स्नातकोत्तरमा भर्ना हुन नपाएका विद्यार्थी भन्छन्– रिजल्ट ढिलो निकाल्ने त्रिवि, सजाय हामीलाई ?

स्नातकोत्तरमा भर्ना हुन नपाएका विद्यार्थी भन्छन्– रिजल्ट ढिलो निकाल्ने त्रिवि, सजाय हामीलाई ?

A+ A A-

सिन्धुली बहुमुखी क्याम्पसमा पढ्ने गोपाल पहाडीले बीबीएस चौथो वर्षको परीक्षा पास गरिसकेका छन् । तेस्रो वर्षमा भने उनलाई ‘ब्याक’ लागेको थियो । यद्यपि त्रिविको नियमानुसार उनले चौथो वर्षको परीक्षा दिए । चैतमा दिएको चौथो वर्षको परीक्षामा उनी उत्तीर्ण भए ।

तर, चौथो वर्षको परीक्षाभन्दा अगाडि नै तेस्रो वर्षको ‘ब्याक पेपर’ दिए पनि रिजल्ट ढिलो आइदियो । परीक्षा दिएको करिब एक वर्षपछि (गएको माघ) मात्र तेस्रो वर्षको रिजल्ट आयो । रिजल्ट ढिलो आएका कारण विद्यार्थीहरूलाई व्यवस्थापन संकायमै स्नातकोत्तर गर्न बाधा पुगेको छ ।

यसभन्दा अघिल्ला वर्षहरूमा यसरी ‘ब्याक’ लागेका विद्यार्थीले परीक्षा दिईकन एमबीएसमा पढ्न प्रशस्त समय पाउँथे । रिजल्ट सार्वजनिक नभए पनि ‘सीम्याट’को परीक्षा पास भएका विद्यार्थीलाई स्नातकोत्तरको कक्षा लिन अनुमति दिइन्थ्यो । र, रिजल्ट सार्वजनिक भएपछि विद्यार्थीले भर्ना गरेर सोही कक्षालाई निरन्तरता दिन पाउँथे ।

यसपटक भने सीम्याट पास गरेर कक्षा लिइरहेका विद्यार्थीलाई औपचारिकता दिन त्रिविले रोक लगाएको छ । हाजिर (क्रेडिट आवर) नपुग्ने भन्दै त्रिविले विद्यार्थीहरूलाई भर्ना हुन नदिएको विद्यार्थीको गुनासो छ ।

‘हामीले पहिलाको विद्यार्थीले झैँ सीम्याट पास गरेर अनलाइन कक्षा लियौँ । तर, यतिबेला आएर हाजिर नपुग्ने भन्दै त्रिविले भर्ना हुन रोकिदियो,’ पहाडीले भने ।

त्यस्तै, विद्यार्थी तीर्थ धामी त्रिविकै कारण आफ्नो उच्च शिक्षा अध्ययनको पाटो एक वर्ष पर धकेलिने बताउँछन् । उनले तेस्रो वर्षमा लागेको विषयको परीक्षा चौथो वर्षको नियमित परीक्षाभन्दा अगाडि नै दिएका थिए । समयमा तेस्रो वर्षको रिजल्ट आएको हुन्थ्यो भने उनले एमबीएसमा भर्ना गरिसकेका हुन्थे ।

तर, त्रिविले प्राविधिक समस्याका कारण भन्दै करिब एक वर्षसम्म तेस्रो वर्षको रिजल्ट सार्वजनिक गरेन । रिजल्ट सार्वजनिक नभए पनि अघिल्ला वर्षका विद्यार्थीले झैँ धामीले अनलाइन कक्षा लिइरहे । त्रिविले पनि तेस्रो वर्षको रिजल्ट आएपछि पढिरहेका विद्यार्थीलाई भर्ना हुने समय दिन्थ्यो । ‘यस वर्ष भने हाजिर नपुग्ने भन्दै फारम भर्न समय दिएन । रिजल्ट ढिलो आउनुमा हाम्रो के दोष ?,’ धामीले भने ।

शङ्करदेव क्याम्पसका रितु थापा पनि यस वर्ष स्नातकोत्तरमा पढ्न वञ्चित भएकाले चिन्तित छिन् । अघिल्ला वर्षहरूमा सोहीअनुरुप आएका विद्यार्थीले अहिले नियमित रूपमा अध्ययन गरिरहेको अवस्थामा आफूहरूलाई वञ्चित गराइनु दु:खद रहेको उनी बताउँछिन् ।

थापा प्रश्न गर्छिन्, ‘पहिलाका दाइदिदी र हामीमा के फरक छ ? तेस्रो वर्षको रिजल्ट ढिलो निकाल्नुमा हाम्रो गल्ती कि त्रिविको ? हामीले चाहिँ अझै एक वर्ष ‘ग्याप’ लिनुपर्ने ?’

त्रिवि भने विद्यार्थीकै ट्रान्सक्रिप्ट सर्टिफिकेट निकाल्न झन्झट नहोस् भनेर फारम भर्न नदिएको बताउँछ । त्रिवि व्यवस्थापन संकायका डिन डिल्लीराम शर्माका अनुसार भदौमा प्रवेश परीक्षा गराएर १ असोजबाट विद्यार्थीहरूको पढाइ भइरहेको थियो । तर, तेस्रो वर्षको रिजल्ट ढिलो आइदिएका कारण ‘ब्याक पेपर’ दिएका विद्यार्थीको फारम भर्न रोक्नुपरेको उनी बताउँछन् ।

‘अब चैतमा हामीले परीक्षा गर्ने तयारी गरिसकेका छौँ । अहिले ती विद्यार्थीको फारम स्वीकृत गर्दा उनीहरूको क्रेडिट आवर र ८० प्रतिशत हाजिर पुग्दैन । सेमेस्टर प्रणालीमा हाजिर पुगेन भने ट्रान्सक्रिप्ट निकाल्न झन्झट हुन्छ,’ शर्माले भने, ‘बरु अब चैतमा अहिलेको परीक्षा सकिएपछि जेठमा नयाँ भर्ना खुल्छ । त्यतिबेला भर्दा विद्यार्थीलाई नै राम्रो हो ।’

शर्माका अनुसार त्यसरी रोकिनेमा करिब १३ सय विद्यार्थी छन् ।

यता विद्यार्थी भने रिजल्ट निकाल्त ढिलाइ हुनुमा आफूहरूको गल्ती नभएकाले फारम भर्न पाउनुपर्ने बताउँछन् । ‘अब त्रिविले रिजल्ट निकाल्न ढिलो गर्छ त हाम्रो गल्ती हो ? उनीहरूको गल्तीको सजाय हामीले किन पाउने ? त्रिविकै कारण एक सेमेस्टर पछाडि धकेलिनुपर्ने ?,’ पहाडीले भने ।

प्रकाशित मिति: मंगलबार, फागुन ३, २०७८ १७:४२