प्रहरीले १२ वर्षअघि ‘डेट एक्सपायर’ अश्रुग्यासको सेल प्रहार गर्दा प्रदर्शनकारी घाइते

प्रहरीले १२ वर्षअघि ‘डेट एक्सपायर’ अश्रुग्यासको सेल प्रहार गर्दा प्रदर्शनकारी घाइते

A+ A A-

एमसीसीको विरोधमा उत्रिएका प्रदर्शनकारीमाथि बिहीबार पनि प्रहरीले दर्जनौँ सेल अश्रुग्यास तथा पानीको फोहोरा प्रहार गर्‍यो ।

आइतबार संसदमा एमसीसी टेबल भएको दिनमा पनि प्रहरीले दर्जनौँ सेल अश्रुग्यास र पानीको फोहोरा तथा लाठी प्रहार गरेको थियो । सोही क्रम बिहीबार पनि दोहोरिएको हो ।

आइतबार प्रहरी र सशस्त्र प्रहरी गरेर २७ जना सुरक्षाकर्मी घाइते भएका थिए । बिहीबारको प्रदर्शनमा भने सुरक्षाकर्मीतर्फ सामान्य चोटपटकबाहेक कुनै पनि सुरक्षाकर्मी घाइते भएका छैनन् ।

प्रदर्शनकारीतर्फ भने एक जना डडेल्धुराका हेमराज अवस्थी गम्भीर घाइते भएका छन् । उनको टाउकोमा प्रहरीले हानेको अश्रुग्यासको सेल लाग्दा उनी घाइते भएका हुन् । उनकाे उपचार ट्रमा सेन्टरमा भइरहेको छ ।

प्रदर्शनकारीले बानेश्वरको निषेधित क्षेत्र तोड्ने प्रयास गरेपछि प्रहरीले बल प्रयोग गरेको थियो ।

संसदमा बिहीबार एमसीसीसम्बन्धी प्रस्तावमाथि छलफल हुन थालेको भन्दै सत्ताधारी दलकै कार्यकर्ताहरूसमेत विरोध प्रदर्शनमा उत्रेका थिए ।

प्रहरीले उनीहरूलाई बानेश्वरबाट लखेटेर बिजुलीबजारसम्म पुर्‍याएको थियो । बिजुलीबजारनजिक पुुग्दा प्रहरीले हानेको अश्रुग्यासको सेल लागेर अवस्थी घाइते भएका हुन् ।

प्रहरीले सन् २०१० मै एक्सपायर भएको अश्रुग्याससमेत प्रहार गरेकाे पाइएकाे छ ।

पूर्वप्रहरी नायब महानिरीक्षक (डीआईजी) हेमन्त मल्ल मिति सकिएको सेल प्रयोग गर्नु प्रहरी र प्रदर्शनकारी दुवैलाई उत्तिकै जोखिम हुने बताउँछन् ।

‘एक्सपायर भएको ग्यास सेल प्रहार गर्नु प्रहरीलाई र प्रदर्शनकारी दुवैतर्फ क्षति हुन सक्छ । प्रहरी ग्यास सेल पड्काएर आफू जोगिन खोज्ने हो । तर, त्यही समय नपड्किँदा प्रदर्शनकारी हावी हुने चान्स हुन्छ,’ मल्ल भन्छन्, ‘अर्कोतर्फ पड्किए पनि एक्सपायर भएको ग्यासको असर मानव स्वास्थ्यका लागि हानिकारक हुन सक्छ ।'

एक प्रहरी अधिकारी एक्सपायर भएको सेलकै कारण समयमै नपड्किँदा प्रदर्शकारीलाई सेल लागेको हुन सक्ने बताउँछन् ।

प्रहरी प्रवक्ता एसएसपी विष्णु केसीले भने ग्यास सेल एक्सपायर हुँदा त्यसको असर कम हुने स्वीकार गरे पनि बिहीबार त्यस्तो सेल प्रहार भएको/नभएको बारे बुझ्ने प्रतिक्रिया दिए ।

प्रदर्शनकारीलाई रोक्न बानेश्वरक्षेत्रमा मात्रै ४ हजारभन्दा बढी सुरक्षाकर्मी परिचालन भएका थिए ।

प्रकाशित मिति: बिहीबार, फागुन १२, २०७८ १७:४३