इलाममा सुमनको समाजसेवा : बिरामी कुरुवालाई खाना र बस्न नि:शुल्क

A+ A A-

इलाम अस्पतालनजिकै चिटिक्क परेको सानो घर छ । झट्ट बाहिरबाट हेर्दा घर कम रेस्टुरेन्ट बढी लाग्छ । घर तीन तलाको छ । आकर्षक रङ लगाइएको घरमा बरण्डा खास लाग्छ । काठको मुढाजस्तो देखिने बरण्डामा हरियो रङ लगाइएको छ ।

घरबाट भित्र छिर्नेबित्तिकै किचनमा पुगिन्छ । किचनमा खाना पकाउन आवश्यक सम्पूर्ण सामग्री छन् । सफा, आकर्षक । सानो चिटिक्क परेको डाइनिङ । किचनमा नपस्दै, घरबाहिर नै कलाकृतिका साथ बेसिन र धारो राखिएको छ । घरको तेस्रो तलामा सुत्ने कोठा छ । बिस्तराको वरिपरि बसेर कुरा गर्न मिल्ने सुविधा । इलाम बजारमा भएका महँगा रेस्टुरेन्ट बिर्साउने सजावट ।

घरको सबैभन्दा तल्लो तलामा अर्को सुत्ने कोठा । ‘एट्याज’, ट्वाइलेट र बाथरुम । इलाम नगरपालिका–७, मालापथमा पर्ने यो सुन्दर घरका धनी इलामका सुमन श्रेष्ठ हुन् । उनले यो घर व्यक्तिगत प्रयोजनका लागि बनाएका होइनन् । उनलाई घर निर्माण गर्दा नै कसरी नागरिकलाई सहयोग गर्न सकिन्छ भन्ने खट्किएको थियो । तर, ठ्याक्कै यसै गर्ने भन्नेचाहिँ लागेको थिएन । सुमनले मंगलबारबाट औपचारिक रूपमा सहयोगको उद्घोष गरे, ‘इलाम अस्पतालमा आउने बिरामीलाई निःशुल्क खान बस्न दिने ।’ त्यही चिटिक्क परेको घर देखाउँदै भने, ‘यो घर आफ्नै सम्झेर माया गरेर बस्न सक्नुहुनेछ ।’

केही समयअघि सुमन बिरामी भएर थलिए । लामै समय अस्पताल बस्नुपर्‍यो । आर्थिक भार मात्र होइन, अस्पताल बस्दा भोग्नुपर्ने समस्या आफैँ महसुस गरे उनले । उनलाई लाग्यो, अस्पताल आएका बिरामी कुरुवालाई खान, बस्न निःशुल्क दिँदा मात्रै पनि ठूलै राहत हुने रहेछ । त्यति मात्र होइन, सुमनले थुप्रै बिरामीका आफन्त इलाम बजारमा यत्रतत्र भौँतारिएको पनि देखेका छन् । सहयोगको याचनाले उनलाई हेरेको महसुस गरेका छन् । यो सबै कारण उनले सहयोग गर्ने उद्घोष नै गरे ।

‘थोरै मात्र सहयोग गर्न सकेँ भने पनि आफूलाई धन्य ठान्नेछु,’ उनले भने, ‘यो सुरुवात मात्र हो, हेरौँ कसरी सहयोग गर्न सकिन्छ ।’ उनको सहयोगले गरिबीका कारण उपचार गराउनै कठिन भएका परिवारलाई ठूलो राहत हुने सुमन ठान्छन् । ‘हुनैलाई चाहिँ इलाम बजारमा खान–बस्नको दैनिक २ हजारको हाराहारीमा खर्च लाग्छ,’ ‘बिरामी कुरुवालाई त्यति मात्र खर्च बचाउन सके पनि ठूलै कुरा हो,’ सुमन थप्छन् ।

अहिले सुमनको सानो घरमा चार जनासम्म अट्न सक्छन् । सुमनले उद्घोष गरेको सहयोग अहिलेलाई चार जनाका लागि मात्र हो । ‘इमर्जेन्सी परेमा १५ जनासम्मलाई सहयोग गर्न सक्छु,’ सुमन भन्छन्, ‘सहज अवस्थामा दैनिक चार जनालाई सहयोग गर्नेछु ।’ बिरामी कुरुवाले किचेनमा पसेर आफैँले पकाएर खानुपर्नेछ । नुन, तेल, दाल, चामल र तरकारी सुमनले किनेर राखिदिएका हुन्छन् । आउने, पकाउने र खाने । सरसफाइ गर्ने, आराम गर्ने । त्यो पनि निःशुल्क ।

इलामका सन्तोष भक्तराज नयाँ शैलीको समाजसेवा गरेकोमा सुमनको खुलेर प्रशंसा गर्छन् । ‘यो महान् कार्य हो,’ भक्तराज भन्छन्, ‘सानै काम तर ठूलो मन, यस्ता मनकारी मान्छेलाई सधैँ साथ दिनुपर्छ ।’ भक्तराज सुमनको यो कदमले सही सन्देश दिनेमा ढुक्क छन् । ‘हल्ला गर्नका लागि मात्र काम गर्ने चलन छ,’ उनले भने, ‘साँच्चै असहायलाई सहयोग नै गर्ने सुमन उदाहरणीय पात्र हुन् ।’

प्रकाशित मिति: शुक्रबार, फागुन १३, २०७८ ०७:२२