चिनियाँ राष्ट्रपति सीसँगको भेटपछि गले ट्रम्प !

A+ A A-

अमेरिका र चीनबीच पुनः व्यापार वार्ता हुने भएको छ । केही महिनाअघि व्यापार वार्ता चलिरहेको समयमा अमेरिकी राष्ट्रपति डोनाल्ड ट्रम्पले चिनियाँ सामानमाथि कर बढाएपछि व्यापार वार्ता ठप्प भएकाे थियो ।

विश्वव्यापी रुपमा आर्थिक शिथिलता पैदा भएका बेला दुई नेताबीच व्यापारिक वार्ता सुरु गर्ने सहमति भएको हो ।

चिनियाँ राष्ट्रपति सी जिनपिङसँग जी–२० शिखर सम्मेलनका क्रममा जापानमा भएको भेटवार्तापछि राष्ट्रपति डोनाल्ड ट्रम्पले अब अमेरिकी प्रविधि कम्पनीलाई चिनियाँ कम्पनी हुवावेलाई सामान बिक्री गर्न अनुमति दिने बताएका छन् ।

अघिल्लो महिना मात्रै अमेरिकाले हुवावेसँग कारोबार गर्न अमेरिकी कम्पनीलाई रोक लगाएपछि गुगलसहितका अमेरिकी कम्पनीले हुवावेसँग कारोबार नगर्ने उल्लेख गरेका थिए ।

भेटवार्तापछि ट्रम्प थप ३ खर्ब डलर बराबरका चिनियाँ आयातमा शुल्क बढाउने निर्णयबाट पनि पछि हटेका छन् । दुई राष्ट्रपतिबीचको व्यापार वार्तालाई राष्ट्रपति ट्रम्पले दुवै पक्षको विजयको रूपमा प्रस्तुत गरेका छन् । तर, त्यसले बेइजिङलाई हुवावेले चाहेकोजस्तै सहमतिका रुपमा हेरिएको छ ।

यसअघि ट्रम्प प्रशासनले हुवावे कम्पनीलाई राष्ट्रिय सुरक्षामा खतरा भन्दै व्यापारिक सम्बन्ध सीमित राख्न अमेरिकी प्रविधि कम्पनीलाई आग्रह गरेको थियो ।

तर, पछिल्लो टिप्पणी गर्दै राष्ट्रपति ट्रम्पले अमेरिकी कम्पनीलाई हुवावेलाई बिक्री वितरण गर्न पुनः अनुमति दिँदा त्यसले राष्ट्रिय सुरक्षामा कुनै प्रभाव नपार्ने बताएका छन् ।

ट्रम्पको पछिल्लो निर्णयको विपक्षी डेमोक्रेटिक र रिपब्लिकन दुवै पार्टीका नेताले आलोचना गरेका छन् । रिपब्लिकन सिनेटर मार्को रुबियोले त्यसलाई भयंकर गल्ती भएको बताएका छन् ।

सिनेटमा डेमोक्र्याटका सबभन्दा वरिष्ठ सदस्य चक सुमरले राष्ट्रपति ट्रम्पले चीनको व्यापारिक व्यवहार परिवर्तन गराउने अमेरिकी क्षमतामा नाटकीय ह्रास ल्याइदिएको टिप्पणी गरेका छन्।

प्रकाशित मिति: आइतबार, असार १५, २०७६ १९:१३