विश्व स्तब्ध पार्ने अर्काे तस्बिर : नदीसँगै बग्यो 'अमेरिका' सपना

पत्रकार जुलिया ली डकले खिचेको तस्बिर

A+ A A-

२ सेप्टेम्बर २०१५ मा सिरियाबाट भाग्ने क्रममा भूमध्य सागरमा ढुंगा डुब्दा तीन वर्षीय बालक एलन कुर्दी पनि डुबे । समुद्रको किनारमा घोप्टो परिरहेको उनको शवले विश्वलाई स्तब्ध बनायो ।

सन् २०१७ मा म्यानमारको सेनाको अत्याचारबाट बच्न भागेर बंगलादेश आउने क्रममा राखिने राज्यका जाफोर आलमका १६ महिने छोरा मोहम्मद सोहायत नदीमा डुबे र उनको पनि शव घोप्टो परेको अवस्थामा फेला पर्यो ।

२ सेप्टेम्बर २०१५ मा सिरियाबाट भाग्ने क्रममा भूमध्य सागरमा ढुंगा दुर्घटनामा परेका तीन वर्षीय बालक एलन कुर्दी

अहिले फेरि यस्तै घटना सार्वजनिक भएको छ । एल साल्भाडोरबाट अमेरिका जाने क्रममा रियो ग्रान्ड नदीको किनारमा डुबेर मृत्यु भएका दुई बाबुछोरीको तस्बिरले फेरि विश्वलाई स्तब्ध बनाएको छ । र, यसले निरन्तर बढिरहेको आप्रवासी समस्या र त्यसबाट सिर्जित मानवीय संकटलाई उजागर गरेको छ ।

२५ वर्षीय ओस्कार अल्बर्टो मार्टिनेज रामिरेज उनकी २३ महिने छोरी भलेरियासँग आइतबार मेक्सिकोको माछामोरोसबाट अमेरिकाको टेक्सास प्रवेश गर्न खोजिरहेका थिए । रियो ग्रान्डको तीव्र बहावमा डुबेर बाबुछोरीको मृत्यु भएको हो ।

उनी छोरीसँगै नदी किनारमा तैरिरहेको तस्बिर पत्रकार जुलिया ली डकले सोमबार सार्वजनिक गरेकी थिइन् ।

यो तस्बिर मेक्सिकन अखबार ला जोर्नाडाले छापेको थियो । रामिरेजकी पत्नी तानिया भेनेसा अभालोसले आफूहरु पछिल्ला दुई महिनादेखि मानवीय भिसामा मेक्सिकोमा बसिरहेकाे र अमेरिकामा शरणका लागि पर्खिरहेकाे बताइन् ।

तर, आधिकारिक रुपमा भिसा नपाएका कारण निराश बनेका रामिरेजले नदी पार गरेर अमेरिका छिर्ने निर्णय लिएका थिए । अभालाेसका अनुसार रामिरेज छोरीलाई नदी पार गराएर उनलाई लिन आउँदै गर्दा छोरी आत्तिएर फर्किइन् ।

छोरी नदीमा आएपछि रामिरेज छोरीलाई जोगाउन गए । उनले छोरीलाई त भेटे तर उनीहरुलाई नदीले बगायो । नदी किनारमा भेटिएको शवमा रामिरेजकी छोरी उनको टिसर्टभित्र छिरेकी छन् । नदीमा बगेर किनारामा आउँदा उनले बाबुलाई टिसर्टभित्रैबाट अँगालो मारेकी छन् ।

रामिरेजकी आमाले अमेरिका नजान भनेकी थिइन् । तर, रामिरेज पैसा कमाएर आफ्नो घर बनाउँछु भन्दै अमेरिका जाने निर्णयमा पुगका थिए ।

सन् २०१७ मा बंगलादेश आउने क्रममा नदीमा बगेका म्यानमारका १६ महिने बालक मोहम्मद सोहायत

एल साल्भाडोर सरकारले जनतालाई अमेरिका प्रवेश गर्ने कोसिसमा आफ्नो ज्यान जोखिममा नपार्न आग्रह गरेको छ । आप्रवासीका रुपमा अमेरिका प्रवेश गर्न लाग्दा रियो ग्रान्ड नदीमा दुई बाबुछोरीको मृत्यु भएकाे हृदयविदारक तस्बिर सार्वजनिक भएपछि एल साल्भाडोर सरकारले यस्तो आग्रह गरेको हो ।

२५ वर्षीय ओस्कार अल्बर्टो मार्टिनेज रामिरेज र उनकी २३ महिने छोरीको तस्बिर देख्ने हरेकले यस घटनाप्रति आक्रोशपूर्ण अभिव्यक्ति दिँदै आएका छन् । पछिल्ला दिनमा मध्य अमेरिकी देश होन्डुरस, ग्वाटेमाला र अल साल्भाडोरका नागरिक देशमा भड्किएकाे हिंसाका कारण अमेरिका पलायन भइरहेका छन् ।

अमेरिकी राष्ट्रपति डोनाल्ड ट्रम्पको कडा आप्रवासी नीतिका कारण मेक्सिकोसँगको सीमाबाट अमेरिका छिर्न नसकेपछि अमेरिका पुग्न आप्रवासीले यस्ताे खतरनाक बाटो रोज्ने गरेका छन् । सन् २०१८ मा अमेरिका–मेक्सिको सीमामा कम्तीमा पनि २ सय ८३ जना मारिएका छन् । यो तथ्यांक यूएस बोर्डर पेट्रोलको हो । यद्यपि, मानवअधिकारवादीले यो संख्या बढिरहेको बताएका छन् ।

अमेरिकी राष्ट्रपति ट्रम्पको कडा आप्रवासी नीतिलाई अमेरिका–मेक्सिको सीमा क्षेत्रमा आप्रवासीमाथि भएकाे अत्याचार र याे घटनाले गिज्याइरहेका छन् । तैपनि, ट्रम्पले आप्रवासीलाई अपराधी, बलात्कारी र जनावर भन्दै उनीहरुले अमेरिकालाई कहिल्यै माया नगरेको बताउँदै आएका छन् ।

अमेरिका विश्वका आप्रवासी समस्या खेप्ने पहिलो राष्ट्र होइन । तर, ट्रम्पको निर्णय विनाशकारी साबित भएकाे छ । कसैको जीवन जोखिममा छ भने उसले शरण माग्नु गैरकानुनी होइन ।

ट्रम्प र अमेरिकालाई पनि यो नियम लागू हुन्छ । ट्रम्पको नीतिले मानव जीवन ध्वस्त पारिरहेको छ । यसले अमेरिकालाई पनि क्षति गरिरहेको अमेरिकी नागरिककै बुझाइ छ ।

ट्रम्पको आप्रवासी नीतिसँग सहमत नहुनेहरु भन्छन्, ‘ट्रम्प राष्ट्रपतिबाट हटेपछि पनि यो अवस्थाबाट देशलाई पुरानै अवस्थामा फर्काउन समय लाग्नेछ ।’

अमेरिकी प्रतिनिधिसभामा डेमोक्रेटले अमेरिका–मेक्सिको सीमामा मानवीय सहायताका लागि ४.५ अर्ब डलरको रकम स्वीकृत गरेको छ । तर, यो विधेयक रिपब्लिकनको बहुमत रहेको सिनेटले पारित गरेमा मात्रै लागू हुनेछ ।

प्रकाशित मिति: बिहीबार, असार १२, २०७६ २०:२९