लुम्बिनीको राजधानी : देउखुरी उपत्यकालाई गौतम बुद्धको झल्को दिनेगरी विकास गर्ने प्रस्ताव

लुम्बिनीको राजधानी : देउखुरी उपत्यकालाई गौतम बुद्धको झल्को दिनेगरी विकास गर्ने प्रस्ताव

A+ A A-

लुम्बिनी प्रदेशको स्थायी राजधानी देउखुरी उपत्यकालाई राजधानीका रुपमा विकास गर्न बन्दै गरेको गुरुयोजनाको खाका अन्तिम चरणमा पुगेको छ । राप्ती नदीको दुबैतर्फको ग्रीनबेल्टसँगै आधुनिक शहर निर्माण गर्ने गरी गुरुयोजना बनाइँदै छ । सडकसँगै जोडिएको एक सय मिटर चौडा ग्रीन बेल्ट गुरुयोजनामा प्रस्तावित छ ।

राप्ती गाउँपालिका वडा नम्बर २ लाई मुख्य केन्द्र मानेर बनाउन थालिएको गुरुयोजनामा राप्ती गाउँपालिका अन्तर्गत ३ वटा वडा, गढवा गाउँपालिका र अर्घाखाँचीको शितगंगा नगरपालिकाका २–२ वटा वडालाई समावेस गरिएको प्रदेश पूर्वाधार विकास प्राधिकरणका प्रमुख कार्यकारी अधिकृत अनन्तराज घिमिरेले बताएका छन् ।

प्रदेशको नाम लुम्बिनी भएकाले बुद्धको प्रतिमा आकारमा प्रदेशको गुरुयोजनाको खाका तयार पार्ने काम भइरहेको कार्यकारी अधिकृत घिमिरेले जनाए ।उक्त खाकाबारे सरोकारवाला र प्रदेश सरकारसँग विस्तृत छलफल गरिसकिएको र अब काठमाडौंस्थित विज्ञहरूसँग छलफल गरी अन्तिम रूप दिइने प्राधिकरणका प्रमुख कार्यकारी अधिकृत घिमिरेको भनाइ छ ।

गुरुयोजनाको खाकामा पूर्व–पश्चिम महेन्द्र राजमार्गअन्तर्गत भालुबाङ–लमही खण्डको ५ सय मिटर बाहिरको क्षेत्रलाई मुख्य प्रशासनिक क्षेत्र, मुख्यमन्त्री तथा मन्त्रिपरिषद्को कार्यालय, मन्त्रालयहरू र भीआईपीको आवास रहने गरी गुरुयोजना बनेको बताइएको छ ।

मुख्यमन्त्री तथा मन्त्रिपरिषद्को कार्यालय पूर्व–पश्चिम राजमार्गको उत्तरतर्फ राप्ती गाउँपालिकाको वडा नम्बर २ मा प्रस्ताव गरिएको छ । भालुबाङको पुलबाट दक्षिणतर्फ राप्ती नदीका दुबै किनारमा तटबन्ध गरी दुवैतर्फ ६०–६० मिटर सडक बनाइने उल्लेख छ ।

यस्तै गढवा गाउँपालिकाको क्षेत्रलाई आवासीय, कृषि र केही संस्थागत क्षेत्र पनि गराउन सकिने गुरुयोजनामा प्रस्ताव गरिएको छ । गढवाको कालाकाटे र शितगंगा नगरपालिकाका क्षेत्रलाई औद्योगिक क्षेत्र बनाउने प्रस्ताव गुरुयोजनामा छ ।

साथै राप्ती नदीमा आधुनिक र कलात्मक पुल (सिग्नेचर ब्रिज) बनाउने र उक्त पुलले गढवा गाउँपालिकालाई जोड्ने गरी गुरुयोजनामा समावेस गरिएको प्रदेश पूर्वाधार विकास प्राधिकरणले जनाएको छ । भालुबाङदेखि सिसहनियाँ हुँदै ३ किलोमिटर दक्षिणसम्म स्थायी राजधानीका पूर्वाधार बन्ने जनाइएको छ । तर पहिलो चरणमा सिसहनियासम्म मात्रै पूर्वाधार बन्ने प्राधिकरणले जनाएको छ।

गुरुयोजनामा राप्ती गाउँपालिकाको सिसहनिया क्षेत्रलाई पहिलो र पाखापानीदेखि मौरीघाटसम्मको क्षेत्रलाई दोस्रो व्यापारिक केन्द्र बनाइने र सिसहनियाँदेखि पहरुवा सम्मलाई सांस्कृतिक क्षेत्र तथा राजधानी शहरको बाहिरी घेरामा रिङ रोड रहने भएको छ । गत पुस २३ मा राप्ती उपत्यकाका जनप्रतिनिधि, स्थानीयवासी र अन्य सरोकारवालासँग विस्तृत छलफल गरिएको पूर्वाधार विकास प्राधिकरणका प्रमुख घिमिरेले जानकारी दिए।

गुरुयोजना तथा डीपीआर बनाउन ४ करोड

प्रदेश सरकारले चालु आर्थिक वर्षमा प्रदेशको स्थायी राजधानीको डीपीआर तयार तथा गुरुयोजना बनाउन ४ करोड रकम विनियोजन गरेको थियो । सरकारले स्थायी राजधानीबाटै काम गर्ने भन्दै करिब ६ महिना अगाडि पर्यटन, ग्रामीण तथा शहरी विकास मन्त्रालय र स्वास्थ्य, जनसंख्या तथा परिवार कल्याण मन्त्रालयका कार्यालय राखेको छ । तर, मन्त्रालयको काम भने प्रभावकारी बन्न सकेको छैन ।

कर्मचारीको अभावमा प्रभावकारी काम हुन नसकेको मन्त्रालयले जनाएको छ । अधिकांश काम बुटवलबाट हुँदै आएको छ । मुख्यमन्त्री तथा मन्त्रिपरिषद् कार्यालयको पनि सम्पर्क कार्यालय खोलिएको छ ।

गुरुयोजना पास हुनासाथ डीपीआर

प्रदेश सरकारले गुरुयोजना पास हुनासाथ डीपीआरको काम अघि बढाउनेछ । प्रदेश सरकारले डीपीआरका लागि ३ करोड बजेट छुट्याइसकेको छ । सोही रकमबाटडीपीआर तयार गर्ने र स्थायी संरचना निर्माणको काम अगाडि बढाइने सरकारका प्रवक्ता तिलकराम शर्माले जानकारी दिए।

प्रकाशित मिति: शनिबार, माघ २९, २०७८ १७:४५