च्यापुमा मासु पलाउने दुर्लभ रोग नेपालमा देखियो

A+ A A-

गत महिना दाँत मिलाउन बानेश्वरको एक प्योथोलोजीमा पुगेकी अपेक्षामा एउटा अनौठो समस्या देखियो । यसपछि प्याथोलोजीले उपचारका लागि उनलाई अन्य डेन्टलमा लैजान रेफर गर्याे ।

परिवारले ५ असारमा उनलाई बसुन्धाराको कान्तिपुर डेन्टल अस्पताल पुर्याए । अस्पतालले उनको दन्त परीक्षणपछि उनमा डेमोप्लास्टिक एमिलोब्लास्टोमा भएको पत्ता लगायो ।

डेमोप्लास्टिक एमिलोब्लास्टोमा च्यापुमा ट्युमर पलाउने एक खालको रोग भएको डा. सुमित सिंहले बताए । उनका अनुसार यो रोग विश्वमा नै दुर्लभ मानिन्छ । डा. सिंहको टोलीले गत बिहीबार करिब चार घण्टा लगाएर सो रोगको शल्यक्रिया गरेको थियो । अहिले अपेक्षाको अवस्था सामान्य रहेको डा. सिंहले बताए ।

डा. सिंहले च्यापुमा ट्युमर पलाउने समस्या क्यान्सर नभएको बताए । डा. सिंहका अनुसार सामान्यतया ३० देखि ५० वर्ष उमेर समूहका व्यक्तिमा यस्तो समस्या देखिने भए पनि नेपालमा १५ वर्षीया अपेक्षामा यस्तो समस्या देखिएको हो ।
अपेक्षाका बुबा भुपेशले यसभन्दा अगाडि छोरीमा दुखाइसम्बन्धी कुनै समस्या नदेखिएको बताए ।

उपचार के हुन्छ ?

डा. सुमितका अनुसार डेमोप्लास्टिक एमिलोब्लास्टोमा हुनु च्यापुको हड्डीवरपर मासु पलाउनु हो । यसको उपचार भनेकै त्यो मासु र त्यसले असर पारेको हड्डीलाई काटेर फाल्नु हो ।

यसको उपचार विधिबारे डा. सुमितले भने, ‘ट्युमरले हड्डीलाई खियाउँदै जान्छ । ट्य्ुमर जति लामो समय रह्यो, यसले हड्डीलाई त्यति नै खियाउँछ । उपचारका क्रममा हड्डीलाई कम्तीमा पनि एक सेन्टिमिटर काट्नुपर्छ र त्यहाँ फ्री फिबुला बोन ग्राफ (खुट्टाको हड्डी निकाल्ने) राख्नुपर्छ ।’ डेमोप्लास्टिक एमिलोब्लास्टोमा हुँदा दुख्ने, खान नमिल्ने जस्ता कुनै समस्या नदेखिने तर चेकजाँचका क्रममा मात्रै रोग पत्ता लाग्ने डा. सुमित बताउँछन् ।

प्रकाशित मिति: शनिबार, असार १४, २०७६ ०४:२६