सरकारले आगामी वैशाख ३० गतेका लागि स्थानीय तह निर्वाचनको मिति ताेकेसँगै देशभर चुनावी सरगर्मी सुरु भएको छ । नेताहरू चुनावी रणनीति बनाउन जुटेका छन् । हाम्रो जिल्लाका विभिन्न नगरपालिका र गाउँपालिकामा पनि निर्वाचनकेन्द्रित भेटघाट, छलफल र जनमत सर्वेक्षणलगायत गतिविधि थालिएका छन् । सामाजिक सञ्जालमा नेताहरू आफ्ना काम, एजेण्डाकाे प्रचार-प्रसार गर्न थालेका छन् ।
हामीले संस्थापन पाँच वर्ष नियाल्याैँ । हाम्रै गाउँ, नगरमा केकति काम भए, कसरी भए भन्ने कुरा देखिहाल्याैँ । त्यसैले याे लेखमा म खासगरी स्थानीय तहलाई कस्ताे जनप्रतिनिधि आवश्यक रहेछ भन्नेबारे संक्षिप्त चर्चा गर्नेछु ।
पहिलो, राजनीतिलाई जीवन निर्वाहको पाटो नभएर सेवाका रूपमा अंगीकार गर्ने व्यक्तिहरू उम्मेद्वार बन्नुपर्छ । दोस्राे, आफ्नो वडा, स्थानीय तहमा रहेका आम नागरिकको हक अधिकार र उक्त क्षेत्रभित्रका बासिन्दाका आधारभूत आवश्यकतालाई सम्बोधन गर्दै विकास निर्माणका सवालमा स्पष्ट लक्ष्य र गन्तव्यसहित निरन्तर लागि पर्न सक्ने व्यक्तिहरू ।
तेस्राे, निर्वाचनमा उमेदवार बन्दा राजनैतिक दलको प्रतिनिधित्व गरे पनि जनप्रतिनिधि सबैको साझा हुन्छन् भन्ने भावनाअनुरूप अगाडि बढ्न सक्ने व्यक्तिहरू ।
चौथो, समाजमा सक्षम र सबल व्यक्तिहरू, सामान्यतया आफ्ना हक, अधिकारको रक्षाका लागि सक्षम रहन्छन् । समाजमा रहेका विपन्न, अल्पसंख्यक र सिमान्तकृत समुदायका लागि बिनास्वार्थ काम गर्न सक्ने व्यक्तिहरू ।
पाँचौ, मेराे गृहजिल्ला हाे स्याङ्जा, जहाँकाे जनसंख्या अहिले नकारात्मक छ । आफ्नो ठाँउबाट बसाइँसराइ गर्नेहरूकाे क्रम बढ्दो छ । आफ्नो स्थानीय तहभित्र युवा उद्यमशीलता, सामाजिक सुरक्षालगायत शिक्षा र स्वास्थ्यको गुणस्तरमा अभिवृद्धि गर्दै आफ्नो समाजलाई बस्नयोग्य बनाउन सक्षम व्यक्तिहरू ।
छैठाैँ, स्थानीय तहमा सर्वाङ्गीण विकासलाई प्राथमिकता दिन सक्ने व्यक्तिहरू । अर्थात् बाटाे, पुल बनाउनु मात्र विकास हाे भन्ने धारणा नराख्ने व्यक्ति ।
सातौँ, लोकतान्त्रिक समाजमा विभिन्न आस्था, विचारहरू राख्ने मानिसहरू हुन्छन । उनीहरूको वैचारिक स्वतन्त्रतालाई सम्मान गर्दै व्यवहार गर्न र स्थानीय स्तरमा विकास निर्माणको नीति, योजना र कार्यक्रमहरूको पहिचान, कार्यान्वयन गर्दा नागरिकहरूका बीचमा व्यापक छलफल र समन्वय गर्दै अगाडि बढन सक्ने व्यक्तिहरू ।
आठौँ, आफ्नो स्थानीय तहमा सल्लाहकार र विज्ञहरू नियुक्त गर्दा वा परामर्श गर्दा आफ्नो पार्टीका कार्यकर्तालाई मात्र विज्ञ नठानी सम्बन्धित विषयमा विशेषज्ञता हासिल गरेका जिल्ला र जिल्ला बाहिरका व्यक्तिहरू ज्ञान, क्षमतालाई समेत सदुपयोग गर्न सक्ने व्यक्तिहरू ।
नवौँ, स्थानीय तहमा काम गर्दा अन्य स्थानीय तहमा भए गरेका राम्रा कामहरूको अनुशरण गर्दै तत्काल कार्यान्वयन गर्न सक्ने क्षमता भएका व्यक्तिहरू ।
दसौँ, आफ्नो स्थानीय तहका व्यक्तिहरूको दुःखसुखमा साथ, सहयोगसँगै आफ्नो सम्बन्धित क्षेत्रका युवाहरूलाई उद्यमशीलता, सीप, रोजगारी, खेलकुदलगायत राष्ट्रिय र अन्तर्राष्ट्रिय श्रम बजारमा आवश्यक पर्ने तालिमहरूको समेत अवसर प्रदान गर्न सक्ने व्यक्तिहरू ।
यस्ता व्यक्तिकाे खाेजी गर्नु, छान्नु तपाईं, हाम्राे पनि कर्तव्य हाे । हाम्रो जनप्रतिनिधि हसन् भन्दा गर्व गर्न लायक पात्रको खोजी गरौँ । आफ्नो गाउँ, ठाँउ र स्थानीय तहहरू हामीले नै राम्रो बनाउने हाे । दलहरूले सिर्जनशील र क्षमतावान व्यक्तिलाई उम्मेद्वार बनाउनुपर्छ । जनताले तीमध्ये उत्कृष्टलाई छान्नुपर्छ ।
प्रकाशित मिति: शनिबार, माघ २९, २०७८ १२:३९
