयारी भइरहेको छ । तर, कोरोना संक्रमण र इजरायलमा श्रमिक आन्दोलन चलिरहेको कारण प्रक्रिया भने केही ढिलो हुने विभागका निर्देशक शाह बताउँछन् ।

हाल, इजरायलमा श्रमिक आन्दोलन चलिरहेको छ । जसका कारण नेपाली कामदार पठाउन केही ढिलाइ भएको उनको भनाइ छ । इजरायलको रोजगारीमा नेपाल पक्षबाट भने सबै काम पूरा हुने क्रममा रहेको निर्देशक साहले जानकारी दिए ।

विभागले रोजगार सम्झौताका लागि इजरायल पठाइएका नामावली मध्येबाट रोजगारदाताले एक पक्षीय सम्झौता गरेर दोस्रो पक्ष श्रमिकको हस्ताक्षरका लागि नामावली दैनिक रूपमा पठाइरहेका छन् ।

विभागका अनुसार प्राप्त करार सम्झौता पत्रमा सम्बन्धित उम्मेदवारबाट पाँच दिनभित्र सम्झौता गराई इजरायलको जनसंख्या तथा अध्यागमन विभाग (पिवा) मा पठाउन तथा भिसा प्रक्रियाका लागि इजरायली दूतावासको कन्सुलर डिभिजनमा पठाइने छ ।

यसका लागि विभागले व्यावसायिक तथा सीप विकास तालिम प्रतिष्ठान, भैंसेपाटी, ललितपुरमा आवश्यक कागजात संकलन, हस्ताक्षर र अभिमुखीकरणको काम गरिरहेको छ । हाल, रोजगार सम्झौता गरिएका बाहेक थप कामदारको पनि नामावली सम्झौताका लागि आइसकेको विभागले जनाएको छ ।

विभागका अनुसार अन्तिम नामावलीमा परेका एक हजार १ सय ७५ मध्ये स्वास्थ्य परीक्षण पास गरेका र अन्य समस्या नभएका सबैलाई पठाइनेछ । हाल सम्झौता भएका आठ सयभन्दा बढी युवालाई दुई दिने अभिमुखीकरण तालिम दिने काम भइरहेको छ ।

रोजगार सम्झौता भएका श्रमिकलाई छिटोछरितो पठाउने सम्बन्धमा विभाग र इजरायल पक्षबीच नियमित रूपमा छलफल भइरहेको विभागले जनाएको छ ।

पछिल्लो समय विश्वभर ओमिक्रोन भाइरस देखिएपछि उडान अनुमतिका लागि केही ढिलो भएको विभागले जानकारी दिएको छ ।

प्रकाशित मिति: बुधबार, फागुन १८, २०७८ १५:१८