लालु यादवको चारा घोटाला मुद्दामा ५७५ साक्षी, १५ बाकस प्रमाण

A+ A A-

भारतको बिहार राज्यका पूर्वमुख्यमन्त्री लालुप्रसाद यादव ‘चारा घोटाला’ प्रकरणमा दोषी ठहर भएका छन् । भारतको झारखण्डस्थित सीबीआई अदालतले मंगलबार उनलाई यो प्रकरणको पाँचौँ मुद्दामा दोषी ठहर गरेको हो । दोषी ठहर भए पनि सजाय भने सुनाइएको छैन ।

यही २१ फेब्रुअरीमा सजाय तोकिने जनाइएको छ । त्यतिबेलासम्म उनी प्रहरी हिरासतमा हुनेछन् । उनलाई झारखण्डको राँचीस्थित बिरसा मुन्डा सेन्ट्रल जेलमा पठाइएको छ । उपचारका लागि उनलाई राजेन्द्र आयुर्विज्ञान संस्थान (रिम्स) पठाउने सम्भावना रहेको भारतीय सञ्चारमाध्यमहरूले जनाएका छन् ।

यो मामिलामा ३८ जनाविरुद्ध मंगलबारै सजायसमेत सुनाइएको छ । उनीहरूलाई तीन वर्षको जेल सजाय तोकिएको छ ।

समाचारअनुसार सीबीआई अदालतमा लालुप्रसाद यादवविरुद्ध ५७५ जना साक्षी र १५ बाकस प्रमाण बुझाइएको थियो । लालु पक्षले भने २५ जना साक्षी अदालतमा उपस्थित गराएको थियो ।

९० को दशकमा चर्चित करोडौँ रुपैयाँको पशुपालन घोटालामा सीबीआईले त्यो बेला ६६ मुद्दा दर्ता गराएको थियो । तीमध्ये ६ मुद्दामा तत्कालीन मुख्यमन्त्री लालु यादवलाई पनि आरोपी बनाइएको थियो । बिहार राज्य टुक्रिए र झारखण्ड राज्य बनेपछि तीमध्ये ५ मुद्दा झारखण्ड स्थानान्तरण गरिएको थियो । यी पाँचमध्ये ४ मुद्दामा उनी यसअघि नै दोषी ठहर भइसकेका थिए । तर, उनी जमानतमा रिहा भएका थिए ।

१९९२ मा घोटालाको पर्दाफास भएपछि तत्कालीन बिहारको डोरन्डा थानामा १७ फेब्रुअरीमा एफआईआर दर्ता गरिएको थियो । सोही वर्ष ११ मार्चमा पटनाको उच्च अदालतले सीबीआई जाँचको आदेश दिएको थियो । यसपछि सीबीआईले ८ मे २००१ मा १०१ आरोपीविरुद्ध पहिलो मुद्दा दायर गरेको थियो । त्यसपछि ७ जुन २००३ मा ६८ जना आरोपीविरुद्ध अर्को मुद्दा दायर गरियो । २६ सेप्टेम्बर २००५ मा अदालतले १७० आरोपीविरुद्ध आरोप तय गरेको थियो ।

प्रकाशित मिति: मंगलबार, फागुन ३, २०७८ १६:०१