लिबियाको राजधानीमा प्रधानमन्त्रीको काफिलामा बन्दुकधारीको आक्रमण

A+ A A-

लिबियाको राजधानी त्रिपोलीमा प्रधानमन्त्री अब्दुल हमिद दबेबाहको काफिलामा बन्दुकधारीहरूले आक्रमण गरेका छन् ।

लिबियाको आन्तरिक मन्त्रालयले घटनाको पुष्टि गरेको छ । मन्त्रालयका प्रवक्ता अब्दुलमेनेम अल अरबीले एक विज्ञप्ति जारी गर्दै भनेका छन्, 'प्रधानमन्त्रीको काफिलेलाई सुक अल जुमा जिल्ला (मध्य त्रिपोली) मा लाइसेन्स प्लेटबिनाको गाडीमा सवार व्यक्तिहरूले सशस्त्र आक्रमणको शिकार बनाएका थिए ।'

आक्रमणमा कुनै हताहत नभएको अरबीले बताए । उनले देशको राजनीतिक घटनाक्रमविरुद्धको विरोधपछि उक्त घटना भएको बताएका छन् ।

'आन्तरिक मन्त्रालयले यस आपराधिक कार्यको निन्दा गर्दछ,' प्रवक्ता अरबीले भने, 'अपराधीहरूलाई न्यायको दायरामा ल्याउन अनुसन्धान भइरहेको छ ।'

प्रतिनिधिसभा (संसद्) ले फाथी बाशाघालाई देशको नयाँ प्रधानमन्त्रीका लागि सर्वसम्मतिले मतदान गरेको केही घण्टापछि विज्ञप्ति जारी गरिएको हो ।

यद्यपि, दबेबाहले मंगलबार उनको चुनाव नभएसम्म पदमा रहने र 'निर्वाचित सरकारलाई मात्र शक्ति हस्तान्तरण गर्ने' बताएका थिए ।

उत्तर अफ्रिकी देशमा वर्षौंदेखिको राजनीतिक विभाजनको अन्त्य गर्दै गत वर्ष फेब्रुअरीमा संयुक्त राष्ट्र प्रायोजित लिबियाको राजनीतिक संवाद मञ्चले दबेबाहको राष्ट्रिय एकताको सरकारलाई नियुक्त गरेको थियो ।

लिबियाको संसद्ले गत वर्ष सेप्टेम्बरमा दबेबाहको सरकारबाट विश्वास फिर्ता लिएको थियो र यसलाई कामचलाउ सरकारको रूपमा राखेको थियो । लिबियामा गत वर्ष डिसेम्बर २४ मा आम चुनाव हुने भनिएको थियो । तर, प्राविधिक र कानुनी कारणले अनिश्चितकालका लागि स्थगित गरिएको थियो ।

प्रकाशित मिति: शुक्रबार, माघ २८, २०७८ १५:३८