अस्ट्रेलियाबाट फर्केपछि अनुष्काको यात्रा : मिस नेपालदेखि ‘माक्कुसे’सम्म

A+ A A-

‘अनुष्का ! यो गुँदपाक साह्रै मीठो है ?’

‘खोइ दाइ !,’ गुँदपाक नचाखेकी अनुष्काले दाइको प्रश्नलाई यत्तिकैमा टारिन् ।

‘एकपटक चाख त । मनपर्छ होला तिमीलाई !’

दाइले नै भनिसकेपछि नचाखी धरै भएन । उनले गुँदपाकको स्वाद लिइन् ।

‘वाओ ! कस्तो मीठो,’ गुँदपाकको स्वादमा अनुष्का लोभिइन् ।

व्यवसाय गर्ने हुटहुटी बोकेकी अनुष्कालाई गुँदपाक चाखेपछि यसैमा केही गर्ने सोच आयो । अस्ट्रेलिया गएर व्यवसाय संकायमा स्नातक गरेकी उनले यसलाई व्यवसायमा बदल्नेबारे विचार गरिन् । कुन क्षेत्रमा व्यवसाय गर्ने यकिन नभएकी उनलाई गुँदपाकको स्वादले नयाँ आइडिया दियो ।

गुँदपाक चाख्दा त्यसको स्वादले अनुष्काको मुख भरियो । त्यसैले उनले आफ्नो कम्पनीको नाम राखिन् – माक्कुसे । नेवारी भाषामा माक्कुसेको अर्थ ‘मुखै भरिने गरी मीठो हुने’ भन्ने बुझिन्छ । र त अनुष्का ‘माक्कुसे च्वँ’ भन्दै ग्राहकलाई पुष्टकारीको स्वादको बयान गर्छिन् ।

हिजोआज अनुष्का माक्कुसेमै व्यस्त छिन् । ‘माक्कुसेलाई अझ माथि के गरि लैजान सकिएला ?’ यिनै प्रश्नको जवाफ खोज्न लागिपरेकी छिन् । यसरी व्यवसायमा सक्रिय अनुष्कामा पढाइको सिलसिलामा अस्ट्रेलिया पुगेपछि मात्र यो क्षेत्रमा लाग्ने हुटहुटी पलायो ।

नेपालमा रहँदासम्म उनले व्यवसायबारे सोचेकीसम्म थिइनन् । १८ वर्षको उमेरसम्म नेपालमै राम्रो जागिर खाएर जीवन चलाउने कुरामै उनको ध्यान थियो । तर, अस्ट्रेलिया पुग्नु उनका लागि जीवनको ‘टर्निङ प्वाइन्ट’ बन्यो ।

यद्यपि अनुष्काको अस्ट्रेलियाको बसाइ सहज भने थिएन । पढ्नका निम्ति विदेशिएको भए पनि कलेजको पैसा तिर्न केही काम गर्नैपर्ने थियो । पढाइ सुरु गरेको तीन महिनाभित्र म्याक्डोनाल्ड्समा ‘कस्टमर सर्भिस’को काम सुरु गरिन् । म्याक्डोनाल्ड्समा उनको काम अर्डर लिने, प्याक गर्ने र क्लिनिङ गर्ने थियो ।

पढ्न भनेर अस्ट्रेलिया पुगेकी उनलाई उक्त काम स्वीकार्नै चुनौती पर्‍यो । अलिबार त्यस्ता कामहरूमा बानी पर्न अनुष्कालाई गाह्रो भयो । ‘श्रमको सम्मान गर्नुपर्छ भन्ने कुरा बोल्दै, बुझ्दै गरेको भए पनि आफैँले त्यस्तो काम गर्दा अनेक सोच आयो । मैले यस्तो काम किन गर्नुपरेको जस्तो लाग्थ्यो’, उनले अस्ट्रेलियाका दिनहरू सम्झिइन्, ‘अस्ट्रेलिया गएको एक वर्ष नपुग्दै पढ्दै काम गर्नुपरेपछि दिक्दारीले नेपाल फर्कन पनि मन लाग्यो ।’

यद्यपि अस्ट्रेलियामा गरेको कामले नै उनको सोच थप विकसित बनायो । श्रमको सम्मान गर्नुपर्छ भनेर अस्ट्रेलियाले नै उनलाई व्यवहारमा सिकायो । तीनवर्षे पढाइको दौरान उनले पढ्दै काम गर्दै बिताइन् । त्यसपछिको दुई वर्ष अस्ट्रेलियाकै बैंकमा काम गरिन् ।

अस्ट्रेलियामा रहँदा उनलाई मिस नेपालमा लड्ने रहर जाग्यो । त्यसका लागि बैंकको काम छोडेर मिस नेपालमा भाग लिइन् । ‘गरिरहेको बैंकको काम किन चटक्कै छोडेको भन्ने प्रश्न आउँथ्यो । कतिले त 'मिस नेपालले धेरै पेसा दिन्छ र ?' भनेरसमेत सोधे,’ उनले नेपाल फर्कंदाको प्रसंग सुनाइन्, ‘आखिर नेपाल आउने सोच पहिल्यैदेखि थियो । यही मौकामा किन नआँट्ने भनेर मिस नेपाल टार्गेट गरेर फर्किएँ ।’

यसरी नेपाल फर्किएकी अनुष्काले अन्तत: जितिन्– मिस नेपाल वर्ल्ड, २०१९ ।

त्यसपछि मिस वर्ल्डको गन्तव्य अनुष्काले बनाइन् । र, ब्युटी विथ पर्पोजसँगै अन्य उपाधिहरू हात पारिन् । यसपछि उनले जीविकोपार्जनका लागि व्यवसाय गर्ने सोच बनाइन् ।

सोहीताका उनको मुखमा पर्‍यो– नेवारी परिकारअन्तर्गत पर्ने गुँदपाक (पुष्टकारी) ।

व्यवस्थापन विषयमा स्नातक गरेकाले उनी व्यवसाय गर्ने तरिकाबारे जानकार नै थिइन् । अस्ट्रेलियाको स्कुलिङले नै उनलाई यहाँसम्म ल्याएको थियो । त्यसैका आधारमा व्यवसायमा फड्को मार्ने सोच उनमा आएको थियो ।

गुँदपाकले माक्कुसे स्थापना गर्ने उपाय दिएपछि कम्पनी सुरु गरिन् । अहिले माक्कुसेले बनाएका गुँदपाकलाई पुरानो स्वादको झझल्को दिने खालको रहेछ भनेर ग्राहकहरूले प्रतिक्रिया दिने उनले बताइन् । ग्राहकको प्रतिक्रियाले नै उनी सन्तुष्ट देखिन्छिन् ।

माक्कुसेमा प्रत्येक्ष रूपमा काम गर्ने आठ जना छन् । अप्रत्यक्ष रूपमा दिनमा ३० जना काममा जोडिन्छन् । माक्कुसेमा कसैले नेपाली समय त हो नि भन्दै ढिलो गर्न पाउँदैनन् । ‘नेपाली त हो नि १०–२० मिनेट ढिलो भयो भनेर कोही कसैले भन्न पाउँदैन । अहिले ‘नेपाल टाइम’ हो कसैले ढिलो गर्दैनन्,’ समय व्यवस्थापनमा अनुष्का प्रतिबद्ध सुनिइन् ।

सन् २०२० मा माक्कुसे सुरु गर्दा जम्मा चार जना कर्मचारी थिए । जसमा गुँदपाक पकाउनेमा दुई जना, फ्याक्ट्री हेर्नेमा एक जना र अर्का आशिंक रूपमा काम गर्ने कर्मचारी थिए । तर, कोरोनाको समयमा योजना बनाएकाले लकडाउनमै काम सुरु गर्न गाह्रो भयो । कोरोना महामारीको पहिलो लहरपछि माक्कुसेले औपचारिकता पायो ।

अहिले माक्कुसेमा पुष्टकारी, दुईवटा फ्लेबरको गुँदपाक, गुँदपाककै कुकिज र मौसमी खानेकुरा (योमरी पुन्हीमा गुँदपाककोे योमरी आदि) पाइन्छ । खानेकुराहरू नेपालका अधिकांश शहर पोखरा, लुम्बिनी र विराटनगरजस्ता शहरमा डेलिभरी हुन्छन् । विदेशमा पनि यसैगरी पुर्‍याउने धोको उनको छ ।

‘नेपालमा खाइने परम्परागत मिठाई अनि अरु खानेकुराहरूलाई अन्तर्राष्ट्रिय बजारमा पुर्‍याउने उनको सोच छ । त्यसैका लागि काम गरिरहेकी छु,’ उनले भनिन्, ‘अस्ट्रेलियामा गरेका कामहरूले नै मलाई यसरी सोच्ने बनायो । विदेशमा सिकेको कुरालाई मैले नेपाल फर्किएपछि पनि लागू गरेँ । जस्तो, माक्कुसेलाई हेर्न सक्नुहुन्छ ।’

भिडियाे हेर्नुहाेस् :