कति झुक्किन्छ सरकार

A+ A A-

बुधबार साँझपख प्रहरीले राजधानीको भृकुटीमण्डपबाट कविद्वय संगीत स्रोता र रसुवाली कविलाई गिरफ्तार गर्यो । गिरफ्तारपछि प्रहरीले भन्यो, ‘झुक्किएर पक्राउ गरिएछ ।’

विमतिका स्वरसँग त्रसित देखिने सरकारी संयन्त्रका नेतृत्व समेत बेलाबेलामा किन झुक्किरहन्छ ? प्रधानमन्त्री केपी शर्मा ओलीले पनि आफू बेलाबेलामा झुक्किएको बताउने गरेका छन् ।

प्रधानमन्त्री ओलीलाई कहिले चिनी व्यापारीले झुक्याउँछन्, कहिले मन्त्रालयका सचिवले त कहिले ठेकेदारले ।

विरोधीमाथि अरिगांल जसरी जाइलाग भन्दै निर्देशन दिने प्रधानमन्त्री ओलीको मस्तिष्कमा आजभोलि ‘हरेउ’सर्प देखा पर्न थालेको छ ।

उग्र नश्लवादी राष्ट्रवाद र समृद्धिको स्वरप्रति विमति राख्नेलाई हरेउले डसाउने कल्पना गर्न थालेको आरोप उनीमाथि लाग्न थालेको छ । विगतमा उनी बौद्धिकलाई लोप्पा खुवाउँछु, पछार्छु पनि भन्थे ।

१४ वर्ष जेल भोगेका प्रधानमन्त्री ओली भन्न सक्छन्, ‘जाबो आधा–एक घण्टा जेल पर्दा पनि यत्रो कोकोहोलो मच्चाउने ?’

रेशम चौधरीलाई नेल ठोकेर बाँध्ने, निहत्थालाई गोली ठोक्ने र राजनीतिक विचारलाई प्रतिबन्ध लगाउने ओली सरकार बारम्बार झुक्किरहन्छ ।

सरकारका लागि कवि, पत्रकार, लेखक र गायक सबैभन्दा ठूलो चुनौती बनेका छन् । कहिले गीतमाथि प्रतिबन्ध, कहिले पत्रकारलाई जेल र कहिले कविलाई पक्राउ बारम्वार भइरहेको छ ।

सरकार आजभोलि बौद्धिक र बुद्धिजीवीसँग पनि डराउन थालेको आलोचकहरु बताउँछन् । पुस्तकमाथि लगाइएको करलाई कतिपयले यसको पुष्टिका रुपमा अथ्र्याएका छन् ।

समृद्धि र समाजवाद ल्याउन तल्लीन सरकारलाई कविताले पनि डिस्टर्ब गर्छ ।

संगीतज्ञ र कविले देशलाई झुक्याउँछन् भन्ने मानसिकताका कारण सरकारको सुरक्षा संयन्त्र कविलाई झुक्याएर पक्राउ गर्न थालेको छ ।

सडकमै दुई तिहाइविरुद्ध उत्रिएका नागरिक उनले अझै देखेका छैनन् ? सञ्चार माध्यममा दैनिक आउने समाचार र विचार तथा नागरिक आवाज कसले पुर्याइदेला प्रधानमन्त्री ओलीसमक्ष ?

लेखक आहुति लेख्छन्, ‘शासकहरू जन्मेका जन्म्यै छन्, नेता निर्माण गर्ने भनिएका आन्दोलनहरूमा । समाज बदल्ने भनिहिँडेका अगुवाहरू अन्ततः आफंै फेरिएका छन्, शासकमा ।’

कविप्रति ओलीको आक्रोश देख्दा उनीभित्रको शासक मन कम र कवि मन ज्यादा आरिसे भएको हो कि भन्ने लाग्न थालेको समाजका अगुवाहरु बताउँछन् ।

एक वर्षअघि प्रधानमन्त्री ओलीले चन्द्रागिरिमा कविता लेखेर आफूलाई कविको सूचीमा राखे त्यसैले उनलाई आफ्नो भन्दा राम्रो कविता अरु कसैले लेखेको मन नपर्दो हो !

प्रधानमन्त्रीज्यू, अब नझुक्किनुहोस् । तपार्इं झुक्किनुको मूल्य हामीले चुकाउनुपर्छ । तपाइ ठगिनुको मूल्य हामीले भर्नुपर्छ । कमसे कम आफ्नो दुई तिहाइसँग त पटक्कै नझुक्किनुहोस् ।

र, झुक्किएर पनि कवि, पत्रकार, लेखक र बौद्धिकसँग तपाइ डराउनै पर्दैन । किनभने तपाइ डराउनुको भय र त्रास हामीले भोग्नुपर्छ ।

दुई तिहाइको प्रधानमन्त्री र सरकार झुक्किनु त पटक्कै राम्रो होइन ।

प्रकाशित मिति: शुक्रबार, असार १३, २०७६ ००:३५