अन्तर्राष्ट्रिय मञ्चसम्म छाएको सोनामको ‘फेसन डिजाइनिङ’ यात्रा

A+ A A-

खाली समय हुनासाथ हातमा कापी र कलम । इलामका सोनाम सुब्बा लिम्बु चित्र कोरिरहेका भेटिन्थे । बायोमेडिकल इन्जिनियरिङ गरे पनि उनको चासो फेसन डिजाइनिङमा थियाे । घरमा आउने जोकोहीले पनि उनको रुचिलाई चासोपूर्वक हेर्थे । एकदिन उनकी दिदीले उनले कोरेका डिजाइनहरू नियालिरहेकी थिइन् । सोनामको कपडाको डिजाइन गर्ने कौशलको उनले प्रशंसा उनले गरिन् ।

‘मेरो साथी र उसकी छोरीका लागि कपडा डिजाइन गर्ने ?,’ दिदीले सोधिन् । अब सोनामले आफ्नो सीपलाई आय आर्जन गर्ने स्रोत बनाए । पहिलोपटक पैसा लिएर दिदीको साथी र उनकी छोरीका लागि सारी र लेहेङ्गा डिजाइन गरे ।

सोनामसँग फेसन डिजाइनिङको औपचारिक शिक्षा थिएन । यद्यपि उनले यो काममा चासो दिएर सिकिरहेका हुन्थे । आफूले गर्न सक्ने विश्वास पर्याप्त थियो । त्यसैले दिदीको प्रस्ताव स्विकारेको उनी बताउँछन् ।

सोनामको कपडा डिजाइन

अन्ततः सोनामले कपडा डिजाइन गरे । दिदीको साथीले पनि उनको डिजाइन मन पराइन् । दिदीले लगाएको देखेपछि सोनामको कपडा डिजाइनिङको प्रशंसा गर्ने पनि थुप्रै भए । र, यसरी साधारण चासोबाट सुरु भएको डिजाइनिङ यात्राले जन्मायो – सोनाम सुब्बा लिम्बु, एसएसएल डिजाइन ।

अहिले लिम्बुले छजना कर्मचारी राखेर काम गरिरहेका छन् । उनका अनुसार ‘हेन्डमेड कस्टमाइज डिजाइन’हरू गर्ने गर्छन् । ग्राहकको माग अनुसार डिजाइनिङदेखि सिलाईकटाइसमेत आफैँ गर्छन् ।

उनीहरूसँग देशभित्र र बाहिरका क्लाइन्टहरू छन् । जनशक्तिले भ्याएसम्म अर्डर लिने गर्छन् । सोनामसहित ६ जना जनशक्ति त्यहाँ काम गर्छन् । एक महिनामा लगभग १५ देखि २० वटा लेहेङ्गा, सारीजस्ता कपडा बनाउने अर्डर लिन्छन् । महिनाको डेढदेखि दुईलाख रुपैयाँसम्मको कारोबार हुने लिम्बु बताउँछन् ।

सोनामले डिजाइन गरेको कपडामा सजिएकी मिस यूनिभर्स नेपाल २०२०, आंशिका शर्मा

व्यवसायमा राम्रो गरिरहेका सोनामको पहिला भने डाक्टर, इन्जिनियर बन्ने सपना थियो । त्यसैले उनले बायोमेडिकल इन्जिनियरिङमै औपचारिक शिक्षा लिए । ‘भविष्यमा डाक्टर, इन्जिनियर नै बन्नुपर्छ ! अरु जागिरमा राम्रो भविस्य हुन्छ र ? भनेर मैले पनि सोचिरहेको हुन्थेँ,’ उनले सुनाए, ‘तर, अहिले यसबाटै धेरै कमाउँछु, रमाइ पनि रहेकाे छु ।’

इलाममा कक्षा १० को पढाई सकेर साेनाम उच्च शिक्षाका लागि उनी काठमाडौं आइपुुगे । इन्जिनियरिङ आफ्नो रुचि बाहिर नभएकोले सहजै बायोमेडिकल इन्जिनियरिङको पढाइ पूरा गरे । अनि सोही क्षेत्रमा केही समय जागिर पनि खाए । यद्यपि नजादिँदो तरिकाले उनले फेसन डिजाइनिङमा व्यवसाय गर्न पुगे ।

सानोमा डिजाइनिङको काममा चाख राखे पनि यसमै केही गर्न सकिएला भन्ने सोनामले कल्पनासमेत गरेका थिएनन् । कहिले कपडा डिजाइन गर्थे, कहिले तिनमा बुट्टा भर्थे । यस्तै काममा आफ्नो फुर्सदको समयको सदुपयोग गर्थे ।

फेसन डिजाइनिङलाई आफ्नो सोखको रूपमा मात्र उनले लिएका थिए । ‘यसबाट कमाउन सकिएला भन्ने त कल्पनासमेत थिएन । तर, नजादिँदो तरिकाले म यसमै व्यवसाय गर्ने भएँ,’ उनले सुनाए ।

कोरोना माहामारीमा घरमै रहँदा उनले आफ्नो सीपलाई व्यवसायमा बदलेका हुन् । उनकाअनुसार त्यहीबेला उनको दिदीको साथीको लागि कपडा डिजाइन गर्ने काम उनले पाएका थिए । त्यसपछि अन्य साथीहरूको काम पनि उनले पाउन थाले । महिनामै एकदुईटा कपडाको डिजाइन गर्ने काम उनले पाउन थाले ।

दिदीको साथी सर्कलबाटै कामहरू बढ्न थाले । त्यसपछि उनले सन् २०१७ मा एउटा कोठा भाडामा लिएर काम सुरु गरे । त्यसबेला दुईजना कर्मचारी उनले राखेका थिए । पछि कम्पनी विकसित हुँदै गएपछि फ्ल्याट नै लिएर काम सुरु गरे ।

अहिले ‘एसएसएल डिजाइन’मा छजना कर्मचारी छन् । औपचारिक रूपमा सुरु भएको तीन वर्षमै उक्त कम्पनीले राष्ट्रिय–अन्तराष्ट्रिय ख्याती कमाइसकेको छ । ‘मिस यूनिभर्स’देखि नेपालकै सुप्रसिद्ध मोडलहरूको कपडाको ‘मोडल’ तयार गरिसकेको छ, सोनाम कम्पनीले । मिस यूनिभर्स आंशिका शर्मालगायतले उनले डिजाइन गरेका कपडाको प्रयोग गरेका छन् ।

सोनामले डिजाइन गरेको कपडामा सजिएकी मिस यूनिभर्स नेपाल २०२१, सूजिता बस्नेत

पहिलोपटक औपचारिक रूपमा कम्पनी संचालन गर्दा दिदीको साथीको कपडा डिजाइन गरेको पैसाको सदुपयोग उनले गरेको थिए । त्यहाँबाट आएको दश हजार रुपैयाँलाई प्रयोग गरेर नै उनले कम्पनी विस्तार गर्दै लगे ।

‘सुरुमा त त्यही दिदीको साथीबाट आएको दश हजार चलाएँ । त्यही बढेर अहिले पाँच जना कर्मचारी राख्ने हैसियतमा पुगेको हो,’ सोनामले भने, ‘कम्पनीलाई शून्यबाट सुरु गरेको भने पनि हुन्छ । यसलाई थप विस्तार गर्दै अन्तराष्ट्रिय मञ्चमा उपस्थिति जनाउने इच्छा छ ।’

प्रकाशित मिति: मंगलबार, फागुन १७, २०७८ ०७:२४