मिटरब्याजमा पैसा नलिएको मदिरा व्यापारी अग्रवालको दाबी, भन्छन्- ज्यान मार्ने धम्की आइरहेको छ

मिटरब्याजमा पैसा नलिएको मदिरा व्यापारी अग्रवालको दाबी, भन्छन्- ज्यान मार्ने धम्की आइरहेको छ

A+ A A-

मिटरब्याजीसँग लिएको अर्बौं रुपैयाँ ऋण तिर्न नसकेको भन्दै चिट्ठी छोडेर बेपत्ता भएका मदिरा व्यापारी अमित अग्रवाल १ महिना ६ दिनपछि काठमाडौंमा एकाएक सार्वजनिक भए ।

शुक्रबार पत्रकार सम्मेलन गरी अग्रवालले यसअघि उनका बुवाले चिट्ठीमा लेखेका विवरणभन्दा केही भिन्दै भनाइ व्यक्त गरेका छन् । अमितका ७३ वर्षीय बुवा ओमप्रकाश अग्रवालले व्यापार गर्न बैंकबाट लिएको ऋण तिर्न मिटरब्याजीबाट रकम लिएको र उक्त ऋणका कारण आफूहरू मर्नु न बाँच्नुको दोसाँधमा पुगेको बताएका थिए ।

तर, आज भने अग्रवालले पत्रकार सम्मेलनमा बाँडिएको वक्तव्यमा मिटरब्याजीबाट रकम नलिएको दाबी गरेका छन् । पत्रकार सम्मेलनमा अमितले भने, ‘साथीहरूबाट २४ प्रतिशत ब्याज तिर्ने गरी सापटी लिएको थिएँ । बुवाले त्यसैलाई मिटरब्याज सम्झनुभएछ ।’

मिटरब्याजमा ऋण दिएकाहरूले तिर्न दबाब दिएपछि अग्रवाल परिवार भागेर भारत पुगेको महानगरीय प्रहरी परिसर काठमाडौंले समेत आकलन गरेको थियो । चर्को ब्याजमा ऋण लिनेदिने कार्यलाई मिटर ब्याज कारोबारको नामले चिनिन्छ ।
मिटरब्याजमा पैसा लिएको अस्वीकार गरे पनि अमितले ऋणकै कारण आफूहरू तनावमा भएको चाहिँ स्वीकारेका छन् ।

बैंकमा ८० करोड रुपैयाँ ऋण तिर्न बाँकी रहेको र एक अर्ब रुपैयाँ बराबरको त धितो नै राखिएको समेत उनले बताए । मिटर ब्याजमा पैसा लिएको अस्वीकार गरेका अमितले वक्तव्यमा कारोबारमा जोडिएका व्यक्तिले ज्यान मार्ने धम्की दिएको भने उल्लेख गरेका छन् ।

‘व्यावसायिक कारोबारमा संलग्न विभिन्न व्यक्तिहरूले कानुनविपरीत मलगायत मेरो परिवारका सदस्यलाई मानसिक तनाव दिने, भौतिक आक्रमण गर्ने, अनधिकृत तवरले मेरो सम्पत्ति कब्जाको धम्की दिएकाले शान्ति सुरक्षा पाउन जिल्ला प्रशासन कार्यालयमा निवेदन पनि दिएका छौँ,’ उनले भनेका छन् । आफूहरू देश छोडेर भागेको नभई उपचारका लागि भारत गएको समेत अमितले दाबी गरेका छन् । कोभिड–१९ को महामारीका कारण व्यापार ठप्प भएपछि आफू यस्तो हालतमा पुगेको अमितले बताए । त्यसअघि भने बैंकको साँवा ऋण नियमित तिर्दै आएको र अब पनि तिर्ने उनले बताएका छन् ।

‘आगामी दिनमा व्यापार व्यावसायलाई सुचारु गरी कर्जाका साथै ब्याज नियमित तिर्न प्रतिबद्ध रहेको छु,’ विज्ञप्तिमा भनिएको छ । अमितले मिटरब्याजी पैसा नलिएको र बैंकिङ कारोबार मात्रै गरेको दाबी गरेका छन् । मिटरब्याजको कारोबार अवैध हो । सम्भवतः यही भएर उनले चक्रीय ब्याजमा पैसा लिएको कुरा अस्वीकार गरेका हुन् । तर, उनको हाउभाउ र विज्ञप्तिमा उल्लेख भएका कुराले भने त्यस्तो देखाउँदैन । कारोबारमै जोडिएकाले ज्यान लिने धम्की दिएको विज्ञप्तिमा छ ।

अग्रवाल परिवारले विदेशी मदिरा नेपाल ल्याएर बिक्री गर्दै आइरहेको छ । यो परिवारले काठमाडौंको कान्तिपथमा ग्रीनलाइन सेन्टर नामक कम्पनी खोलेर ब्रान्डेड विदेशी मदिराको कारोबार गरिरहेको छ । यसको सञ्चालक अभिषेक अग्रवाल र अमित अग्रवाल हुन् । विज्ञप्ति अनुसार यो व्यापारमा उनीहरू ३० वर्षदेखि संलग्न छन् ।

तर, अग्रवाल परिवारका सदस्य २२ पुसदेखि बेपत्ता भएका थिए । प्रहरीले अग्रवाल परिवारको घरबाट पत्र भेटेको थियो, जसमा भनिएको थियो, ‘साहुहरूको नाम तथा मिटरब्याजीहरूले दिए-गराएका कागजपत्र तथा तिनीहरूको नामावली थाहा पाई एउटा प्रतिष्ठित परिवारलाई आत्महत्या गराउने अवस्थामा पुर्‍याउन लगाएका मानिसहरूलाई दण्ड सजाय दिई मेरो परिवारको आत्मालाई शान्ति प्रदान गर्न सरकारसँग माग गर्दछौँ ।’ एक महिनापछि प्रहरीको सम्पर्कमा आएको अग्रवाल परिवारले तनावमा भएकाले र बुवाले यस्तो लेखेको दाबी गरेको छ ।

काठमाडौं प्रहरी परिसरसँग पनि अग्रवाल परिवारले यही कुरा दोहोर्‍याएको एसएसपी सुदीप गिरीले बताए । तर, प्रहरीले भने मिटरब्याजीको विषयमा समेत अनुसन्धान गर्ने जनाएको छ । अग्रवाल परिवार २६ माघमा काठमाडौंमा आएका थिए । काठमाडौं आएसँगै उनीहरूले ऋण लिएका बैंकका प्रमुख कार्यकारी अधिकृत (सीईओ) हरूसँग भेटेका थिए । उनीहरूले ५ वटा बैंकबाट करिब १ अर्ब रुपैयाँ ऋण निकालेका छन् । २१ असोजमा बैंकहरूले ग्रीनलाइन सेन्टरमा ताल्चा लगाइदिएका थिए ।

प्रकाशित मिति: शुक्रबार, माघ २८, २०७८ १६:३१