भारतको कर्नाटक राज्यमा चर्किएको हिजाब विवाद अदालतसम्म पुग्याे

A+ A A-

भारतको कर्नाटक राज्यमा विद्यालय र कलेज तहका विद्यार्थीबीच धार्मिक पहिरनको विषयलाई लिएर चर्किएको विवाद अदालत पुगेको छ ।

विवाद चर्किएपछि कर्नाटक सरकारले तीन दिनका लागि सम्पूर्ण शैक्षिक संस्थान बन्द गर्ने निर्णय गरेको थियो ।

कर्नाटक सरकारले त्यहाँको उच्च अदालतको सुझाव मान्दै आउँदो सोमबारबाट शैक्षिक संस्थान खुला गर्ने बताएको छ ।

धार्मिक पहिरनको विषयमा अदालतबाट अन्तिम आदेश नआउँदासम्म शैक्षिक संस्थानमा धार्मिक पहिरन लगाएर अउन प्रतिबन्ध लगाएको छ, त्यहाँको उच्च अदालतले ।

यसरी सुरु भयो विवाद

सन् २०२१ को डिसेम्बरमा कर्नाटक राज्यको उडुपीमा रहेको एक सरकारी कलेजले छात्रालाई हिजाब (टाउको र घाँटी छोप्ने पहिरन) लगाएर कक्षामा आउन रोक लगायो । कलेज परिसरमा हिजाब लगाउने छुट दिए पनि कक्षामा भने हिजाब लगाउन नपाइने नियम बनायो कलेजले ।

कक्षाकोठामा हिजाब लगाउन नपाइने कलेजको नियमविरुद्ध मुस्लिम छात्राहरूले विरोध गरे । कलेजले उनीहरूको माग सुनुवाई नगरेपछि मुस्लिम छात्राहरू कर्नाटक उच्च अदालतको ढोका ढकढकाउन पुगे ।

मुस्लिम युवितिहरूपले हिजाब लगाएर कक्षामा बस्न पाउनुपर्ने माग राखेपछि हिन्दुवादी संगठनमा आवद्ध विद्यार्थीहरूले पनि गेरुवा रंगको मफ्लर/गम्छा लगाएर कलेज/विद्यालय आउन पाउँ भन्दै आन्दोलन चर्काए ।

विवाव बढ्दै गएर हिजाब लगाउने र गेरुवा गम्छा लगाउने दुई समुह आम्ने–साम्ने हुन पुगे ।

यता उडुपीको सरकारी कलेजले भने हिजाब लगाएकै कारण मुस्लिम छात्रालाई कक्षाकोठा र कलेजमा प्रवेश बन्द गर्‍याे। मुस्लिम छात्राले संविधानले नै पहिरन र धार्मिक स्वतन्त्रताको हक दिएको भन्दै विरोध गरे ।

गएको मंगलबार कर्नाटकको माड्या भन्ने स्थानमा रहेको एक उच्च शिक्षालयमा प्रवेश गर्दै गरेकी मुस्लिम छात्रालाई हिजाब लगाएको भन्दै हिन्दु अतिवादीले दुर्व्यवहार गरेको भिडियो सार्वजनिक भयो ।

मुस्कान नाम गरेकी ति युवतिले हिन्दु अतिवादीसंग डटेर प्रतिकार गरिन् ।

बीबीसी हिन्दीसंगको कुराकानीमा उनले भनिन, ‘म सधैँ जसरी कलेजमा गएकी हुँ । त्यो भिडले मलाई गेट बाहिरै रोकेर हिजाब लगाएर कलेज भित्र नछिर भन्दै धम्कि दियो । अनि जसै म कलेज भित्र छिरेँ मलाई घेरे । अनि मैले पनि अल्लाहको नाम लिँदै प्रतिवाद गरेँ, उनीहरूले मलाई पछाडिबाट नाराबाजी गर्दै घेरा हाले ।’

अदालत पुगेको यो विषयमा कर्नाटक उच्च अदालतका तीन जना न्यायाधीशले सुनुवाई गर्दैछन् । हिजाबको नाममा उठाइएको यो विवादले सम्पूर्ण कर्नाटक राज्य तनावग्रस्त भएको छ ।

याे विवाद कानुन बहसकाे मात्र नरहेर अहिले राजनीतिकाे पनि बनेकाे छ । प्रदेशहरूमा चुनावकाे माैसम भएकाले पनि याे विवाद झन चर्किएकाे हाे । भारतकाे माेदी सरकार हिन्दुवादीकाे समर्थनमा छ । विपक्षीहरूले माेदी सरकारले धार्मिक अल्पसंख्यकमाथि दमन गरेकाे आराेप लगाउने गरेका छन् ।

प्रकाशित मिति: शुक्रबार, माघ २८, २०७८ १९:५९