ओलीले पारेकाे योजनामा १० कराेडकाे काम भइसक्याे, बजेटको टुंगाे छैन

A+ A A-

झापाको दमकमा दमक क्याम्पसको भवन बनाउन १० करोड रुपैयाँ बराबरको काम भइसक्यो । तर अहिलेसम्म बजेटको टुंगाे भने लागेकाे छैन । नेकपा एमालेका अध्यक्ष केपी शर्मा ओली प्रधानमन्त्री हुँदा शैक्षिक स्तर सुधार्न दमकमा केही योजना पारे । जसमध्ये एक हो, दमक क्याम्पसको भवन । ओलीको चाहनाअनुसार नै दमक नगरपालिकाले भवन निर्माणको काम सुरु गर्‍यो । ओली प्रधानमन्त्रीबाट हटाइए, ओलीले ल्याएका योजना अन्योलमा परे ।

प्रधानमन्त्री शेरबहादुर देउवाले ओलीले ल्याएका थुप्रै योजना खारेज नै गरे, जसमा थुप्रै सडक तथा शहरी विकासका योजना छन् । झापामा पनि ६० वटा सडक त खारेज नै भए । खारेज भएका योजनामा काम सुरु नै नभएका योजना त परे नै, काम हुँदै गरेका योजनासमेत अन्याैल भए । दमक क्याम्पस भवनको योजनालाई खारेज नै त भनिएन, तर बजेट अन्योलमा पर्‍यो ।

त्यसो त दमक क्याम्पसको भवन मात्र होइन, ४ करोडभन्दा बढी खर्चिएर बन्दै गरेको ढुकुरपानी मावि भवनको बजेटको समेत टुंगाे लागेको छैन । काम भइरहेको छ, बजेट कसले र कहिले दिन्छ, थाहा छैन । ४ करोडकै बजेटमा बनिँदै गरेको हिमालय उच्च मावि भवनको बजेट पनि उस्तै हो । नगरपालिका बजेटको ताकेता गरिरहेको छ, बजेट निकासा भएको छैन ।

ओलीकै पालामा प्रदेश सरकारको बजेटले बनिने भनेको तरकारी बजारको समेत बजेट निकासा भएको छैन । महत्त्वका साथ बनाइएको योजनामा परेको थियो, दमकको अर्ग्यानिक तरकारी बजार । धेर–थोर काम पनि भयो । तर, बजेट निकासा भएन ।

दमक नगरपालिकाका प्रमुख प्रशासकीय अधिकृत गणेशप्रसाद तिम्सिना बजेट अन्योलमा परेको सुनाउँछन् । उनी भन्छन्, ‘खारेज नै त भन्न मिल्दैन, काम भइरहेको छ, तर बजेट निकासा भएको छैन ।’ नगरपालिकाले पटक–पटक ताकेता गरिरहेको तिम्सिना सुनाउँछन् । ‘काम हामीले नै गरिरहेका छौँ,’ उनी भन्छन्, ‘बजेटको कुरा भने टुंगिएकाे छैन ।’ ‘सुरु नै नभएका योजनामा त केही समस्या भएन’ प्रमुख प्रशासकीय अधिकृत तिम्सिना भन्छन्, ‘सुरु गरेका योजनाको बजेट अन्योल हुँदा काममा समस्या पर्छ ।’

प्रकाशित मिति: बिहीबार, फागुन १२, २०७८ ०८:३५