ब्रान्डेड मदिरा कारोबारी अग्रवालको लरबराएको बोली, विराेधाभाषी कुरा

A+ A A-

शुक्रबार दिउँसो मदिरा व्यापारी अमित अग्रवालले पत्रकार सम्मेलन गर्न चाहेको सूचना आयो । दिउँसो ३ बजे पत्रकार सम्मेलन राखिएको थियो । अग्रवाल उनै व्यावसायी हुन्, जो नेपालमा तीन दशकदेखि महँगो विदेशी ब्रान्डका मदिराको कारोबार गर्दै आएका थिए ।

तर उनी ३५ दिनदेखि भने एकाएक हराएका थिए । ओमप्रकाश अग्रवालले सुरु गरेको मदिरा व्यापार छोराद्वय अमित र अभिले सम्हालिरहेका थिए । यो अग्रवाल परिवार नेपालमा महँगा विदेशी मदिरा भित्र्याउने अग्रणीमध्येमा पर्छ ।

अमित र अभि अग्रवाल दाजुभाइको मुख्य व्यवसाय नै मदिरा हो । महँगो मदिरा व्यापारमा उनीहरूले साम्राज्य नै जमाएका थिए । मदिरामा अग्रवाल दाजुभाइ दोस्रो पुस्ताका हुन् । भारतबाट नेपाल आएर नेपालको नागरिकता लिएका बुबा ओमप्रकाश अग्रवालले विदेशबाट मदिरा ल्याएर नेपालमा बेच्ने व्यवसाय गरेका थिए ।

उनीहरूले मुख्यतः तीनवटा कम्पनीमार्फत मदिराको कारोबार गर्दै आएका थिए । जस अन्तर्गत ग्रीनलाइन स्टोरले मदिराको खुद्रा कारोबार गर्दै आएको थियो भने एलायन्स डिस्ट्रिब्युटर्समार्फत विदेशबाट मदिरा आयात र अमिअभि ट्रेडिङमार्फत होलसेलको कारोबार गर्दै आएका थिए ।

तर गत पुसको अन्तिमतिर यो परिवार आफ्नो निवास र पसल दुवै ठाउँमा ताल्चा लगाएर एकाएक गायब भएको थियो । उनकी छोरीले आफ्नो परिवारका ९ जना सदस्य हराएको भन्दै २२ पुसमा प्रहरीमा उजुरी दिएकी थिइन् । त्यसपछि अग्रवाल परिवारको ज्ञानेश्वरस्थित घरमा ताल्चा फोडेर प्रहरीले जाँच्दा ओमप्रकाशले लेखेको पत्र भेटेको थियो । जसमा बिग्रिएको कारोबार उकास्न आफूले मिटरब्याजमा रकम लिएको र उक्त ऋण तिर्न नसक्दा मर्नु न बाँच्नुको अवस्थामा पुगेको उल्लेख थियो । ओमप्रकाशले लेखेको पत्रमा उनकी श्रीमती र दुई छोराको समेत हस्ताक्षर थियो ।

तर, ३५ दिनपछि आफैँ सार्वजनिक भएका अमितले मिटरब्याजमा ऋण नलिएको दाबी गरे । एउटा सामान्य रेस्टुरेन्टमा राखिएको पत्रकार सम्मेलनमा अमितले यस्तो दाबी गरिरहँदा उनकाे आवाज लरबिरएकाे थियाे, काँपीरहेको थियो ।

साथीभाइसँग २४ प्रतिशत ब्याज तिर्ने शर्तमा ऋण लिएकाले बुवाले त्यसैलाई मिटरब्याज ठानेर घरमा पत्र लेखेर छोडेको अमितले दाबी गरे । मिटरब्याजीसँग ऋण लिएको अमितले भरसक लुकाउन खोजेको उनको हाउभाउले बुझिन्थ्यो । प्रहरीको केन्द्रीय अनुसन्धान ब्यूराे ((सीआईबी)ले अग्रवाल परिवारले चर्को ब्याज तिर्ने शर्तमा रकम लिएको केही तथ्य बटुलेको छ । पत्रकार सम्मेलनमा ती व्यक्तिको नाम लिएर प्रश्न सोध्दा अमितले कारोबारबारे स्वीकारे तर, 'मिटरब्याज' भन्ने शब्द उच्चारण गरेनन् ।

व्यवसायी रुपेश पाण्डे, सुनील श्रेष्ठ र पूर्वएसएसपी दीपक श्रेष्ठलगायतसँग मिटरब्याजमा पैसा लिएको भन्ने छ, अरू कोकोसँग यस्तो रकम लिनु भएको छ ? भन्ने प्रश्नमा उनले उत्तर फर्काए, ‘तपाईँहरूले भनेका व्यक्तिहरुसँग कारोबार भएको हो । तर उनीहरू सहकारीमा संलग्न भएकाले ऋण लिएको हो ।’ सहकारीमार्फत ऋण लिएको उनले बताए । सीआईबीले चाहिँ यी व्यक्तिबाट अग्रवालले मिटरव्याजमा ऋण लिएको आधार फेला पारेको दाबी गरेको छ ।

सहकारीबाट लिएको ऋण हो भने किन धम्की आयो ?

यो प्रतिप्रश्नमा अमितले भने, ‘मैले एक महिनामा तिर्छु भनेको ऋण तीन महिनासम्म तिर्न सकिनँ । उठाउनुपर्ने मानिसले ऋण उठाउन खोज्नु र मैले दिन नसक्ने भएपछि भनाभन भएको हो ।’

मिटरब्याजमा ऋण लिएको अस्वीकार गरिरहेका अमितले बारम्बार विरोधाभाषी कुरा गरिरहे । एकातिर मिटरब्याजमा पैसा नलिएको बताइरहेका अमितले अर्कोतिर आफ्नो मुख्य समस्या व्यक्तिगत ऋणकै भएको बताए । यतिमात्र होइन ऋण तिर्नुपर्ने व्यक्ति तथा संस्थासँग कुरा भएर नेपाल फर्किएको बताए ।

नेपाल आएर ऋणी बैंकका प्रमुख कार्यकारी अधिकृतहरूसँग एकसरो भेट गरेका अमितले जिल्ला प्रशासन कार्यालयमा शान्ति सुरक्षा चाहियो भन्दै निवेदन पनि दिएका छन् । सामान्यतया बैंक तथा सहकारीबाट लिएको ऋण चुक्ता नभएमा धितोबाट असुल्ने कानुनी प्रावधान हुन्छ । पत्रकार सम्मेलनमा ऋणी बैंक वा सहकारीबाट अग्रवाललाई धम्की आएको हो वा व्यक्तिबाट भन्ने प्रस्ट पार्न सकेनन् ।

कोभिड–१९ का कारण होटल रेस्टुराँ बन्द भएपछि आफ्नो कारोबार सुकेर बैंकको ऋण तिर्न नसकेको अग्रवालले बताए । बजारबाट पैसा नउठ्नु र लकडाउनका कारण कारोबार ठप्प भएपछि अग्रवालले मिटरब्याजमा पैसा लिएर बैंकको ऋण तिर्ने जुक्ति निकालेको हुनसक्ने सीआईबीका अधिकारी बताउँछन् । ‘तर लकडाउन लम्बिँदै जाँदा मिटरब्याजको पैसाले धान्न सकेन,’ सीआईबीका एक अधिकारी भन्छन् ।

मिटरब्याजमा लगानी गर्नेहरूले यस्तै संकटमा परेका व्यावसायीलाई लगानी गर्छन् र उनीहरूका चलअचल सम्पत्ति हत्याउने गरेका छन् ।

लगातार ऋणीले अत्याएपछि बुवालाई डिप्रेसन भएकाले उपचारका लागि भारत गएको अमितले दाबी गरे । ‘बुवाले आत्महत्या गर्न खोज्नुभयो । भारत लगेर बुवाको उपचार पनि गराउँछु र बुवालाई भाइको जिम्मा लगाएर आउँछु भन्ने योजनासहित बाहिरिएको हुँ,’ उनले प्रस्ट्याए ।

उनले रक्सौल गएपछि आफू र बुवा दुवैजना अस्पताल भर्ना भएको बताए । उपचारपछि सीआईबीले खोजेको छ भनेको मिडियामा देखेपछि आफू फर्किएको अमितले जिकिर गरे । चानचुन एक अर्ब रुपैयाँ ऋण रहेको र तर तीन अर्ब रुपैयाँभन्दा बढीको ऋणको कुरा आएको पनि उनले सुनाए ।

ऋण र धितो सम्पत्ति समान रहकाले कोठा भाडामा बसेर नै व्यवहार मिलाउन सकिन्छ भन्ने विश्वासले आफू फर्किएको अमितले बताए । अर्डर गरेको करिब १० कन्टेनर मदिरा आउन बाँकी रहेको र अब त्यसैले पुनः व्यवसाय चलाउने योजना पनि उनले बनाएका छन् । अमितले विदेशी मदिराको व्यापारका कारण डुबेको भन्दै अब स्वदेशी मदिराको व्यापार गर्ने बताएका छन् । यसका लागि उनले स्वदेशमै ह्वीस्की उत्पादन गर्ने योजना सुनाए ।

कसलाई कति ऋण तिर्न बाकी ?

बैंकलाई ८० करोड

व्यक्तिगत तथा सहकारीलाई २० देखि ३० करोड

बैंकमा ऋण र कति धितो

एभरेष्ट बैंक

ऋण : २० करोड ७५ लाख रुपैयाँ
धितो : ज्ञानेश्वरको १८ आना जग्गा र ५ वटा अपार्टमेन्ट फ्ल्याट गरी २८ करोड

ग्लोबल आइएमई बैंक
ऋण : ७ करोड
धितो : ज्ञानेश्वरको साढे ३ आना जग्गा करिब १० करोड

मेगा बैंक
ऋण : सवा २० करोड, व्याज १ करोड ५० लाख
धितो : कालिमाटीको २२ आना जग्गा, २ वटा अपार्टमेन्टसहित २३ करोडको सम्पत्ति

नेपाल इन्भेष्टमेन्ट बैंक
ऋण : साबा २८ करोड ५० लाख, १ करोड ५० लाख ब्याज
धितो : ३३ करोडको स्पत्ति

प्रकाशित मिति: शनिबार, माघ २९, २०७८ १५:५३