विप्लव समूहले किन राख्दैछ सडकमा जनता तर्साउने ‘बम’ ?

A+ A A-

बानेश्वरस्थित संसद भवनअगाडिको मूलगेटमै सोमबार शंकास्पद वस्तु फेला पर्‍याे । शंकास्पद वस्तु फेला परेका कारण बानेश्वर क्षेत्रको सवारी आगमनमा केही समय रोकिएको थियो ।

प्रेसर कुकुरमा तारले बेरेर ‘नो एमसीसी’ लेखिएको थियो । उक्त वस्तुलाई नेपाली सेनाको बम डिस्पोजल टोलीले निष्क्रिय पार्ने प्रयास गरेको थियो । तर, शंकास्पद वस्तु बम नभई ‘होक्स’ (तर्साउने उद्देश्यले राखेको वस्तु) कुकर भएको पुष्टि भयाे । कुकरभित्र इँटाको टुक्रा र कागज फेला परेको थियो । कुकरभित्र कुनै पनि विस्फोटक पदार्थ थिएन ।

आइतबार संसदबाट अमेरिकी सहयोग परियोजना (एमसीसी) बहुमतले अनुमोदन गरेपछि अज्ञात समूहले होक्स राखेको प्रहरीको भनाइ छ । यसरी होक्स राख्ने क्रम अझै रोकिएको छैन । मंगलरबार पनि भक्तपुरको कौशलटारमा भेटिएको शंकास्पद वस्तु नेपाली सेनाको बम डिस्पोजल टोलीले निष्क्रिय पारेको छ ।

बिहान शंकास्पद वस्तु भेटिएपछि स्थानीय बासिन्दाले प्रहरीलाई खबर गरेका थिए । आज फेला परेको शंकास्पद वस्तु पनि होक्स भएको प्रहरीको भनाइ छ ।

किन राखिँदैछ होक्स ?

संसदबाट एमसीसी पास भएको विरोधका नेत्रविक्रम चन्द (विप्लव) नेतृत्वको नेपाल कम्युनिस्ट पार्टीसहित अन्य छ राजनीतिक दल विरोधमा उत्रिएका छन् । सोमबार उनीहरूले देशव्यापीरूपमा बन्दको घोषणासमेत गरेका थिए । सोही समूहले उपत्यकालगायत विभिन्न ठाउँमा शंकास्पद वस्तु राखेको आशंका प्रहरीले गरेको छ ।

तर, यसरी शंकास्पद वस्तु काठमाडौं र भक्तपुरमा राख्ने कसैलाई पनि प्रहरीले नियन्त्रणमा लिन सकेको छैन । सोमबार काभ्रेमा शंकास्पद वस्तु राखेको आरोपमा काभ्रे प्रहरीले दुई जनालाई पक्राउ गरेको छ ।

उनीहरू दुवै जना विप्लव नेतृत्वको पार्टीका कार्यकर्ता भएको काभ्रे प्रहरीको भनाइ छ । प्रहरी स्रोतका अनुसार देशभर एमसीसी पासको विरोधमा होक्स राखेर सर्वसाधारलाई तर्साउने विप्लव समूहकै कार्यकर्ता हुन् ।

‘सोमबार बानेश्वरमा शंकास्पद वस्तु पनि विप्लवकै कार्यकर्ताले राखेको हाम्रो आशंका छ,’ एक प्रहरी अधिकारीले भने, ‘शंकास्पद वस्तु राख्नासाथ विप्लव निकट पत्रकारले फोटो खिचेर सार्वजनिक गरेको देखिन्छ । उनीहरूको फोन सम्पर्क विप्लव नेतृत्वकाे पार्टीका नेता खड्क विश्वकर्मा ‘प्रकाण्ड’सँग पनि भएको देखिन्छ ।’

फोटो खिच्ने विप्लवनिकट एक अनलाइन पोर्टलका दुई जना पत्रकारसँग पनि प्रहरीले सोधपुछ गरिरहेको छ । काठमाडौं प्रहरी परिसरका एसपी दिनेश मैनालीले होक्स राख्ने समूहमाथि प्रहरीले निगरानी बढाउँदै गएको बताए । ‘अहिलेसम्म कोही पक्राउ परेका त छैनन् । तर, हामी खोजीमा छौँ,’ उनले भने ।

प्रकाशित मिति: मंगलबार, फागुन १७, २०७८ १२:३५