'घुम्तीमा नआऊ है, आँखा तिमी जुधाउन !'

A+ A A-

रत्नशमशेर थापाको जन्म २३ साउन १९९६ मा काठमाडौंको कमलपोखरीमा भएको हो । मध्यम परिवारमा जन्मिएका थापाले अंग्रेजी साहित्यमा स्नातकोत्तर गरेका छन् । नेपाली काव्य साहित्यमा विशिष्ट योगदान पुर्याएका थापाका चार कृति प्रकाशित छन् ।

संख्याभन्दा पनि गुणात्मकतामा विश्वास गर्ने थापाका गीतमा कोमलता र कवितामा कठोरपन पाइन्छ । जुन उनको सिर्जनात्मक विशेषता हो ।

नारायण गोपाल, माणिक रत्न, भूपी शेरचनसँगको संगतले साहित्यमा होमिएका थापाका ‘घुम्तीमा नआऊ है, आँखा तिमी जुधाउन..., हे कान्छा ठट्टैमा यो बैंस जान लाग्यो...’ जस्ता गीत नेपाली जनजिब्रोमा अझै झुन्डिएका छन् ।

गीत लेखनमा मात्रै होइन, उनको संगीतमा पनि दक्षता छ । बिम्बमा खेल्न माहिर थापाले गीत, कविता, मुक्तक र हाइकुमा नवीन प्रयोग गरेका छन् । साहित्य सिर्जनामा व्यस्त–मस्त थापाको जीवन भोगाइ र संघर्षको दस्तावेजः

बाल्यकाल र अध्ययन

मध्यम परिवार जन्मिएको हुँ । सात दाजुभाइसहितको ठूलो परिवार थियो । ठूलो परिवार भएकाले साधारण किसिमले नै बित्यो, बाल्यकाल ।

मेरो अध्ययनको सुरुवात काठमाडौंस्थित दरबार स्कुलबाट भएको हो । त्यसपछिको पढाइ त्रिचन्द्र कलेज र त्रिभुवन विश्वविद्यालयबाट भएको हो । त्यहीँबाट अंग्रेजी विषयमा एमए पूरा गरें । त्यसबाहेक विभिन्न ट्रेनिङ लिएको छु ।

निजी मामिला

सबैले कडा स्वभावको भन्छन् । तर, त्यस्तो छैन । मिल्न सक्नेसँग निकै मिलनसार छु । नमिल्नेसँग मिल्न सक्दिनँ । तर, कसैको मन दुखाउने काम गरेको छैनँ ।

साहित्यतिर रुचि बढेसँगै बिहे नगरी एक्लो जीवन बिताउने सोचको थिएँ । तर, परिस्थितिले बिहे गर्न बाध्य भएँ । मेरो विचारमा जन्म, मृत्य र विवाह मान्छेको वशमा हुँदैन ।

आमाको मृत्यु भारतको दिल्लीस्थित अलिन्दा मेडिकल इन्स्टिच्युटमा भएको हो । अन्तिम समयमा आमाको मुख हेर्न जान पाइनँ । एमएको जाँच चलिरहेको थियो । जुन कुराले मलाई पिरोलिरहन्छ ।

साहित्यमा आकर्षण

साहित्य र संगीतमा बच्चैदेखि रुचि थियो । पछि साहित्यकारसँग संगत बढ्यो । रुचि र संगत भएपछि साहित्यमै समर्पित भएँ ।
सुरुमा कविता लेखें । कविता पनि अनेक प्रकारका लेखें । अझ भनौं, कवितामा विभिन्न प्रयोग गरियो । त्यसपछि गीत लेख्न थालेको हुँ । हर प्रकारका गीत लेखें । कविता, गीत, नाटक, मुक्तक र एकाङ्की पनि लेखेको छु ।

जीवन र साहित्यको सम्बन्ध

जीवन र साहित्य ज्यादै निकट छ । जीवन त दालभात खाएर मात्रै पनि बितिरहेकै हुन्छ । तर, साहित्यले जीवन सार्थक बनाउँछ । व्यक्तिगत जीवनका लागि मात्रै होइन, देश र समाजका लागि पनि साहित्य अपरिहार्य छ ।

पछिल्लो समय कवितामा नयाँ मोड आएको छ । समयले पनि लिएर आउँछ । तर, कवितामा गहनताको कमी छ ।

प्रकाशित मिति: शनिबार, असार १४, २०७६ १७:१९