प्रहरी जोगाइन्, पसल जोगाउन सकिनन्

A+ A A-

अमेरिकी सहयोग परियोजना एमसीसी नेपालको संसदमा टेबल भएसँगै संसद भवनवरपरको क्षेत्र दिनभर तनावग्रस्त बन्यो । एमसीसीको विरोधमा उत्रिएका आन्दोलनकारी र प्रहरीबीच दिनभरजसो नयाँबानेश्वर क्षेत्रमा झडप भइरह्यो । नयाँ बानेश्वरको निषेधित क्षेत्र तोडेपछि प्रहरीले भिड तितरबितर गराउन पानीको फोहोरा र अश्रु ग्यास प्रहार गरिरह्यो ।

पानीकाे फोहोरा र अश्रु ग्यासले अत्तालिएका आन्दोलनकारी बिजुलीबजारमा रहेको आर्कब्रिज (पुल)मा आइपुगे । केही आन्दोलनकारी भने बुद्धनगर छिर्ने बाटो रहेको अल्फाबिटा भवन छेउको गल्लीतिर छिरे । आर्कबिज्रमा लामै समय प्रहरी र आन्दोलनकारीबीच संघर्ष भयो ।

प्रहरीले फायर गरेको अश्रु ग्यासको धुवाँ हावाले उल्टै प्रहरीतिर फैलिन थाल्यो । यही मौकामा आन्दोलनकारीले प्रहरीमाथि ढुंगा, मुढा, इँटा र सिसाका बोतल प्रहार गरिरहे । आन्दोलनकारीका अगाडि टिक्न नसकेपछि प्रहरी आर्कब्रिजबाट पछाडि फर्किएर बानेश्वरतिर मोडियो । त्यसपछि ढुंगामुढा र सिसाका बोतल प्रहार गर्दै आन्दोलनकारीले प्रहरीलाई लखेटे ।

अल्फाबिटा भवनछेउको बाटो फर्किरहेको प्रहरीको समूहलाई दुईतिरबाट आन्दोलनकारीले चेपुवामा पारे । बुद्धनगर गल्लीमा पहिल्यैदेखि रहेका आन्दोलनकारी र आर्कबिज्रतिरबाट आएका आन्दोलनकारीको चेपमा पर्‍यो प्रहरीको एउटा समूह ।

अगाडि र पछाडि दुवैतिरबाट ढुंगामुढा प्रहार भएपछि प्रहरीले आफूलाई जोगाउने भरपूर प्रयास गरे । आफूसँग भएको ढालको प्रयोग गर्दै उनीहरूले ढुंगा र सिसाका बोतल छेकिरहे । असिनासरी बर्सिएका ढुंगा, इँटा र सिसाका बोतलको प्रहार खप्न नसकेपछि प्रहरीको उक्त समूह तितरबितर भएर पाँच जना प्रहरी बुद्धनगरतर्फ छिरे ।

अल्फाबिटा भवनबाट दक्षिणतर्फको बाटो छिरेका ती प्रहरीलाई आन्दोलनकारीले लखेट्न सुरु गरे । हातमा ढुंगा र इँटा बोकेका आन्दोलनकारीले लखेटेपछि ती प्रहरी बुद्धनगरको एक बुटिक पसलमा छिरे । अल्फाबिटा भवनबाट करिब ५ सय मिटर भित्र छ, प्रहरीले ज्यान जोगाउन आश्रय लिएको बुटिक ।

बुटिक मालिक जानुका श्रेष्ठले बानेश्वर क्षेत्रमा आन्दोलन छ भन्ने थाहा पाएदेखि नै आधा सटर मात्र खोलेकी थिइन् । उनको बुटिकमा तीनतिर सटर छ । दुईतिरको सटर पूरै बन्द थियो भने एकतिरको आधा खुल्ला । ज्यान जोगाउन भाग्दै आएका प्रहरी आधा बन्द भएको सटर खोल्दै जानुकाको पसलभित्र छिरे । प्रहरीलाई लखेट्दै आएका आन्दोलनकारीले जानुकाको पसलको सटर खोलेर तोडफोड मच्चाए ।

‘यहाँसम्म त आन्दोलन गर्नेहरू के आऊलान् र भनेर एकतिरको सटर आधामात्र बन्द गरेकी थिएँ,’ जानुकाले सुनाइन्, ‘तर, भाग्दै आएका पुलिस सटर खोलेर भित्र छिरेपछि, उनीहरूलाई खेद्दै आएकाहरूले सटर खोलेर ढुंगामुढा हाने ।’

आन्दोलनकारीले पसलका सबै सिसा फुटाएका छन् । पसलको होर्डिङ बोर्ड पनि च्यातिदिएका छन् । आन्दोलनकारीले सटर खोलेर सिसा फुटाएपछि जानुकाले प्रहरीलाई पसलको पछाडितिर रहेको गोदाममा लुकाइन् । ‘उनीहरूले भित्रै आएर ढुंगामुढा हान्न थाले । पुलिसलाई चाहिँ पहिल्यै पछाडिको गोदामतिर लुक्न पठाएकी थिएँ,’ जानुकाले भनिन्, ‘धन्न गोदामतिर जाने ढोका देखेनन् र । नत्र प्रहरीलाई जिउँदो छोड्दैनथे । मेरो पसल त बर्बाद पारे ।’

आन्दोलनकारीले हानेका ढुंगामुढा जानुकाको जिउमा पनि लागेका छन् । सिसाले उनको हातको औँला काटिएको छ । ‘टाउको जोगाउँदा जिउभरि ढुंगाले लाग्यो,’ जानुकाले भनिन्, ‘सिसा उछिट्टिएर औँला काटियो ।’

आठ वर्षदेखि बुद्धनगरमा पसल चलाइरहेकी जानुकाले आफ्नो पसल र ज्यानको परवाह नगरी प्रहरीको ज्यान जोगाइन् । प्रहरीहरू उनको पसलको गोदाममा २५ मिनेटसम्म लुके । तर, त्यो २५ मिनेटमा उनको पसल भने तोडफोड भयो । जानुकाले भनिन्, ‘भ्यानमा थप प्रहरी आएपछि मात्र यहाँ लुकेका प्रहरी निस्किए र लिएर गए ।’

ढुंगामुढाले क्षतिग्रस्त भएको पसलमा कति मूल्यबराबरको क्षति भयो भन्ने उनले आकलन गर्न भ्याएकी छैनन् । ‘ज्यान जोगाउनै मुस्किल भयो,’ जानुकाले राहतको सास तान्दै भनिन्, ‘ज्यान जोगियो, त्यही ठूलो कुरा हो । तर, पसलचाहिँ बर्बाद भयो ।’